یوم پیدائش 19 اپریل کے موقع پر
ممبئی ، 18 اپریل (یو این آئی):بالی ووڈ میں ارشد وارثی کا نام ایک ایسے اداکار کے طور پر شمار کیا جاتا ہے جنہوں نے اپنے لاجواب مزاحیہ اداکاری سے تقریبا دو دہائی سے ناظرین کو اپنا دیوانہ بنایا ہوا ہے ارشد وارثی کی پیدائش ایک مسلم گھرانے میں 19 اپریل 1968 کو ممبئی میں ہوئی ان کے والد کا نام احمد علی خان تھا۔
ارشد بچپن سے ہی فلموں میں کام کرنا چاہتے تھے انہیں کم عمری میں ہی اپنی جدوجہد بھری زندگی کا آغاز کرناپڑا۔
ارشد وارثی نے اپنی ابتدائی تعلیم ناسک کے بورڈ نگ اسکول سے حاصل کی لیکن گھر کے حالات کو دیکھتے ہوئے انہیں اپنی تعلیم دسویں کلاس تک ہی محدود کرنا پڑی۔
رقص میں دلچسپی کے پیش نظر انہوں نے اکبر سمیع کے ڈانس گروپ میں حصہ لیا اور 1991 میں انڈین ڈانس مقابلہ کا خطاب بھی جیتا۔ اس کے بعد انہوں نے بالی ووڈ کا رخ کیا۔
ارشد کی بالی ووڈ میں شروعات کافی جدوجہد بھری رہی۔ انہیں ہندی سنیما میں اداکاری کرنے کا پہلا موقع امیتابھ بچن کی کمپنی کی فلم تیرے میرے سپنے سے ملا ۔
انہیں اس زمانے میں کئی فلموں میں کام کرنے کا موقع ملا، لیکن وہ بالی ووڈ میں اپنی شناخت بنانے میں کامیاب نہیں ہوسکے۔
بہت جدوجہد کرنے کے بعد وہ راجو ہیرانی کی ہدایت میں بننے والی فلم منا بھائی ایم بی بی ایس سے انہوں نے بالی ووڈ میں اپنی شناخت بنانے میں کامیاب ہوسکے۔
اس فلم میں انہوں نے سرکٹ کا کردار ادا کیا تھا جسے آج تک بالی ووڈ کے شائقین یاد رکھتے ہیں۔ اس فلم میں وہ سنجے دت کے داہنے ہاتھ کے طورپر نظر آئے ۔
اس فلم میں سرکٹ کے رول کو اس قدر پسند کیا گیا کہ فلم ہٹ ہونے کے بعد ان پر لطیفے بھی بننے لگے۔
اس کے بعد وہ پھر راجو ہیرانی کی اس فلم کے سیکوئل لگے رہو منا بھائی میں نظرآئے۔
دونوں ہی فلموں کے لئے انہیں کئی انعامات سے نوازا گیا۔
ارشد وارثی نے سال 1999 میں ماریا گوروٹی کے ساتھ شادی کی ان کے دو بچے ایک بیٹا اور ایک بیٹی ہے۔
ارشد نے نہ صرف کامیڈی فلموں میں اپنی خاص پہچان بنائی بلکہ اسی کے ساتھ وہ کئی فلموں میں اپنی سنجیدہ اداکاری کو بھی متعارف کراچکے ہیں۔ ارشد کی اہم فلموں میں ہیرو ہندوستانی، ہلچل، میں نے پیار کیوں کیا، لگے رہو منا بھائی، عشقیہ، ڈیڑھ عشقیہ، جولی ایل ایل بی، ضلع غازی آباد، پاگل پنتی وغیرہ شامل ہیں۔
انہوں نے اب تک تقریباً 47 فلموں میں کام کیا ہے جن میں سال 2014 میں ڈیڑھ عشقیہ اور 2010 میں ببن حسین کا رول ادا کیا تھا جسے بالی مداحوں نے بہت پسند کیا تھا۔ سال 2013 میں جالی ایل ایل بی میں جگدیش تیاگی (جالی) ایک وکیل کے کردار میں ارشد وارثی کو دیکھا گیا ا س فلم کو بھی مداحوں نے پسند کیا تھا۔
اسی طرح 2011 میں ڈبل دھمال میں ارشد وارثی نے آدی کا مزاحیہ رول کیا تھا۔ 2007 میں ریلیز فلم سنڈے میں ببلو کے کردار میں نظر آنے والے ارشد وارثی نے زبردست کامیڈی سے اپنے مداحوں کو بے پناہ محظوظ کیا۔
فلموں کے علاوہ ارشد چھوٹے پردے پر بھی نظر آئے۔ سال 2006 میں، انہوں نے ‘بگ باس سیزن 1’ کی میزبانی کی۔ سال 2010 میں ڈانس ریئلٹی شو ‘ذ را نچکے دکھا سیزن 2’ میں بطور جج نظر آئے۔
حال ہی میں ارشد وارثی کی نئی فلم ’بچن پانڈے‘ او ٹی ٹی پلیٹ فارم پر ریلیز کی گئی ہے جس میں اکشے کمار، جیکولین فرنینڈس بھی شامل ہیں۔
