سری نگر، صوبائی کمشنر کشمیر وجے کمار بدھوری نے ہفتے کے روز کہا کہ انتظامیہ شہر خاص کی شان رفتہ کو بحال کرنے کے لئے وسیع پیمانے پر کام کر رہی ہے۔انہوں نے کہا کہ حبہ کدل کا برج لوگوں کی تفریح کے لئے ایک اور جگہ بن جائے گا جہاں لوگ شام کو جمع ہو کر لطف اندوز ہوسکتے ہیں۔
موصوف صوبائی کمشنر نے ان باتوں کا اظہار ہفتے کو یہاں نامہ نگاروں کے ساتھ بات کرنے کے دوران کیا:انہوں نے کہا’جب ہم جی ٹونٹی اجلاس کے دوران سمارٹ سٹی کی تیاریاں کر رہے تھے تو کچھ لوگ کہتے تھے کہ شہر خاص کو نظر انداز کیا جا رہا ہے’۔انہوں نے کہا: ‘انتظامیہ شہر خاص کی شان رفتہ کو بحال کرنے کے لئے سرعت سے کام کر رہی ہے’۔
مسٹر بدھوری نے کہا کہ سی ای او اطہر عامر خان کی قیادت میں سمارٹ سٹی پروجیکٹ کے تحت سری نگر میں اچھا کام انجام دیا گیا۔انہوں نے کہا کہ حبہ کدال کا پل لوگوں کی تفریح کے لئے ایک اور جگہ بن جائے گا جہاں لوگ شام کو جمع ہو کر لطف اندوز ہوسکتے ہیں۔ان کا کہنا تھا کہ سری نگر میں تمام پروجیکٹوں پر کام تیزی سے ہو رہے ہیں۔
صوبائی کمشنر نے کہا کہ قمر واری کے سیمنٹ برج کو اگلے سیشن تک مکمل کیا جائے گا۔
جنگلات میں آتشزدگی کے بارے میں پوچھے جانے پر انہوں نے کہا کہ موسم خشک ہے جس سے ایسی واردات رونما ہوتی ہیں۔انہوں نے کہا کہ تین جگہوں سے ہمیں ایسی رپورٹس موصول ہوئی ہیں جن میں فوری کارروائی کی گئی ہے۔
یو این آئی ایم افضل
