دہلی میں کورونا کے نئے مریضوں کے بڑھنے کا دھیرے دھیرے سلسلہ جاری

گزشتہ 24 گھنٹوں کے دوران قومی دارالحکومت دہلی میں کووڈ 19 کے 85 نئے کیس رپورٹ ہوئے ہیں اور 83 لوگ اس وبا سے صحت یاب ہوئے ہیں۔ اس سے یہ واضح اشارہ ہے کہ دہلی میں کورونا کے جو نئے معاملوں کا رجحان شروع ہوا تھا اس میں تبدیلی آئی ہے اور اب رجحان میں اضافہ نظر آ رہا ہے۔

ہفتے کے روز دارالحکومت میں کورونا انفیکشن کے 58 کیسز کی تصدیق ہوئی جبکہ اتوار کو 85 نئے کیسز رپورٹ ہوئے۔ کل ایک اور مریض کی کورونا انفیکشن سے موت ہوگئی۔ دارالحکومت میں فعال کیسز کی تعداد بڑھ کر 582 ہوگئی ہے۔

گزشتہ 24 گھنٹوں کے دوران کورونا انفیکشن کے 85 نئے کیسز سامنے آنے کے بعد متاثرہ افراد کی کل تعداد بڑھ کر 1436350 ہوگئی اور مزید ایک مریض کی موت کی وجہ سے اموات کی تعداد بڑھ کر 25054 ہوگئی۔ اموات کے لحاظ سے دہلی ملک میں چوتھے نمبر پر ہے۔

محکمہ صحت کی جانب سے جاری کردہ بلیٹن کے مطابق دارالحکومت میں انفیکشن کی شرح بڑھ کر 0.12 فیصد ہوگئی ہے اور اموات کی شرح 1.74 فیصد پربرقرارہے۔ دارالحکومت میں انفیکشن کی بڑھتی ہوئی شرح ایک مسئلہ بن سکتی ہے۔

دہلی میں اس عرصے کے دوران کورونا وائرس وبا کے انفیکشن سے مزید 83 مریضوں کی صحت یابی کے بعد اس سے چھٹکارا پانے والے افراد کی کل تعداد بڑھ کر 1410714 ہوگئی ہے۔

دہلی میں پچھلے 24 گھنٹوں کے دوران 72447 نمونوں کی جانچ کی گئی، جس میں آرٹی پی سی کے 50319 نمونے اورریپڈ ایٹیجن نمونوں کی تعداد 22128 ہے۔ دارالحکومت میں اب تک کل ایک کروڑ سے زائد افراد کوکورونا کی ویکسین لگ چکی ہے۔ گزشتہ 24 گھنٹوں کے دوران دارالحکومت میں 83049 افراد کو کورونا وائرس کاٹیکہ لگایا گیا، جن میں سے کورونا ویکسین کی پہلی ڈوز لینےوالوں کی تعداد 20179 اور دوسری ڈوز لینے والوں کی تعداد 62870 رہی۔ دہلی میں ہوم آئسولیشن میں رہنے والوں کی تعداد 172 ہے۔

واضح رہے کہ کورونا کی دوسری لہر کے دوران دہلی میں 20 اپریل کو ایک ہی دن میں انفیکشن کے سب سے زیادہ 28395 معاملے سامنے آئے تھے۔

اس خبر پر اپنی رائے کا اظہار کریں