اب آدھار، پین اور راشن کارڈ سے ثابت نہیں ہوگی شہریت
صرف ووٹر شناختی کارڈ یا پاسپورٹ ہونگے شہریت کے ثبوت ،دہلی میں عمل درآمد
سری نگر: جے کے این ایس : اب آدھار کارڈ، پین کارڈ یا راشن کارڈ جیسے دستاویزات خود کو ہندوستانی شہری ثابت کرنے کےلئے درست نہیں ہوں گے۔ دہلی پولیس کی ہدایات کے مطابق صرف ووٹر شناختی کارڈ یا پاسپورٹ کو ہندوستانی شہریت کا ثبوت سمجھا جائے گا۔جے کے این ایس مانٹرینگ ڈیسک کے مطابق یہ فیصلہ مرکزی حکومت کی ہدایات پر لیا گیا ہے، جس کا مقصد بڑھتی ہوئی غیر قانونی دراندازی کو روکنا ہے۔ اس کے علاوہ برتھ یعنی پیدائش سرٹیفکیٹ اور ڈومیسائل یعنی سکونت سرٹیفکیٹ کو حکومت ہند شہریت ثابت کرنے کےلئے بنیادی دستاویزات مانتی ہے۔قوانین میں تبدیلی کی وجوہات:دہلی میں غیر قانونی طور پر مقیم غیر ملکی شہریوں کےخلاف مہم کو اب تیز کر دیا گیا ہے۔ گزشتہ سال سے جاری تصدیقی مہم کے دوران، دہلی پولیس نے پایا کہ بنگلہ دیشی اور روہنگیا دراندازیوں کی ایک بڑی تعداد آدھار، پین اور راشن کارڈ کی مدد سے خود کو بھارتی شہری ظاہر کر رہی ہے۔ بہت سے معاملات میں وہ یو این ایچ سی آر کی طرف سے جاری کردہ پناہ گزین کارڈ لے کر بھی پائے گئے۔ اس سے اصلی اور نقلی میں فرق کرنا مشکل ہو گیا۔ ایسے میں مرکزی حکومت کے نئے احکامات کے مطابق بھارتی شہریت کے لیے اب ووٹر آئی ڈی اور پاسپورٹ کو حتمی ثبوت ماننے کا فیصلہ کیا گیا ہے۔
حکومت کے نئے احکامات کے بعد دہلی پولیس نے تمام اضلاع کے ڈی سی پیز کو حکم دیا ہے کہ وہ اپنے علاقے میں رہنے والے مشکوک غیر ملکی شہریوں کی شناخت کریں اور ان پر کڑی نگرانی رکھیں۔ دہلی میں موجود تقریباً 3500 پاکستانی شہریوں میں سے اب تک400 سے زیادہ کو واپس بھیج دیا گیا ہے۔ واضح رہے کہ مسلم شہریوں کے خلاف خصوصی کارروائی کی جا رہی ہے جبکہ ہندو پناہ گزینوں کو طویل مدتی ویزا کے تحت ریلیف دیا گیا ہے۔آدھار، پین اور راشن کارڈ شہریت کا ثبوت کیوں نہیں:ہندوستان کی منفرد شناختی اتھارٹی(The Unique Identificatio Authority of India)آدھار کارڈ کو شناخت اور رہائش کا ثبوت مانتی ہے، لیکن شہریت کا نہیں۔ پین اور راشن کارڈ پر بھی یہی قانون لاگو ہوتا ہے۔ پین کارڈ ٹیکس کے مقاصد کو پورا کرتے ہیں اور راشن کارڈ کھانے کی تقسیم کے لیے استعمال کیے جاتے ہیں، ان میں سے کوئی بھی دستاویز شہریت کی تصدیق نہیں کرتا ہے۔حکومت برتھ یعنی پیدائش سر ٹیفکیٹ اور ڈومیسائل یعنی سکونت سر ٹیفکیٹ کو ہندوستانی شہریت کی نشاندہی کرنے والے بنیادی دستاویزات مانتی ہے۔
سرٹیفائنگ برتھ اینڈ ڈیتھ ایکٹ1969، مجاز حکام کو برتھ سر ٹیفکیٹ جاری کرنے کی صلاحیت فراہم کرتا ہے، جو ہندوستان میں پیدائش کے دعووں کی بنیاد پر شہریت کی توثیق کرتا ہے۔ڈومیسائل سر ٹیفکیٹ اس بات کی توثیق کرتے ہیں کہ کوئی شخص کسی مخصوص ریاست یا مرکز کے زیر انتظام علاقے میں مقیم ہے، جو ہندوستانی شہریت رکھنے کے دعووں کو مزید ثابت کرتا ہے۔بھارت کے ویزا پالیسی میں تبدیلی:پہلگام دہشت گردانہ حملے کے بعد بھارت سرکارنے بڑا قدم اٹھاتے ہوئے پاکستانی شہریوں کے ویزے منسوخ کرنے کا عمل شروع کر دیا ہے۔ صرف سفارتی، طبی اور طویل مدتی ویزوں کو کسی حد تک استثنیٰ دیا گیا ہے تاہم میڈیکل ویزے بھی29 اپریل کے بعد کالعدم ہو گئے ہیں۔ دہلی پولیس اور انٹیلی جنس ایجنسیوں کو تمام پاکستانی شہریوں کی فہرست تیار کرنے اور انہیں پاکستان واپس بھیجنے کا نوٹس جاری کرنے کا حکم دیا گیا ہے۔مستقبل میں اس پالیسی کو دیگر ریاستوں میں بھی لاگو کیا جا سکتا ہے۔
