نئی دہلی، حکومت ہند نے پاکستان کے حمایت یافتہ سوشل میڈیا اکاونٹس کے اس دعوے کی تردید کی ہے کہ پہلگام دہشت گردانہ حملے کے بعد فوج کی شمالی کمان کے کمانڈر لیفٹیننٹ جنرل سچندرا کمار کو ہٹا دیا گیا ہے۔
وزارت اطلاعات و نشریات کے پریس انفارمیشن بیورو ( پی آئی بی ) نے آج سوشل میڈیا پلیٹ فارم ایکس پر ایک پوسٹ میں کہا کہ پاکستان کے زیر اہتمام سوشل میڈیا اکاؤنٹس سے غلط اور گمراہ کن پروپیگنڈہ پھیلایا جا رہا ہے۔
پی آئی بی نے کہا ہے کہ لیفٹیننٹ جنرل سچندرا کمار کو نہیں ہٹایا گیا ہے اور وہ آج یعنی 30 اپریل کو ریٹائر ہو رہے ہیں اور ان کی جگہ لیفٹیننٹ جنرل پرتیک شرما کو شمالی کمان کا نیا سربراہ مقرر کیا گیا ہے۔
پی آئی بی نے منگل کو یہ کہتے ہوئے بھی پوسٹ کیا تھا کہ پاکستان کے حمایت یافتہ سوشل میڈیا اکاؤنٹس پہلگام دہشت گردانہ حملے کے بعد سے جان بوجھ کر جھوٹا اور گمراہ کن پروپیگنڈہ پھیلا رہے ہیں۔
یو این آئی ۔ ع خ
