نئی دہلی، ملک کی تمام سیاسی جماعتوں نے منگل کو جموں و کشمیر کے پہلگام میں ہونے والے گھناؤنے اور وحشیانہ دہشت گردانہ حملے کی سخت مذمت کی اور مجرموں کو سزا دینے کے لیے کسی بھی کارروائی کے لیے حکومت کی مکمل حمایت کا اعلان کیا۔
پارلیمنٹ لائبریری بلڈنگ میں شام کو دو گھنٹے کی میٹنگ کی صدارت لوک سبھا میں ایوان کے ڈپٹی لیڈر اور وزیر دفاع راج ناتھ سنگھ نے کی۔ جبکہ وزیر داخلہ امت شاہ، وزیر خارجہ ایس جے شنکر، وزیر خزانہ نرملا سیتا رمن، پارلیمانی امور اور اقلیتی امور کے وزیر کرن رجیجو، بھارتیہ جنتا پارٹی کے قومی صدر اور صحت اور خاندانی بہبود کے وزیر جگت پرکاش نڈا، کانگریس صدر ملکارجن کھڑگے، لوک سبھا میں قائد حزب اختلاف راہل گاندھی، تیلگو دیشم پارٹی کے لاو سری کرشنا، شیو سینا کے شری کانت شندے، نیشنلسٹ کانگریس پارٹی (شرد پوار) کی سپریا سولے، نیشنلسٹ کانگریس پارٹی کے پرفل پٹیل، آل انڈیا مجلس اتحاد المسلمین کے رہنما اسد الدین اویسی، بیجو جنتا دل کے سسمیت پاترا،راشٹریہ جنتا دل کے پریم چند گپتا، عام آدمی پارٹی کے سنجے سنگھ، دراوڑ منیترا کزگم کے تروچی سیوا، ترنمول کانگریس کے سدیپ بندوپادھیائے اور سماج وادی پارٹی کے پروفیسر۔ رام گوپال یادو شامل ہوئے۔
کل جماعتی میٹنگ کے بعد، مرکزی وزیر کرن رجیجو نے کہا، “میٹنگ بہت اچھی رہی اور درحقیقت، تمام سیاسی رہنماؤں نے اتفاق رائے سے کابینہ کمیٹی برائے سلامتی امور (سی سی ایس) کی طرف سے پاکستان کے حوالے سے کی گئی کارروائی کی حمایت کی۔
حکومت نے میٹنگ میں واضح کیا کہ وزیر اعظم نریندر مودی اور حکومت کی ہمارے ملک میں دہشت گردی کی سرگرمیوں کے خلاف زیرو ٹالرنس رہے گی۔ تمام لیڈروں نے حکومتی کی طرف سے کئے جارہے تمام کاموں اور مستقبل میں کئے جانے والے تمام کاموں کے لئے حکومت کے ساتھ اپنی یکجہتی کا اظہار کیا۔”
مسٹر رجیجو نے کہا، “وزیر دفاع نے پہلگام کے واقعہ اور سی سی ایس میٹنگ میں حکومت ہند کی طرف سے کی گئی کارروائی کے بارے میں آگاہ کیا۔ یہ واقعہ انتہائی افسوسناک ہے۔ جس کی وجہ سے ملک میں ہر کوئی پریشان ہے، اس کو ذہن میں رکھتے ہوئے، حکومت ہند نے بھی آج مزید سخت کارروائی کرنے کا ارادہ ظاہر کیا ہے۔”
مسٹر رجیجو نے کہا، “سب اس بات پر متفق ہیں کہ ہندوستان کو دہشت گردی کے خلاف متحد ہو کر لڑنا چاہئے۔ ہندوستان نے ماضی میں دہشت گردی کے خلاف سخت کارروائی کی ہے اور کرتا رہے گا۔ حکومت کی طرف سے کل جماعتی میٹنگ میں اس پر تبادلہ خیال کیا گیا ہے۔ انٹیلی جنس بیورو (آئی بی)، وزارت داخلہ کے عہدیداروں نے اس واقعہ کے بارے میں معلومات فراہم کیں، واقعہ کیسے ہوا اور کہاں کہاں چوک ہوئی۔ تمام جماعتوں نے کہا کہ وہ دہشت گردی کے خلاف لڑائی میں حکومت کے ساتھ ہیں۔ تمام سیاسی جماعتوں نے یہ پیغام دیا ہے اور تمام جماعتوں کے لیڈران نے ایک آواز میں کہا ہے کہ حکومت جو بھی قدم اٹھائے گی، ہم اس کی حمایت کریں گے۔
کانگریس کے صدر ملکارجن کھڑگے نے نامہ نگاروں کو بتایا، “وزیر دفاع راج ناتھ سنگھ نے میٹنگ کی صدارت کی، مرکزی وزیر داخلہ امیت شاہ بھی وہاں تھے۔ تمام جماعتوں نے پہلگام دہشت گردانہ حملے کی مذمت کی۔ ہم نے کہا کہ جموں و کشمیر میں امن برقرار رکھنے کے لیے تمام کوششیں کی جانی چاہئیں۔”
لوک سبھا میں قائد حزب اختلاف اور کانگریس کے رکن پارلیمنٹ راہل گاندھی نے کہا کہ “سب نے پہلگام دہشت گردانہ حملے کی مذمت کی ہے۔ اپوزیشن نے کسی بھی کارروائی میں حکومت کی مکمل حمایت کی ہے۔”
عام آدمی پارٹی کے ایم پی سنجے سنگھ نے کہا، “پورا ملک غصے میں ہے، غمزدہ ہے اور ملک چاہتا ہے کہ مرکزی حکومت دہشت گردوں کو ان کی زبان میں منہ توڑ جواب دے، جس طرح انہوں نے بے گناہ لوگوں کو مارا ہے، ان کے کیمپوں کو تباہ کیا جائے اور پاکستان کے خلاف بھی کارروائی کی جائے۔ یہ واقعہ 22 اپریل کو ہوا تھا، اس جگہ کو سیکورٹی ایجنسیوں کی معلومات فراہم کئے بغیر 20 اپریل کو کھولا گیاتھا۔ سیکورٹی ایجنسیوں کو اس بارے میں کوئی علم نہیں تھا۔ ہم نے مطالبہ کیا ہے کہ جوابدہی طے کرنے کی ضرورت ہے اورکارروائی کی جانی چاہیے کہ سیکورٹی میں کوتاہی کیوں ہوئی
ترنمول کانگریس کے رکن پارلیمنٹ سدیپ بندوپادھیائے نے کہا، “سیکیورٹی لیپس پر بات ہوئی، ہم نے حکومت کو یقین دلایا کہ وہ ملک کے مفاد میں جو بھی فیصلہ کرے گی تمام سیاسی پارٹیاں اس کے ساتھ کھڑی ہوں گی۔”
بی جے ڈی ایم پی سسمیت پاترا نے کہا، “بی جے ڈی نے اس آل پارٹی میٹنگ میں اپنے خیالات کی نمائندگی کی۔ ہم حکومت سے اس بہیمانہ حملے کے مجرموں کو انصاف کے کٹہرے میں لانے کو یقینی بنانے کے لیے تمام ضروری اقدامات کرنے کی اپیل کرتے ہیں۔ بیجو جنتا پارٹی نے ملک کی قومی سلامتی سے متعلق تمام کوششوں میں حکومت کے ساتھ اپنے مکمل تعاون اور حمایت کا اعادہ کیا۔۔
اے آئی ایم آئی ایم کے سربراہ اسد الدین اویسی نے کہا، “مرکزی حکومت اس ملک کے خلاف کارروائی کرسکتی ہے جو دہشت گرد گروپوں کو پناہ دیتا ہے۔ بین الاقوامی قانون بھی ہمیں اپنے دفاع میں پاکستان کے خلاف فضائی اور بحری ناکہ بندی کرنے اور ہتھیاروں کی فروخت پر پاکستان پرپابندی لگانے کی بھی اجازت دیتا ہے۔ بیسرن گھاس کے میدان میں سی آر پی ایف کو کیوں تعینات نہیں کیا گیا؟ فوری ردعمل کی ٹیم کو وہاں پہنچنے میں کیوں ایک گھنٹہ لگا اور انہوں نے لوگوں کو ان کا مذہب پوچھ کر گولی مار دی۔”
مسٹر اویسی نے مطالبہ کیا کہ کشمیریوں اور کشمیری طلباء کے خلاف جھوٹے پروپیگنڈے کو روکا جائے۔ انہوں نے کہا کہ دہشت گردوں نے جس طرح لوگوں سے ان کا مذہب پوچھ کر قتل کیا میں اس کی مذمت کرتا ہوں۔ یہ بہت اچھی بات ہے کہ سندھ طاس معاہدہ معطل ہوا لیکن ہم پانی کہاں رکھیں گے ہم مرکزی حکومت کے فیصلے کی حمایت کریں گے۔ یہ کوئی سیاسی معاملہ نہیں ہے۔
سماج وادی پارٹی کے پروفیسر رام گوپال یادو نے بھی حکومت کے کسی بھی اقدام کی حمایت کا اعلان کیا اور سوشل میڈیا پر تفرقہ انگیز پیغامات اور جموں و کشمیر کے لوگوں کے خلاف پروپیگنڈے پر پابندی لگانے کا مطالبہ کیا۔
یواین آئی۔الف الف
