جموں و کشمیر

کشمیر میں ماہ رواں کے اختتام تک موسم لگ بھگ خشک رہنے کا امکان

Published

1 year ago

January 23, 2025

سری نگر، محکمہ موسمیات کی پیش گوئی کے مطابق وادی کشمیر میں ماہ رواں اور سردیوں کے بادشاہ چالیس روزہ چلہ کلان کے آخری ایام کے دوران موسم لگ بھگ خشک رہنے کا امکان ہے۔متعلقہ محکمے کے ایک ترجمان نے بتایا کہ وادی میں 23 سے 28 جنوری تک موسم مجموعی طور پر خشک رہنے کی توقع ہے۔انہوں نے کہا کہ بعد میں 29 جنوری کو موسم عام طور پر ابر آلود مگر خشک رہ سکتا ہے۔ان کا کہنا ہے کہ 30 اور 31 جنوری تک مطلع ابر آلود رہنے کے ساتھ کہیں کہیں ہلکی برف باری یا بارشیں ہوسکتی ہیں۔انہوں نے کہا کہ بعد ازاں وادی میں یکم اور 2 فروری کو ایک بار موسم ابر آلود رہ سکتا ہے اور اس دوران کہیں کہیں ہلکی برف باری یا بارشوں کا امکان ہے۔

دریں اثنا وادی میں مطلع جزوی طور پر ابر آلود رہنے سے کہیں شبانہ درجہ حرارت میں مزید گراوٹ تو کہیں بہتری واقع ہوئی ہے۔گرمائی دارلحکومت سری نگر میں کم سے کم درجہ حرارت منفی2.0 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت 0.6 ڈگری سینٹی گریڈ ریکارڈ ہوا تھا۔سری نگر میں 21 دسمبر کو شبانہ درجہ حرارت منفی 8.5 ڈگری سینٹی گریڈ ریکارڈ ہوکر رواں موسم کی سرد ترین رات ریکارڈ ہوئی تھی جو گذشتہ 133 برسوں میں سری نگر میں ماہ دسمبر میں ریکارڈ ہونے والا تیسرا کم ترین درجہ حرارت ہے۔

سری نگر میں سال 1974 کے ماہ دسمبر میں کم سے کم درجہ حرارت منفی10.3 ڈگری سینٹی گریڈ اور 13 دسمبر سال 1964 کو شبانہ درجہ حرارت منفی 12.8 ڈگری سینٹی گریڈ ریکارڈ ہوا تھا۔وادی کے شہرہ آفاق سیاحتی مقام گلمرگ میں کم سے کم درجہ حرارت منفی7.5 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی8.5 ڈگری سینٹی گریڈ ریکارڈ ہوا تھا۔وادی کے دوسرے مشہور سیاحتی مقام پہلگام میں کم سے کم درجہ حرارت منفی5.6 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی4.2 ڈگری سینٹی گریڈ ریکارڈ ہوا تھا۔

وادی کے ایک اور سیاحتی مقام سونہ مرگ میں کم سے کم درجہ حرارت منفی9.8 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی7.4 ڈگری سینٹی گریڈ ریکارڈ ہوا تھا۔سرحدی ضلع کپوارہ میں کم سے کم درجہ حرارت منفی2.2 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت 0.8 ڈگری سینٹی گریڈ ریکارڈ ہوا تھا۔

گیٹ وے آف کشمیر کے نام سے مشہور قصبہ قاضی گنڈ میں کم سے کم درجہ حرارت منفی2.6 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت 1.6 ڈگری سینٹی گریڈ ریکارڈ ہوا تھا۔شمالی کشمیر کے بارہمولہ اور بانڈی پورہ اضلاع میں کم سے کم درجہ حرارت بالترتیب منفی1.1 ڈگری سینٹی گریڈ اور منفی2.0 ڈگری سینٹی گریڈ ریکارڈ ہوا ہے۔وسطی کشمیر کے بڈگام اور گاندربل اضلاع میں کم سے کم درجہ حرارت بالترتیب منفی2.7 ڈگری سینٹی گریڈ اور منفی1.8 ڈگری سینٹی گریڈ ریکارڈ ہوا ہے۔جنوبی کشمیر کے پلوامہ، کولگام اور شوپیاں میں شبانہ درجہ حرارت بالترتیب منفی3.4 ڈگری سینٹی گریڈ، منفی3.3 ڈگری سینٹی گریڈ اور منفی4.1 ڈگری سینٹی گریڈ ریکارڈ ہوا ہے۔

لداخ یونین ٹریٹری کے ضلع لیہہ میں کم سے کم درجہ حرارت منفی8.2 ڈگری سینٹی گریڈ جبکہ ضلع کرگل میں کم سے کم درجہ حرارت منفی9.8 ڈگری سینٹی گریڈ ریکارڈ ہوا ہے۔
سائبیریا کے بعد دنیا کے دوسرے سرد ترین علاقہ دراس میں کم سے کم درجہ حرارت منفی18.8 ڈگری سینٹی گریڈ ریکارڈ ہوا ہے۔قابل ذکر ہے کہ وادی میں سردیوں کا باد شاہ چالیس روزہ چلہ کلان بر سر اقتدار ہے جو 21 دسمبر سے شروع ہوکر 31 جنوری کو اختتام پذیر ہوجاتا ہے۔ یہ چلہ ٹھٹھرتی سردیوں اور بھاری باری کے لئے مشہور ہے اور اس کے بعد 20 دنوں پر محیط چلہ خورد شروع ہوجاتا ہے۔

یو این آئی ایم افضل

جموں و کشمیر

جموں و کشمیر پولیس کی کارروائی، کٹھوعہ میں چرس کے ساتھ اسمگلر گرفتار

Published

7 hours ago

June 17, 2026

Online Desk

جموں، جموں و کشمیر پولیس نے بدھ کے روز ریاست کے ضلع کٹھوعہ میں دو منشیات فروشوں کو گرفتار کر کے ان کے قبضے سے 1 کلو گرام چرس برآمد کی ہے۔

جاری ایک بیان میں پولیس ترجمان نے بتایا کہ ایس ایس پی کٹھوعہ موہیتا شرما کی نگرانی میں منشیات کے خلاف جاری مہم (“وار آن ڈرگز”) کے تحت معاشرے سے اس لعنت کو ختم کرنے کے لیے ٹھوس کوششیں کی جا رہی ہیں۔ اسی سلسلے میں، جموں و کشمیر پولیس نے لکھن پور کے بسوہلی موڑ علاقے کے پاس سے 1 کلو گرام چرس برآمد کر کے دو منشیات فروشوں کو گرفتار کیا ہے۔ اس کارروائی کے دوران ان کی موٹر سائیکل کو بھی ضبط کر لیا گیا ہے۔

انہوں نے مزید بتایا کہ موصولہ خفیہ اطلاعات پر فوری کارروائی کرتے ہوئے، تھانہ لکھن پور کے ایس ایچ او کی قیادت میں پولیس ٹیم نے بسوہلی موڑ پر ناکہ بندی اور خصوصی تلاشی کے دوران ایک موٹر سائیکل کو روکا۔ اس موٹر سائیکل کو ساحل ورما نامی شخص چلا رہا تھا جو کٹھوعہ کا رہائشی ہے، جبکہ اس کے ساتھ اس کا ایک ساتھی مکیش کمار بھی سوار تھا۔

تلاشی لینے پر ان کے قبضے سے 1 کلو گرام چرس برآمد ہوئی، جس کے بعد متعلقہ دفعات کے تحت مقدمہ درج کر کے تفتیش شروع کر دی گئی ہے۔

جموں و کشمیر پولیس (کٹھوعہ) نے عوام سے اپیل کی ہے کہ وہ اس طرح کی کسی بھی غیر قانونی اور مشکوک سرگرمی کے بارے میں پولیس کو ہیلپ لائن نمبر 112 یا 09858034100 پر فوری اطلاع دیں۔ پولیس نے یقین دلایا ہے کہ معلومات فراہم کرنے والے شہریوں کی شناخت کو مکمل طور پر صیغہ راز (خفیہ) میں رکھا جائے گا۔

یو این آئی۔ م ع۔ایف اے

جموں و کشمیر

کشمیر کے بارہمولہ میں ٹیمپو ٹریولر الٹنے سے اڈیشہ کے آٹھ سیاح زخمی

Published

11 hours ago

June 17, 2026

Online Desk

سری نگر، شمالی کشمیر کے بارہمولہ ضلع میں گلمرگ-ٹنگمرگ سڑک پر بدھ کے روز ایک ٹیمپو ٹریولر الٹ جانے سے اڈیشہ کے آٹھ سیاح زخمی ہو گئے۔

حکام کے مطابق گاڑی میں 11 سیاح سوار تھے اور وہ گلمرگ سے ٹنگمرگ جا رہے تھے کہ راستے میں حادثے کا شکار ہو کر الٹ گئی۔

حادثے کے فوراً بعد تمام سیاحوں کو طبی معائنے اور علاج کے لیے سب ڈسٹرکٹ اسپتال ٹنگمرگ منتقل کیا گیا۔

ابتدائی طبی رپورٹ کے مطابق آٹھ سیاحوں کو معمولی چوٹیں آئی ہیں جبکہ تین سیاح محفوظ رہے اور انہیں کوئی نقصان نہیں پہنچا۔ زخمیوں میں سے دو افراد کو مزید بہتر علاج کے لیے سری نگر کے ایک اسپتال منتقل کیا گیا ہے۔

پولیس نے واقعے کا نوٹس لیتے ہوئے تفتیش شروع کر دی۔

یواین آئی۔ م س

جموں و کشمیر

آر آر یو اور جے کے ایس ڈی آر ایف کے درمیان مفاہمتی یادداشت پر دستخط، جموں و کشمیر میں آفات سے نمٹنے کی صلاحیت کو فروغ ملے گا

Published

1 day ago

June 16, 2026

Online Desk

سرینگر، جموں و کشمیر میں آفات سے نمٹنے کی تیاری اور ردِعمل کی صلاحیتوں کو مضبوط بنانے کی سمت ایک اہم قدم اٹھاتے ہوئے راشٹریہ رکشا یونیورسٹی (آر آر یو)، جموں و کشمیر کیمپس نے منگل کے روز جموں و کشمیر اسٹیٹ ڈیزاسٹر ریسپانس فورس (جے کے ایس ڈی آر ایف) کے ساتھ ایک مفاہمتی یادداشت (ایم او یو) پر دستخط کیے۔

حکام کے مطابق اس اشتراک کا مقصد آر آر یو کی تعلیمی مہارت اور جے کے ایس ڈی آر ایف کے عملی تجربے کو یکجا کرتے ہوئے آفات کے انتظام کے شعبے میں تربیت، تحقیق اور صلاحیت سازی کو فروغ دینا ہے۔

دستخط شدہ مفاہمتی یادداشت کے تحت دونوں ادارے ایس ڈی آر ایف اہلکاروں کے لیے خصوصی تربیتی پروگرام تیار کرنے، مشترکہ طور پر تعلیمی و تربیتی کورسز کی اسناد جاری کرنے اور خطے میں آفات سے نمٹنے کے تربیتی مراکز کو مزید مضبوط بنانے کے لیے مل کر کام کریں گے۔

معاہدے کے مطابق دونوں ادارے علم اور تجربات کے تبادلے اور پیشہ ورانہ ترقی کے فروغ کے لیے ورکشاپس، سیمینارز، لیکچرز اور قلیل مدتی تربیتی پروگراموں کے انعقاد میں بھی قریبی تعاون کریں گے۔

ایم او یو کے تحت مشترکہ تحقیقی منصوبوں، اساتذہ کے تبادلے، تعلیمی وسائل اور علمی معلومات کے اشتراک کی راہیں بھی ہموار ہوں گی، جس سے آفات کے انتظام کے شعبے میں جدت اور سیکھنے کے نئے مواقع پیدا ہوں گے۔

یہ معاہدہ سرینگر میں اے جی میر، ڈائریکٹر جنرل آف پولیس (ڈی جی پی) اور کمانڈنٹ جنرل، ہوم گارڈز، سول ڈیفنس و ایس ڈی آر ایف جموں و کشمیر کے دفتر میں دستخط کیا گیا۔

اس موقع پر حکام نے کہا کہ یہ شراکت داری ایک زیادہ مضبوط اور آفات سے نمٹنے کے لیے بہتر طور پر تیار جموں و کشمیر کی تعمیر کے مشترکہ وژن کی عکاسی کرتی ہے، جس میں تربیت یافتہ افرادی قوت اور تحقیق پر مبنی حل کلیدی کردار ادا کریں گے۔

حکام کے مطابق تعلیمی علم اور عملی میدان کے تجربے کو یکجا کرکے آر آر یو اور جے کے ایس ڈی آر ایف مرکز کے زیر انتظام علاقے میں آفات سے نمٹنے کی صلاحیتوں اور عوامی تحفظ کو مؤثر طور پر مضبوط بنانے میں اہم کردار ادا کریں گے۔

یواین آئی۔ ظ ا