نئی دہلی، پاکستانی مقبوضہ کشمیر (پی او کے) میں حکام نے منگل کی سہ پہر کو کرفیو نافذ کر دیا کیونکہ مظاہرے کئی شہروں میں پھیل گئے، جب کہ پولیس تشدد میں گزشتہ چار دنوں میں کم از کم 41 افراد ہلاک ہو چکے ہیں، جن میں 19 بچے اور سات حاملہ خواتین شامل ہیں۔

ذرائع کے مطابق راولکوٹ، مظفرآباد، کوٹلی، بھمبر، ڈڈیال، پالندری اور سدھانوتی میں ہزاروں افراد سڑکوں پر نکل آئے، حکومت اور فوج مخالف نعرے لگائے اور آزادی کا مطالبہ کیا۔ مظفرآباد، کوٹلی، بھمبر اور ڈڈیال میں انتظامی بندش سے معمولات زندگی درہم برہم ہو گئے، پولیس کی کارروائی میں 70 سے زائد افراد زخمی ہوئے۔

راولکوٹ میں صبح 11 بجے بڑے پیمانے پر احتجاج شروع ہوا، مظاہرین نے مرکزی سڑک بلاک کر دی، جس سے پاکستانی پولیس، فوج اور رینجرز کو گولیوں، پیلٹ گنز اور آنسو گیس کا سہارا لینا پڑا۔ ذرائع کا کہنا ہے کہ انتظامی کارروائی میں کم از کم سات افراد زخمی ہوئے۔

ذرائع کے مطابق کوٹلی اور ڈڈیال میں لوگوں کی بڑی تعداد سڑکوں پر نکل آئی، نعرے لگاتے ہوئے راولکوٹ کی طرف مارچ کرتے ہوئے دیکھا گیا۔ پالندری میں آنسو گیس کے استعمال کے باوجود ہزاروں افراد پاکستانی حکومت کے خلاف سڑکوں پر نکل آئے۔

دریں اثنا، سودھانوتی میں مظاہرین نے لکڑی کی لاٹھیوں سے مظاہرے کیے اور پاکستانی حکومت اور فوج کو وارننگ جاری کی۔ مظفرآباد میں نیلم پل پر مظاہرین اور سیکیورٹی فورسز کے درمیان جھڑپیں بھی ہوئیں۔ فائرنگ کی ویڈیوز نے کشیدگی کو مزید بڑھا دیا ہے۔ قابل ذکر ہے کہ پی او کے میں مظاہرین 38 مطالبات کے ساتھ سڑکوں پر نکل آئے ہیں۔ ان میں بنیادی طور پر سستی بجلی اور آٹے، چاول اور دالوں کی کم قیمتیں شامل ہیں۔

مظاہرین کا موقف ہے کہ پاکستان نے پی او کے میں منگلا ڈیم جیسے ہائیڈرو الیکٹرک پروجیکٹ بنائے ہیں۔ ان کا کہنا ہے کہ یہ علاقہ پاکستان کا حصہ نہیں ہے اس لیے مقامی رہائشیوں کو کم نرخوں پر بجلی ملنی چاہیے۔ مظاہرین کا ایک بڑا سیاسی مطالبہ پی او کے اسمبلی میں پناہ گزینوں کے لیے مخصوص 12 نشستوں کو ختم کرنا ہے۔ یہ نشستیں ان لوگوں کے لیے مخصوص ہیں جنہیں پناہ گزین سمجھا جاتا ہے اور جن کے بارے میں کہا جاتا ہے کہ وہ جموں و کشمیر سے ہجرت کر کے پاکستان کے زیر قبضہ کشمیر آئے ہیں لیکن اب وہ پی او کے کے بجائے پاکستان کے دوسرے حصوں میں رہتے ہیں۔ مظاہرین سوال کرتے ہیں کہ جو لوگ پی او کے میں نہیں رہتے وہ ان 12 سیٹوں کو ووٹ اور نمائندگی کیسے دے سکتے ہیں۔

میڈیا رپورٹس کے مطابق، پاکستانی فوج اس بات کو یقینی بناتی ہے کہ اسلام آباد، راولپنڈی اور کراچی میں موجودگی کے باوجود صرف حزب المجاہدین کے ارکان اور ان کے رشتہ دار ہی ان مخصوص نشستوں پر منتخب ہوں۔ نتیجے کے طور پر، پی او کے اسمبلی کی 45 میں سے 12 سیٹیں آئی ایس آئی اور پاکستانی فوج کے زیر اثر رہیں۔ اس سے وہ قانون سازوں پر اثر انداز ہو سکتے ہیں اور اگر ضروری ہو تو اپنی پسند کا وزیر اعظم مقرر کر سکتے ہیں۔

ایک مثال عبداللہ سعید شاہ کی ہے، جنہیں پیر مظہر سعید شاہ بھی کہا جاتا ہے۔ وہ جیش محمد کا سندھ کا صوبائی سربراہ بتایا جاتا ہے۔ اس شدت پسند تنظیم میں ان کے مبینہ کردار کے باوجود، وہ پی او کے اسمبلی کے رکن ہیں اور حال ہی میں اطلاعات و نشریات کے وزیر کے عہدے پر فائز تھے۔ اسی طرح کی مظاہروں کی لہر گزشتہ سال اکتوبر میں بھی پھوٹ پڑی تھی جس میں 31 افراد ہلاک ہوئے تھے۔

ان مظاہروں کے بعد وزیراعظم شہباز شریف نے اپنے قریبی ساتھی اور سیاسی مشیر رانا ثناء اللہ کو مذاکرات کے لیے پی او کے بھیجا۔ حکام نے مظاہرین کے 38 میں سے 21 مطالبات تسلیم کر لیے۔ تاہم آٹھ ماہ گزرنے کے باوجود وہ وعدے پورے نہیں ہوئے۔ حکام نے موجودہ بدامنی کے دوران اور اس سے پہلے دونوں مظاہرین پر گولیاں چلائی ہیں۔ ذرائع کا کہنا ہے کہ گزشتہ سال بریگیڈیئر فائق ایوب کے آئی ایس آئی کے سیکٹر کمانڈر کا عہدہ سنبھالنے کے بعد سے پی او کے میں شہریوں کے خلاف پاکستانی فوج کی کارروائیوں میں تیزی آئی ہے۔ مظاہرین اور ماہرین کا الزام ہے کہ ان کی کمان میں فوج کے جبر میں نمایاں اضافہ ہوا ہے۔

پی او کے میں اپنی پوسٹنگ سے قبل، بریگیڈیئر فائق ایوب پنجاب میں سیکٹر کمانڈر تھے۔ ان کے بارے میں کہا جاتا ہے کہ وہ لاہور میں پرتشدد کریک ڈاؤن کا ذمہ دار تھا، جس کی وجہ سے انہیں “لاہور کا قصائی” کا لقب ملا۔ اس کے بعد، لیفٹیننٹ جنرل عاصم ملک اور فیلڈ مارشل عاصم منیر نے انہیں پی او کے منتقل کر دیا، جہاں کریک ڈاؤن جاری ہے۔

یو این آئی۔ ع ا۔

نئی دہلی، دنیا بھر میں ہندوستانی ملاحوں کے تحفظ کے تئیں اپنے اٹوٹ عزم کا مظاہرہ کرتے ہوئے، میری ٹائم ریسکیو کوآرڈینیشن سینٹر (ایم آر سی سی) ممبئی نے عمان کے حکام کے ساتھ مل کر عمان کے ساحل کے قریب ایک تجارتی ٹینکر پر میزائل حملے کے بعد اس پر سوار تمام 24 ہندوستانی ملاحوں کو کامیابی کے ساتھ بچا لیا ہے ہندوستانی کوسٹ گارڈ نے منگل کو بتایا کہ ایم آر سی سی ممبئی کو پیر کے روز دو بج کر 20 منٹ پر پلاؤ کے جھنڈے والے ٹینکر ’ایم ٹی میریویکس‘ پر میزائل حملے کی اطلاع ملی۔ یہ جہاز عمان کے مصیرہ کے قریب لنگر انداز تھا۔ جہاز پر 24 ملاح سوار تھے اور وہ سبھی ہندوستانی شہری تھے۔ یہ معلومات جہاز پر موجود ارکان میں سے ایک کے رشتہ دار نے ایم آر سی سی ممبئی کو دی تھی۔

صورتحال کی سنگینی اور ملاحوں کی حفاظت کو لاحق فوری خطرے کو سمجھتے ہوئے، ایم آر سی سی ممبئی نے فوراً عمان میری ٹائم سرچ اینڈ ریسکیو سینٹر، عمان کے ساتھ رابطہ قائم کیا۔ انہوں نے عمان کی ایجنسی سے تلاش اور بچاؤ مشن کے تال میل کی ذمہ داری سنبھالنے اور جہاز اور اس کے عملے کو فوری مدد فراہم کرنے کی درخواست کی۔

تیزی سے کارروائی کرتے ہوئے عمان نے پاس کے ایک جہاز کا رخ موڑ کر اور جائے وقوعہ پر دو بچاؤ ہیلی کاپٹر بھیج کر بچاؤ مہم کا آغاز کیا اور اس کی نگرانی کی۔ بدلتی ہوئی صورتحال پر نظر رکھنے اور ہندوستانی شہریوں کے تحفظ کو یقینی بنانے کے لیے ایم آر سی سی ممبئی نے عمان اور دیگر متعلقہ فریقوں کے درمیان مسلسل تال میل برقرار رکھا۔ تقریباً پانچ بجے عمان نے تصدیق کی کہ عمان کی بحریہ کے ہیلی کاپٹروں کے ذریعے تمام 24 ہندوستانی ارکان کو محفوظ طریقے سے بچا لیا گیا ہے۔ بچائے گئے تمام ارکان محفوظ بتائے جا رہے ہیں، اور کسی کے ہلاک یا زخمی ہونے کی اطلاع نہیں ہے۔

جہاز ابھی عمان کے مصیرہ کے قریب لنگر انداز ہے۔ یہ کامیاب بچاؤ مہم بین الاقوامی بحری تعاون اور اس خطے میں بحری بچاؤ کے حکام کے درمیان قائم مضبوط کوآرڈینیشن میکانزم کے موثر ہونے بات کو اجاگر کرتی ہے۔ یہ ہندوستانی کوسٹ گارڈ کے ہندوستانی ملاحوں کے تحفظ اور مقام کی پرواہ کیے بغیر بحری ہنگامی حالات کے دوران بروقت امداد فراہم کرنے کے عزم کو بھی واضح کرتا ہے۔ بحر ہند میں ایک بڑے تلاش اور بچاؤ کے علاقے کے لیے ایم آر سی سی ممبئی سمندر میں لوگوں کے تحفظ کو یقینی بنانے کے لیے علاقائی اور بین الاقوامی شراکت داروں کے ساتھ مل کر کام کر رہا ہے۔ ہندوستانی کوسٹ گارڈ ایک قابل اعتماد بحری سکیورٹی پارٹنر کے طور پر اپنا کردار ادا کرتے ہوئے، ملاحوں کی حفاظت، بین الاقوامی تعاون کو مضبوط کرنے اور پورے بحر ہند کے خطے میں محفوظ بحری ماحول کو فروغ دینے کے لیے پوری طرح پرعزم ہے۔

یواین آئی۔ایف اے

نئی دہلی، ایران اور اسرائیل کے درمیان ایک دوسرے پر تازہ حملوں کے بعد مغربی ایشیا میں ایک بار پھر کشیدگی بڑھنے کے درمیان ہندوستان نے افسوس کا اظہار کرتے ہوئے اسے بین الاقوامی برادری کے لیے تشویش کا موضوع بتایا ہے اور کہا ہے کہ تمام فریقین کو بات چیت کے ذریعے حل تلاش کرنا چاہیے تاکہ خطے میں امن قائم ہو سکے ساتھ ہی ہندوستان نے اپنے شہریوں کو ایران کے سفر سے گریز کرنے کی ایڈوائزری دہرائی ہے اور وہاں رہنے والے ہندوستانیوں سے دستیاب ذرائع سے ملک چھوڑنے کی اپیل کی ہے۔ وزارت خارجہ نے پیر کو ایک بیان جاری کرتے ہوئے کہا، ”ہندوستان کو مغربی ایشیا میں دوبارہ ہونے والے حملوں پر بہت افسوس ہے۔ یہ صورتحال بین الاقوامی برادری کے لیے انتہائی تشویش کا باعث ہے۔ اس لڑائی کو اب 100 دن سے زیادہ ہو چکے ہیں اور اس سے پہلے ہی لوگوں کی پریشانیاں بڑھی ہوئی ہیں۔ اس کا عالمی معیشت اور توانائی کی سپلائی پر بھی بہت برا اثر پڑا ہے“۔

ہندوستان نے تمام فریقین سے کشیدگی کم کرنے کی اپیل کی ہے اور یہ یقینی بنانے کو کہا ہے کہ عام لوگوں کو کوئی نقصان نہ پہنچے اور سفارتی حل کے لیے جاری بات چیت کو پورا کریں تاکہ خطے میں امن و استحکام لوٹ سکے۔ اس دوران تہران میں واقع ہندوستانی سفارت خانے نے حالیہ واقعات کے پیش نظر تمام ہندوستانی شہریوں کو ایران کا سفر کرنے سے بچنے کی اپنی پچھلی ایڈوائزری دہرائی ہے۔ سفارت خانے نے کہا ہے کہ جو ہندوستانی شہری ابھی ایران میں ہیں، انہیں بھی دستیاب ٹرانسپورٹ کے ذرائع سے ملک چھوڑنے کا مشورہ دیا جاتا ہے۔

قابل ذکر ہے کہ ایران اور امریکہ-اسرائیل کے درمیان جاری جنگ بندی کے درمیان اسرائیل نے پیر کو جنوب مغربی ایران میں ایک اہم پیٹرو کیمیکل پلانٹ اور کئی دیگر فوجی اڈوں پر فضائی حملے کیے ہیں۔ دو ماہ قبل ہونے والی جنگ بندی کے بعد ایران کے اندر کسی توانائی کی تنصیب پر یہ پہلا اسرائیلی حملہ ہے۔

یواین آئی۔ایف اے