سری نگر (یو این آئی): سرحدی ضلع کپواڑہ سمیت شمالی کشمیر کے متعدد علاقوں میں موسلا دھار بارشوں کے بیچ زور دارژلہ بھاری ہوئی جس وجہ سے کھڑی فصلوں اور میوہ باغات کو شدید نقصان پہنچا ہے۔
یواین آئی اردو کے نامہ نگار نے بتایا کہ پیر کی سہ پہر کو پانچ بجے کے قریب سرحدی ضلع کپواڑہ میں موسم نے کروٹ لی جس دوران تیز آندھی کے ساتھ زور دار ڑالہ بھاری شروع ہوئی۔
موصولہ اطلاعات کے مطابق کپواڑہ کے پیٹھ واری نوگام، ریشواری، ہائی ہامی، ماور بالا، لاوسہ، قلم آباد، آڈورہ، شاٹھ گنڈ بالا، درنگرسو کے ساتھ ساتھ دیگر علاقوں میں قریباً دس منٹ تک شدید ژالہ بھاری جاری رہی جس وجہ سے دھان کی فصلوں، میوہ باغات اور سبزی باغوں کو کافی نقصان پہنچا ہے۔
ہندواڑہ کے قاضی آباد اور راجوار میں شدید ڑالہ بھاری کی اطلاعات موصول ہوئی ہے۔شمالی ضلع بارہ مولہ کے پٹن علاقے سے نمائندے نے اطلاع دی ہے کہ سہ پہر چھ بجے کے قریب تیز آندھی کے بعد ژالہ بھاری شروع ہوئی جس کے نتیجے میں لوگ گھروں میں محصور ہو کررہ گئے۔
انہوں نے بتایا کہ پٹن کے ماگرے پورہ، شر بوگ، ٹینگ پورہ، گول، سلطان پورہ، گوشہ بوگ، لولی پورہ، ڑندر ہامہ، اندر گام اور ملحقہ علاقوں میں شدیدژالہ بھاری سے سیب کے باغات کو نقصان پہنچا ہے۔
نامہ نگار کا کہنا ہے آدھے گھنٹے تک مذکورہ علاقوں میں شدید ڑالہ بھاری اور موسلا دھار بارشوں کے نتیجے میں باغات ریگستان کا منظر پیش کر نے لگیں اور اس طرح سے کسانوں اور باغ مالکان کی سال بھر کی کمائی پر پانی پھیر گیا۔
