سری نگر، نیشنل کانفرنس (این سی) کے ناراض رکنِ پارلیمان روح اللہ مہدی نے منگل کو کہا کہ وہ جموں و کشمیر کے ریاستی درجے اور آئینی ضمانتوں کی بحالی کے مطالبے کے لیے دہلی میں ہونے والے احتجاج میں شرکت کریں گے۔ انہوں نے زور دیا کہ یہ تحریک محض عوامی جذبات کو ٹھنڈا کرنے کے لیے ایک روزہ علامتی پروگرام نہیں بننی چاہیے۔

گزشتہ ہفتے حکمران نیشنل کانفرنس نے متفقہ طور پر فیصلہ کیا تھا کہ پارلیمنٹ کے مانسون اجلاس کے پہلے دن نئی دہلی میں احتجاج کیا جائے گا تاکہ جموں و کشمیر کو فوری طور پر ریاستی درجہ اور آئینی ضمانتیں بحال کرنے کا مطالبہ کیا جا سکے۔

صحافیوں سے گفتگو کرتے ہوئے روح اللہ مہدی نے کہا کہ عوام نے انہیں آرٹیکل 370 اور اگست 2019 سے قبل موجود آئینی تحفظات کی بحالی کے لیے جدوجہد کی ذمہ داری سونپی ہے۔

انہوں نے کہاکہ”میں دہلی جاؤں گا اور آرٹیکل 370 کے بارے میں بات کروں گا۔ میں ریاستی درجے کے بارے میں بات کروں گا۔ عوام نے ہمیں آرٹیکل 370 اور اپنے آئینی حقوق کے لیے لڑنے کی ذمہ داری دی ہے۔”

تاہم انہوں نے اس بات پر زور دیا کہ یہ جدوجہد وقتی احتجاجوں یا سیاسی پروگراموں تک محدود نہیں ہونی چاہیے۔

روح اللہ نے کہاکہ”ریاستی درجے کے لیے صرف ایک دن کا احتجاج نہیں ہونا چاہیے۔ ایسا کوئی پروگرام نہیں ہونا چاہیے جس کا مقصد صرف لوگوں کو خاموش کرنا ہو۔ یہ ایک منظم اور مسلسل جدوجہد ہونی چاہیے، صرف ریاستی درجے کے لیے نہیں بلکہ ان تمام آئینی تحفظات کی بحالی کے لیے بھی جو 2019 سے پہلے موجود تھے۔”

2024 کے پارلیمانی انتخابات میں سری نگر لوک سبھا نشست جیتنے والے روح اللہ مہدی کو آرٹیکل 370، ریاستی درجہ اور جموں و کشمیر کے آئینی حقوق کے معاملے پر نیشنل کانفرنس کے سب سے واضح اور سرگرم رہنماؤں میں شمار کیا جاتا ہے۔

واضح موقف رکھنے والے اس رکنِ پارلیمان نے وزیر اعلیٰ عمر عبداللہ کے سخت ناقد کے طور پر بھی اپنی شناخت بنائی ہے۔

وہ متعدد بار عمر عبداللہ پر آرٹیکل 370 کے معاملے میں نرم رویہ اختیار کرنے اور نیشنل کانفرنس کو عوام کی جانب سے دیے گئے مینڈیٹ سے انحراف کا الزام عائد کر چکے ہیں۔

روح اللہ مسلسل یہ مؤقف اختیار کرتے رہے ہیں کہ آئینی تحفظات کی بحالی اور جموں و کشمیر کی شناخت کا تحفظ سیاسی بحث و مباحثے کا مرکزی موضوع رہنا چاہیے۔

اطلاعات کے مطابق گزشتہ ایک سال کے دوران انہیں پارٹی قیادت کی جانب سے نظر انداز کیا گیا اور نیشنل کانفرنس کے کئی اہم اجلاسوں میں بھی مدعو نہیں کیا گیا۔

یواین آئی۔ ظ ا

جموں، مرکزی وزیر جتیندر سنگھ نے اسے خوشخبری قرار دیتے ہوئے مرکزی وزیر ریلوے اشونی ویشنو کا شکریہ ادا کیا ہے، جنہوں نے 14 اور 15 جون کو سوموتی اماوسیہ کے موقع پر بڑھتی ہوئی مسافروں کی تعداد کو مدنظر رکھتے ہوئے جموں اور ہری دوار کے درمیان خصوصی ٹرین چلانے کی منظوری دی ہے۔

ڈاکٹر سنگھ نے سوشل میڈیا پلیٹ فارم ایکس پر ایک پوسٹ میں کہاکہ”کٹھوعہ، ہیرا نگر اور جموں کے لیے خوشخبری۔ اماوسیہ کے موقع پر جموں اور ہری دوار کے درمیان خصوصی ٹرین چلانے کے مطالبے کو قبول کرنے پر ریلوے وزیر اشونی ویشنو کا شکریہ۔”

انہوں نے مزید لکھاکہ”وزیر اعظم نریندر مودی کی قیادت میں گزشتہ 12 برسوں کے دوران خطے کا کوئی بھی مطالبہ ایسا نہیں رہا جسے نظرانداز کیا گیا ہو۔”

اپنے ایکس اکاؤنٹ پر شیئر کیے گئے 3 جون کے خط میں ڈاکٹر جتیندر سنگھ نے بتایا کہ انہیں پریم ناتھ ڈوگرا کی جانب سے درخواست موصول ہوئی تھی، جو جموں و کشمیر مرکز کے زیر انتظام علاقے میں سوچھ بھارت ابھیان کے ریاستی ایگزیکٹو رکن اور انچارج ہیں۔

اس درخواست میں 14 جون 2026 کو جموں سے ہری دوار اور 15 جون 2026 کو ہری دوار سے جموں کے لیے خصوصی ٹرین چلانے کی اپیل کی گئی تھی تاکہ مقامی زائرین سوموتی اماوسیہ کے موقع پر ہری دوار جا سکیں۔

ڈاکٹر سنگھ نے اپنے خط میں ریلوے وزیر سے کہا تھاکہ”یہ درخواست ان مقامی یاتریوں کی سہولت کے لیے ہے جو سوموتی اماوسیہ کے موقع پر ہری دوار جانا چاہتے ہیں، لہٰذا اس معاملے پر مناسب غور کیا جائے۔”

ڈاکٹر جتیندر سنگھ نے اپنی پوسٹ میں 14 اور 15 جون 2026 کو کٹڑا-جموں-ہری دوار کے درمیان چلنے والی خصوصی ٹرین کی تفصیلات بھی شیئر کیں۔

یواین آئی۔ ظا

سری نگر، جموں و کشمیر کے وزیر اعلیٰ عمر عبد اللہ نے قومی دارالحکومت میں اپوزیشن جماعتوں کے ‘انڈیا’ اتحاد کے رہنماؤں سے ملاقات کرکے ریاست کا درجہ بحال کرنے کے حوالے سے احتجاجی مظاہرے کے لیے حمایت طلب کی ہے۔

مسٹر عبداللہ نے پیر کے روز نئی دہلی میں منعقدہ انڈیا اتحاد کی میٹنگ میں یہ معاملہ اٹھایا اور اتحاد کے شراکت داروں سے قومی دارالحکومت میں ہونے والے پارٹی کے مجوزہ احتجاج میں شریک ہونے کی درخواست کی۔ انڈیا اتحاد کی اس میٹنگ میں پیپلز ڈیموکریٹک پارٹی (پی ڈی پی) کی سربراہ محبوبہ مفتی نے بھی شرکت کی۔

نیشنل کانفرنس نے یہاں ایک بیان میں کہا، ’’آج ہونے والی انڈیا اتحاد کی میٹنگ میں وزیر اعلیٰ عمر عبداللہ نے تمام شرکاء سے کہا کہ جب ہم ریاستی درجہ کی بحالی کے لیے دہلی میں احتجاج کرنے آئیں گے تو وہ جموں کسمیر نیشنل کانفرنس کے ساتھ جڑیں۔ انہوں نے یہ بھی کہا کہ وہ اس سلسلے میں تمام رہنماؤں کو الگ الگ خطوط بھی ارسال کریں گے۔‘‘

یواین آئی۔الف الف