سری نگر، (یو این آئی): محکمہ موسمیات کی پیش گوئی کے مطابق وادی کشمیر میں عید الفطر کے موقع پر بارشیں ہونے کا امکان ہے۔
متعلقہ محکمے کے ایک ترجمان کے مطابق وادی میں اگلے چوبیس گھنٹوں کے دوران موسم مجموعی طور پرخشک رہ سکتا ہے۔
انہوں نے کہا کہ بعد ازاں وادی میں 3 مئی سے 5 مئی تک گرج چمک کے ساتھ بارشیں ہونے کا امکان ہے۔
ان کا مزید کہنا تھا کہ اس کے بعد موسم میں بتدریج بہتری متوقع ہے۔
ادھر وادی میں خشک موسم کے بیچ شبانہ درجہ حرارت معمول سے زیادہ درج ہوا ہے۔گرمائی دارلحکومت سری نگر میں کم سے کم درجہ حرارت 14.0 ڈگری سینٹی گریڈ ریکارڈ کیا گیا جو معمول سے4.3 سینٹی گریڈ زیادہ ریکارڈ ہوا تھا۔
وادی کے شہرہ آفاق سیاحتی مقام گلمرگ میں کم سے کم درجہ حرارت9.0 ڈگری سینٹی گریڈ ریکارڈ کیا گیا جو معمول سے4.7 ڈگری سینٹی گریڈ زیادہ تھا۔
وادی کے دوسرے مشہور سیاحتی مقام پہلگام میں کم سے کم درجہ حرارت6.7 ڈگری سینٹی گریڈ ریکارڈ کیا گیا جو معمول سے1.8 ڈگری سینٹی گریڈ زیادہ تھا۔
سرحدی ضلع کپوارہ میں کم سے کم درجہ حرارت11.4 ڈگری سینٹی گریڈ ریکارڈ کیا گیا جو معمول سے3.0 ڈگری سینٹی گریڈ زیادہ ریکارڈ ہوا تھا۔
گیٹ وے آف کشمیر کے نام سے مشہور قصبہ قاضی گنڈ میں کم سے کم درجہ حرارت10.6 ڈگری سینٹی گریڈ ریکارڈ کیا گیا جو معمول سے2.1 ڈگری سینٹی گریڈ زیادہ تھا۔
دریں اثنا وادی میں پیر کے روز صبح سے ہی موسم نہ صرف خشک رہا بلکہ کھلی دھوپ بھی چھائی رہی جس کے بیچ لوگوں کو عید خریداری میں مصروف و مشغول دیکھا گیا۔
وادی میں امسال ماہ مارچ اور ماہ اپریل میں معمول سے بہت کم بارشیں ریکارڈ ہوئی ہیں جس سے کسان طبقہ کے لوگوں میں گوناگوں خدشات پائے جا رہے ہیں۔
حکام نے شمالی کشمیر کے ضلع بارہمولہ کے درجنوں دیہات کے کسانوں کو امسال دھان کی فصل کاشت کرنے اجتناب کرنے کی پہلے ہی صلاح دی ہے۔ماہرین موسمیات کے مطابق جموں وکشمیر میں امسال ماہ مارچ میں بارش کی 80 فیصد کمی درج ہوئی ہے۔
گرمائی دارلحکومت سری نگر میں ماہ مارچ میں مجموعی طور پر 21.3 بارش ریکارڈ کی گئی جو معمول کیمطابق 117.6 ملی میٹر ریکارڈ ہونی چاہئے تھی۔
اسی طرح سرمائی دارلحکومت جموں میں ماہ مارچ میں مجموعی طور پر ملی میٹر بارش ریکارڈ ہوئی جو معمول کے مطابق 68 ملی میٹر درج ہونی چاہئے تھی۔
