پولیس کی جانب سے کیس درج،تحقیقات شروع
سرینگر: جموں و کشمیر میں فوج وفورسز کے 2 اہلکاروں نے دو الگ الگ مقامات سے خود کشی کرکے اپنی زندگیوں کا خاتمہ کیا ہے۔اس دوران پولیس نے دونوں واقعات کے حوالے سے کیس درج کر کے تحقیقات شروع کی ہے۔
کشمیر نیوز سروس (کے این ایس) کے مطابق ضلع پلوامہ کے کھریو میں تعینات ساشاسترا سیما بال (ایس ایس بی)کے اشوک کمار نامی 58 سالہ سب انسپکٹر نے اتوار کے روز خودکشی کرلی۔سب انسپکٹر ہماچل پردیش کا رہائشی ہے۔ ایک پولیس افسر نے تصدیق کی کہ اشوک کمار نے خودکشی کی ہے۔
اس دوران فوج کے ایک اوراہلکار لانس نائک اشیش کمار نے ضلع پونچھ کے علاقے بلنوئی منکوٹ میں اپنی سروس رائفل سے خود کو گولی مار کر خودکشی کی، جس سے جموں وکشمیر میں جنوری 2007سے خودکشی کرنے والے بھارتی فوجیوں اور پولیس اہلکاروں کی تعداد بڑھ کر 454ہوگئی ہے۔
فوج کے ایک عہدیدار نے میڈیا سے گفتگو میں 8گڑھوال یونٹ سے تعلق رکھنے والے لانس نائک کی خودکشی کی تصدیق کی ہے۔اشیش کمار کو شدید زخمی حالت میں ہسپتال منتقل کیاگیا جہاں ڈاکٹروں نے اسے مردہ قراردیا۔بارہمولہ ضلع میں اوری کے علاقے پولیس پوسٹ بونیار میں ایک فوجی جوان لاپتہ ہوگیا ہے۔ لاپتہ سپاہی جو اتر پردیش کا رہنے والا ہے آخری بار ٹی سی پی چلہ کے قریب دیکھا گیا تھا۔
