سری نگر، پولیس نے وسطی کشمیر کے ضلع گاندربل میں چوری کے ایک معاملے کو کچھ گھںٹوں کے اندر ہی حل کرکے دو ملزموں کو گرفتار کرکے چوری شدہ زیورات اور نقدی رقم کو ضبط کیا ہے۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس اسٹیشن گاندربل کو گذشتہ روز ایک اطلاع موصول ہوئی جس میں کہا گیا کہ کچھ نا معلوم چور غلام محمد صوفی ولد نور الدین صوفی ساکن پتی پورہ سلورہ میں گھس گئے اور کچھ زیورات اور نقدی رقم اڑا لے گئے۔
انہوں نے کہا کہ اس شکایت پر متعلقہ دفعات کے تحت ایک کیس درج کرکے تحقیقات شروع کی گئیں۔
بیان میں کہا گیا: ‘ایس ایس پی گاندربل سندیپ گپتا کی ہدایات پر فوری کارروائی کرتے ہوئےایک خصوصی تحقیقاتی ٹیم تشکیل دی گئی’۔
انہوں نے کہا کہ انتھک کاوشوں کے بعد تحقیقاتی ٹیم نے تکنیکی ان پٹس اور سی سی ٹی وی فوٹیج کی مدد سے دو افراد کو دھر لیا۔
بیان میں گرفتار شدگان کی شناخت عمران اسماعیل بٹ ولد محمد اسماعیل بٹ اور عمر شفیع گلکار ساکنان تیل بل حضرت بل کے طور پر کی گئی ہے۔
انہوں نے کہا: ‘ابتدائی تحقیقات کے دوران گرفتار شدگان نے جرم کا اعتراف کیا اور ان کے انکشاف پر مال مسروقہ اور نقدی رقم بر آمد کی گئی’۔
بیان کے مطابق بر آمد شدہ مال مسروقہ میں ایک سونے کی انگوٹھی، ایک جوڑا ائیر رنگ، سونے کا ایک بیج اور 13 ہزار روپیے شامل ہیں۔
انہوں نے کہا کہ دونوں ملزموں کو گرفتار کیا گیا اور اس جرم کے لئے استعمال کی جانے والی گاڑی زیر رجسٹریشن نمبر JK01AT – 1953 کو بھی ضبط کیا گیا۔
یو این آئی- ایم افضل
