انتظامیہ عوامی مسائل میں اضافہ کرنے کی مرتکب
سرینگر: نیشنل کانفرنس کے سینئر لیڈر اور سینئر نائب صدر صوبہ محمد سعید آخون نے کہا ہے کہ موجودہ گورنر انتظامیہ نے لوگوں کے مشکلات کا ازالہ کرنے کے بجائے روز مرہ کے مسائل میں اضافہ کردیا ہے ۔
سڑکوں کی ناگفتہ بہہ صورتحال پر تشویش کا اظہار کرتے ہوئے پارٹی لیڈر نے کہا کہ شہر و دیہات کی سڑکیں کھنڈرات میں تبدیل ہوگئیں ہیں ، جگہ جگہ گھڑے ہونے کی وجہ سے گاڑیوں کی آمد و رفت متاثر ہوتی ہے اور بارشوں کے دوران ان جگہوں پر پانی جمع ہونے سے لوگوں کے عبور و مرور میں بھی مشکلات پیدا ہوتیں ہیں ۔
کے این ایس کے مطابق انہوں نے کہا کہ بدقسمتی سے گذشتہ 2سال سے نہ تو سڑکوں کی تعمیر کیلئے کام ہورہے ہیں ، نہ کہیں تار کول بچھایا جارہا ہے ، صرف کہیں کہیں مرمت کا کام کیا جارہا ہے جو کچھ ہی دنوں کے بعد ناقص میٹریل کی وجہ سے واپس وہی صورت اختیار کرلیتا ہے ۔
ان باتوں کا اظہار انہوں نے آج پارٹی ہیڈکوارٹر پر ایک اجلاس سے خطاب کرتے ہوئے کیا ۔ اجلاس میں ضلع صدر سرینگر پیر آفاق احمد، پارٹی لیڈران صبیہ قادری، سید توقیر احمد، ڈاکٹر سعید احمد مخدومی اور دیگر عہدیدداران بھی موجود تھے ۔
اجلاس سے خطاب کرتے ہوئے مقررین نے جموں وکشمیر کی اقتصادی بدحالی، غیر یقینی صورتحال اور خوف و دہشت کے ماحول پر تشویش کا اظہار کیا اور انتظامیہ میں انتشار اور خلفشار سے زمینی سطح پر لوگوں کو درپیش مسائل و مشکلات پر بھی زبردست برہمی کا اظہار کیا ۔ مقررین نے عارضی ملازمین کی فوری مستقلی اور دیگر مانگوں کو پورا کرنے کا بھی مطالبہ کیا ۔
ادھرنیشنل کانفرنس ڈاکٹر فاروق عبداللہ اور نائب صدر عمر عبداللہ نے معروف ٹریڈ یونین لیڈر اور عوام دوست شخصیت خواجہ غلام محمد بٹ المعروف ہمدرد;207; کے انتقال پر گہرے صدمے کا اظہار کیا ہے ۔ کے این ایس کے مطابق انہوں نے اس سانحہ ارتحال پر مرحوم کے جملہ سوگوران کیساتھ دلی تعزیت کی اور مرحوم کی جنت نشینی کیلئے دعا کی ۔ لیڈران نے سابق ضلع صدر خواتین ونگ فاطمہ زوجہ اسد اللہ وانی چکن بڈگام کے انتقال پر بھی گہرے صدمے کا اظہار کیا اور مرحومہ کی جنت نشینی کیلئے دعا کی ۔
کے این ایس کے مطابق پارٹی جنرل سکریٹری علی محمد ساگر، معاون جنرل سکریٹری ڈاکٹر شیخ مصطفےٰ کمال، صوبائی صدر ناصر اسلم وانی، سینئرلیڈران عبدالرحیم راتھر ،ترجمان اعلیٰ آغا سید روح اللہ مہدی، خواتین ونگ کی ریاستی صدر شمیمہ فردوس اور صدرِ صوبہ خواتین ونگ انجینئر صبیہ قادری نے بھی مرحومین کے پسماندگان کیساتھ تعزیت کیا اظہار کی اور اُن کی جنت نشینی کیلئے دعا کی
