خبر اردو :
آرٹیکل 35Aپر جاری یلغار کا مقابلہ کرنے کی خاطر جموں وکشمیر سیول سوسائٹی کارڈینیشن کمیٹی نے ریاست جموں وکشمیر کے جملہ عوام کو متحد ہوکر مقابلہ کرنے اور 6اگست کو مکمل ہرٹال کرنے کی اپیل کی۔ انہوں نے بتایا کہ اس وقت ہمارے اتحاد کا امتحان ہے تاکہ ہم فرقہ پرستوں کی طرف سے بھنی جارہی سازشوں کا مردانہ وار مقابلہ کرتے ہوئے ریاست جموں وکشمیر کو ایک اور فلسطین بننے سے بچائیں۔
جموں وکشمیر سیول سوسائٹی کارڈینیشن کمیٹی نے سنیچر کو سرینگر کے لالہ رخ ہوٹل میں پرہجوم پریس کانفرنس نے خطاب کے دوران ریاستی عوام کو آرٹیکل 35Aکے دفاع کی خاطرآگے آنے کی اپیل کی۔ پریس کانفرنس کے دوران ریاست کے نائب مفتی ناصر الاسلام اور عوامی نیشنل کانفرنس کے صدر مظفر احمد شاہ نے آرٹیکل 35Aپر کھل کر گفتگو کی۔ انہوں نے بتایا کہ ریاست جموں وکشمیر کے آئینی تحفظ کی خاطر ریاست کے ہر شہری پر فرض عائد ہوتا ہے کہ خاموشی تماشائی کا رول ادا کرنے کے بجائے فرقہ پرستوں کی طرف سے بھنی جارہی سازشوں کا مردانہ وار مقابلہ کریں۔
انہوں نے آرٹیکل 35Aکے تحفظ کی خاطر 6اگست کو ریاست گیر ہڑتال کرنے کی اپیل کرتے ہوئے کہا کہ اس روز عوام ریاست کے آئینی تشخص پر فرقہ پرستوں کی جانب سے کاری ضرب لگانے کے خلاف بھر پور احتجاج کریں۔ انہوں نے بتایا کہ موجودہ حالات میں یہ ہماری اجتماعی ذمہ داری ہے کہ ہم بحیثیت قوم آگے آکر آرٹیکل 35Aاور دفعہ 370کا دفاع کریں۔ میڈیا سے بات کرتے ہوئے انہوں نے بتایا کہ ریاستی عوام کو بلالحاظ رنگ، نسل اور مذہب آگے آکر ریاست کے آئینی تشخص کی خاطر اقدامات اُٹھانے چاہیے۔ نائب مفتی ناصر الاسلام نے بتایا کہ اس وقت ہماری قومی اجتماعیت کا امتحان ہے، ہمیں ایک دوسرے کے ساتھ شانہ بشانہ مل کر فرقہ پرستوں کی جانب سے آرٹیکل 35Aاور دفعہ 370پر یلغار کا منہ توڑ جواب دینا ہوگا۔ انہوں نے بتایا کہ ہمیں آگے آکر سٹیٹ سبجیکٹ قانون کی حفاظت کرنی ہوگی جس کو نقصان پہنچانے کی خاطر فرقہ پرست عناصر کاری ضرب لگانے کی تاک میں بیٹھے ہوئے ہیں۔انہوں نے بتایا کہ عوام ایسی کسی بھی سازش کا ڈٹ کر مقابلہ کرے گی اور ریاست کو فلسطین بننے نہیں دیا جائے گا۔
انہوں نے بتایا کہ جس طرح اسرائیل نے فلسطین کے آئینی تشخص کے ساتھ چھیڑ کرکے بعد میں اپنی ہی سرزمین سے فلسطینیوں کو وطن بدر کردیا، اگر ریاستی عوام نے اس وقت خاموش تماشائی کا رول ادا کیا تو ہمیں بھی اپنے وطن سے باہر کردیاجائے گا۔ انہوں نے آرٹیکل 35Aاور دفعہ 370کے تحفظ کی خاطر عوام سے 6اگست کو ریاست گیر ہڑتال اور احتجاج کرنے کی اپیل کی ۔ یاد رہے آرٹیکل 35Aکا کیس فی الوقت سپریم کورٹ میں زیر سماعت ہے جس کی اگلی پیشی 6اگست کو ہونے والی ہے تاہم پیسی کی تاریخ قریب آنے کے ساتھ ہی ریاست کی سیاسی گلیاروں میں ہلچل مچی ہوئی ہے۔ ادھر جمعہ کو جامع مسجد میں عوامی اجتماع سے خطاب کے دوران حریت (ع) چیرمین میر واعظ عمر فاروق نے بھی نئی دہلی کو ہوش کے ناخن لینے کا مشورہ دیا ہے۔ انہوں نے بتایا کہ اگر آرٹیکل 35Aکے ساتھ کسی بھی قسم کی چھیڑ چھاڑ کی گئی تو لوگ سڑکوں پر آنے کے لیے تیار ہیں۔KNS
