خبراردو :
متحدہ جہاد کونسل کے چیرمین سید صلاح الدین نے پاکستان کے متوقع وزیر اعظم عمران خان کو عوام کی بھاری اکثریت حاصل ہونے پر مبارکباد پیش کی ہے۔
موصولہ بیان کے مطابق ان باتوں کا اظہار متحدہ جہاد کو نسل کے چیئرمین اور حزب المجاہدین کے سربراہ سید صلاح الدین نے متحدہ جہاد کونسل کے ایک اعلیٰ سطحی اجلاس سے خطاب کرتے ہوئے کیا۔ انہوں نے کہا کہ عمران خان نے الیکشن میں کامیابی کے فوراً بعد اپنی تقریر میں جس طرح مسئلہ کشمیر کا ذکر کیا، وہ قابل تحسین ہے۔
سید صلاح الدین نے کہا کہ نہتے کشمیری عوام پر ظلم کے پہاڑ توڑے جا رہے ہیں، بستیاں خاکستر کی جارہی ہیں، معصوم بچے اور بچیاں قتل کی جا رہی ہیں، لیکن دنیا خاموش تماشائی کی حیثیت سے دیکھ رہی ہے۔
انہوں نے متوقع وزیر اعظم پاکستان سے اپیل کی ہے کہ کشمیریوں کی آزادی کے بین الاقوامی وعدوں کی حمایت کی مہم عالمی سطح پر تیز کی جائے اور مسئلہ کشمیر کا آبرو مندانہ حل، حق خودارادیت کی بنیاد پر نکالنے کے لئے سیاسی اور سفارتی دباؤ بڑھایا جائے۔ جہاد کونسل کے چیئرمین نے واضح کیا کہ پاکستان مسئلہ کشمیر کا اہم فریق ہے اور ہم امید کرتے ہیں کہ عمران خان کی قیادت میں پاکستانی حکومت سیاسی اور سفارتی محاذ پر ٹھوس حکمت عملی اختیار کرکے اس مسئلے کے آبرومندانہ حل کے لئے اقدامات کرے گی۔KNS
