گورکھپور میں سیاحوں کی گاڑی کھائی میں گرجانے سے دو بھائیوں کی موت، پانچ زخمی

نینی تال، اتر پردیش کے گورکھپور سے نینی تال کی سیر کرنے آئے سیاحوں کی کار اتوار کی دیر رات گہری کھائی میں گرجانے سے دو بھائیوں کی المناک موت ہو گئی جبکہ کنبہ کے پانچ دیگر افراد زخمی ہو گئے۔

کالاڈونگی پولیس اسٹیشن کے سربراہ نندن سنگھ راوت کے مطابق گورکھپور کے بارگدوا کے رہنے والے پریم چند سریواستو اپنے پورے کنبہ کے ساتھ نینی تال گھومنے آئے تھے۔ اتوار کی رات تقریباً 11.30 بجے واپس جاتے وقت ان کی کار نینی تال-کالاڈونگی روڈ پر پریا بینڈ کے نزدیک گہری کھائی میں گر گئی۔

کار میں سات افراد سوار تھے۔ حادثے کی اطلاع ایک گاڑی ڈرائیور نے پولیس کو دی۔ اس کے بعد کالاڈونگی کے علاقائی افسر بی ایل بھکونی پولیس اور ریاستی ڈیزاسٹر مینجمنٹ فورس کے اہلکاروں کے ساتھ موقع پر پہنچے۔

رات کے اندھیرے میں راحت اور بچاؤ کا کام کیا گیا۔ تمام کو بمشکل کھائی سے نکالا گیا۔ اس حادثے میں دو بھائی راہل سریواستو اور راجیو شریواستو کی موقع پر ہی موت ہو گئی جبکہ پریم چندر سریواستو، ان کی بیوی رانی سریواستو، آکاش سریواستو، شالو شریواستو اور مسٹھی زخمی ہو گئے۔

پولیس کی جانب سے تمام زخمیوں کو رات ہی ہلدوانی کے سشیلا تیواری اسپتال میں داخل کرایا گیا ہے۔

مسٹر راوت کے مطابق حادثہ انتہائی دور دراز ہونے کی وجہ سے آج صبح تقریباً 6 بجے تک راحت اور بچاؤ کا کام چلایا گیا۔

پنچنامے کی کارروائی کے بعد لاشوں کو پوسٹ مارٹم کے لیے بھیج دیا گیا ہے۔ تمام افراد کا تعلق ایک ہی کنبہ سے ہے۔ مسٹر راوت کے مطابق حادثے کی وجہ کا پتہ نہیں چل سکا ہے۔

یواین آئی۔ م ع۔ 1530

اس خبر پر اپنی رائے کا اظہار کریں