نئی دہلی، ہندوستان نے جمعہ کے روز اسرائیل اور لبنان کے درمیان ہونے والی 10 روزہ عارضی جنگ بندی کی پرزور حمایت کی ہے زارت خارجہ نے دیرپا امن کے قیام کے لیے تنازع کو ختم کرنے کی سفارتی کوششوں کی تائید کا اشارہ دیا ہے میڈیا بریفنگ کے دوران وزارت خارجہ کے ترجمان رندھیر جیسوال نے اس سفارتی پیش رفت کا خیر مقدم کرتے ہوئے کہا کہ ” ہندوستان جنگ بندی اور ہر اس قدم کا خیر مقدم کرتا ہے جو امن کی طرف لے جاتا ہے۔”

حماس سے متعلق ایک منظم عمل برقرار رکھنے کے حوالے سے انہوں نے کہا، “ہندوستان کے پاس ایک (طے شدہ) عمل موجود ہے، اور ان مسائل کو اسی عمل کے تحت حل کیا جاتا ہے۔”

یہ ریمارکس اسرائیل اور لبنان کے درمیان 10 روزہ جنگ بندی کے تناظر میں سامنے آئے ہیں، جس کا نفاذ جمعرات سے ہوا ہے۔

دشمنی کے اس خاتمے کا اطلاق امریکی صدر ڈونلڈ ٹرمپ کے اس اعلان کے ساتھ ہوا ہے کہ وہ اسرائیل اور لبنان کی قیادت کے درمیان ایک تاریخی پہلی ملاقات کی راہ ہموار کرنے کے لیے کام کر رہے ہیں۔

اس جنگ بندی کو بڑے پیمانے پر واشنگٹن کی قیادت میں تہران کے ساتھ جاری تنازع کو کم کرنے کی سفارتی کوششوں کے حصے کے طور پر دیکھا جا رہا ہے۔ ایران مذاکرات کے دوران اپنے موقف پر قائم رہا ہے اور اس کی قیادت کا اصرار رہا ہے کہ کسی بھی معاہدے میں لبنان میں دشمنی کا خاتمہ لازمی شامل ہونا چاہیے۔

ایران اور امریکہ کے درمیان ثالثی میں پاکستان کے ممکنہ کردار کے بارے میں پوچھے جانے پر، جیسوال نے اشارہ دیا کہ نئی دہلی صورتحال کی باریک بینی سے نگرانی کر رہا ہے۔ انہوں نے کہا، “ہم مغربی ایشیا کی جنگ میں تمام پیش رفت کا قریب سے جائزہ لے رہے ہیں۔”

موجودہ تنازع کی جڑیں 28 فروری کو ایران کے خلاف امریکہ اور اسرائیل کی فوجی کارروائی سے جڑی ہیں، جس میں چند دن بعد لبنان بھی اس وقت شامل ہو گیا جب حزب اللہ نے 2 مارچ کو اسرائیل پر راکٹ حملے شروع کیے تھے۔

صدر ٹرمپ نے اس لمحے کو ممکنہ طور پر ایک بڑی تبدیلی قرار دیتے ہوئے اسرائیلی وزیراعظم بنیامن نیتن یاہو اور لبنانی صدر جوزف عون کی وائٹ ہاؤس میں ملاقات کے امکان کا اظہار کیا، جو کہ 44 سالوں میں اپنی نوعیت کی پہلی ملاقات ہوگی۔

یواین آئی ۔ایف اے

نئی دہلی، وزیر اعظم نریندر مودی نے کہا ہے کہ آسٹریا کے چانسلر کرسچین اسٹاکر کے دورہ ہند سے دونوں ممالک کے درمیان تجارت اور سرمایہ کاری کے شعبے میں نئی توانائی آئے گی اور مختلف شعبوں میں آسٹریا کی مہارت اور ہندوستان کی رفتار و وسعت دنیا کے لیے قابل بھروسہ سپلائی چین کو یقینی بنائے گی دونوں ممالک دفاع، سیمی کنڈکٹر، کوانٹم اور بایو ٹیکنالوجی کے شعبوں میں بھی اپنی شراکت داری کو مضبوط کریں گے۔ ہندوستان اور آسٹریا نے تعلیم کے شعبے میں تعاون کے لیے ایک مفاہمت نامہ پر دستخط کیے ہیں اور مائگریشن اینڈ موبلٹی ایگریمنٹ کو نرسنگ کے شعبے میں بھی آگے بڑھانے کا فیصلہ کیا ہے۔ دونوں ممالک نے نوجوانوں کے تبادلے کے پروگرام کے تحت ہالی ڈے پروگرام شروع کرنے کا بھی اعلان کیا ہے۔

جناب مودی نے دورہ ہند پر آئے ہوئے جناب اسٹاکر کے ساتھ بات چیت کے بعد جمعرات کو یہاں مشترکہ پریس بیان میں کہا کہ ہندوستان-آسٹریا شراکت داری کو اختراع اور مستقبل کی ضروریات پر مبنی بنانے کی ضرورت ہے۔ انہوں نے کہا کہ دونوں ممالک کا پختہ یقین ہے کہ فوجی تصادم سے مسائل کا حل ممکن نہیں اور ہم یوکرین اور مغربی ایشیا میں مستقل امن کے حامی ہیں۔ انہوں نے مزید کہا کہ ہندوستان اور آسٹریا دونوں ہی عالمی اداروں میں اصلاحات کے پرزور حامی ہیں اور دہشت گردی کو جڑ سے اکھاڑ پھینکنا ہماری مشترکہ عہد بستگی ہے۔

جاری ۔ یواین آئی ۔ایف اے

نئی دہلی، سپریم کورٹ نے جمعرات کو لازمی ووٹنگ نافذ کرنے کی ہدایت دینے کے مطالبے والی ایک مفاد عامہ کی عرضی کو خارج کر دیا عرضی گزار نے کہا تھا کہ جو لوگ ووٹ دینے سے انکار کرتے ہیں، انہیں سرکاری سہولیات سے محروم کر دینا چاہیے اور ان کے خلاف تعزیری کارروائی ہونی چاہیے عدالت نے اس پر سخت رخ اختیار کرتے ہوئے واضح کیا کہ انتخابات میں شرکت کو جابرانہ یا زبردستی کے اقدامات سے نافذ نہیں کیا جا سکتا۔

چیف جسٹس سوریہ کانت، جسٹس جوئے مالیہ باگچی اور جسٹس وپل پنچولی کی بنچ نے سماعت کے دوران کہا کہ جمہوریت میں شہریوں سے حق رائے دہی کے استعمال کی توقع کی جاتی ہے، لیکن کسی شخص کو ووٹ دینے کے لیے مجبور نہیں کیا جاسکتا۔ عرضی گزار کے وکیل نے مشورہ دیا تھا کہ عدالت الیکشن کمیشن کو لازمی ووٹنگ کے لیے رہنما خطوط بنانے اور بغیر کسی معقول وجہ کے ووٹ نہ دینے والوں پر پابندی لگانے کے لیے ایک کمیٹی تشکیل دینے کی ہدایت دے۔ اس پر چیف جسٹس نے تبصرہ کیا کہ حق رائے دہی کے بارے میں عوامی بیداری کی مہم چلائی جانی چاہیے، لیکن ہم اس کے لیے مجبور نہیں کر سکتے۔

عدالت نے عرضی کو خارج کرتے ہوئے کہا کہ اٹھائے گئے مسائل پالیسی سازی کے دائرے میں آتے ہیں اور ان پر متعلقہ قانون ساز اور انتظامی حکام (پارلیمنٹ اور حکومت) کے ذریعے غور کیا جانا ہی سب سے بہتر ہے۔ بنچ نے دہرایا کہ ووٹ دینا ایک آئینی حق اور جمہوری فریضہ ہے، لیکن اسے کسی پرمسلط نہیں جا سکتا۔

یواین آئی ۔ایف اے