صرف عام شہریوں پر حملہ نہیں بلکہ ملک کی رُوح پرحملہ
ہندوستان ہر دہشت گرد اور اُن کے پشت پناہوں کی شناخت کرکے اُنھیں سزا دے گا: مودی
سری نگر: جے کے این ایس : جموں و کشمیر کے سیاحتی مقام پہلگام کی مضافاتی وادی بائسیران میں منگل کو ہوئے خوفناک دہشت گردانہ حملے میں 25سیاحوں اور ایک کشمیری کی ہلاکت کے2 دن بعد وزیر اعظم نریندر مودی نے ایک سخت پیغام دیتے ہوئے جمعرات کو کہا کہ بھارت ہر دہشت گرد اور ان کی پشت پناہی کرنے والوں کی شناخت کرے گا اور انہیں سخت سزا دی جائے گی۔ وزیر اعظم مودی نے کہا کہ ہندوستان ہر دہشت گرد اور ان کے حمایتیوں کی شناخت کرے گا، ان کا سراغ لگائے گا اور سزا دے گا جو پہلگام حملے کے پیچھے ہیں۔جے کے این ایس مانٹرینگ ڈیسک کے مطابق جمعرات کو بہارکے مدھوبنی علاقے میں ایک عوامی اجتماع سے خطاب کرتے ہوئے وزیراعظم مودی نے دہشت گردوں کا زمین کے آخر تک پیچھا کرنے کا عزم کیا۔ انہوں نے کہا کہ ہندوستان اس وقت تک آرام سے نہیں بیٹھے گا جب تک اس حملے کے ذمہ داروں کو انصاف کے کٹہرے میں نہیں لایا جاتا۔ وزیراعظم مودی نے کہاکہ ہندوستان ہر دہشت گرد اور ان کے پشت پناہوں کی شناخت کرے گا، ان کا سراغ لگائے گا اور سزا دے گا۔انہوں نے یہ بھی کہا کہ یہ حملہ صرف عام شہریوں پر حملہ نہیں تھا بلکہ ملک کی روح پر کاری ضرب ہے۔ وزیراعظم مودی نے کہا کہ یہ ملک کی روح پر حملہ ہے، نہ صرف غیر مسلح سیاحوں پر۔وزیر اعظم نے یہ بھی یقین دلایا کہ حکومت زخمیوں کی طبی دیکھ بھال کو یقینی بنانے کےلئے اقدامات کر رہی ہے۔ انہوں نے کہا کہ ہم زخمیوں کے بہترین علاج کو یقینی بنانے کی کوشش کر رہے ہیں۔ وزیراعظم مودی نے کہا کہ اس واقعہ سے ملک بھر میں شدید غم و غصہ پایا جاتا ہے۔
انہوںنے کہاکہ کشمیر کے واقعے پر پوری قوم غمزدہ ہے، ہندوستان بھر کے لوگ ہلاک ہونے والوں کے لواحقین کے ساتھ کھڑے ہیں، دکھ سب کے ساتھ ہیں۔کسی بھی ملک کا براہ راست نام لیے بغیر وزیراعظم مودی نے حملہ کرنے والوں کو سخت انتباہ جاری کیا۔ انہوں نے کہا کہ میں قوم کو یقین دلاتا ہوں کہ جنہوں نے یہ حملہ کیا اور جنہوں نے ان کی مدد کی، انہیں ایسا جواب دیا جائے گا جس کا انہوں نے سوچا بھی نہیں تھا۔ وزیراعظم مودی نے کہاکہ دہشت گردی سے ہندوستان کا جذبہ کبھی نہیں ٹوٹے گا، دہشت گردوں کو سزا نہیں ملے گی۔انہوںنے مزیدکہاکہ ہم پہلگام حملے میں ملوث دہشت گردوں اورمنصوبہ سازوں کو ان کی سوچ سے بھی پرے سزا دیں گے۔وزیر اعظم نے انگریزی میں اپنے مختصر ریمارکس میں کہا کہ ہر وہ شخص جو انسانیت پر یقین رکھتا ہے ہمارے ساتھ ہے۔ انہوںنے کہاکہ میں مختلف ممالک کے لوگوں اور ان رہنماو ¿ں کا شکریہ ادا کرتا ہوں جو اس وقت ہمارے ساتھ کھڑے ہیں۔قبل ازیں، وزیر اعظم مودی اور قومی پنچایتی راج ڈے پروگرام کے لئے یہاں جمع ہونے والے ایک بڑے ہجوم نے جموں و کشمیر کے پہلگام میں دہشت گردانہ حملے کے متاثرین کو خراج عقیدت پیش کرنے کے لیے چند لمحوں کے لیے خاموشی اختیار کی۔اپنی تقریر شروع کرنے سے پہلے، وزیراعظم مودی نے اجتماع پر زور دیا کہ وہ پہلگام میں اپنی جانیں گنوانے والے ہمارے خاندان کے افراد کے احترام کے طور پر خاموشی اختیار کریں۔
