جموں،جموں وکشمیر کے ادھم پور ضلع کے بسنت گڑھ جنگلی علاقے میں بدھ کو مسلسل چوتھے روز بھی ملی ٹینٹ مخالف آپریشن جاری رہا۔
معلوم ہوا ہے کہ سیکورٹی فورسز نے کٹھوعہ میں بھی بڑے پیمانے پر تلاشی آپریشن شروع کیا ہے۔
اطلاعات کے مطابق ادھم پور کے بسنت گڑھ جنگلی علاقے میں مفرور ملی ٹینٹوں کو ڈھونڈ نکالنے کی خاطر بدھ کے روز بھی تلاشی آپریشن جاری رہا۔
ذرائع نے بتایا کہ سیکورٹی فورسز نے بسنت گڑھ، بانی، سیوج علاقوں کو بھی پوری طرح سے محاصرے میں لے کر فرار ہونے کے سبھی راستوں پر پہرے بٹھا دئے ہیں۔
انہوں نے بتایا کہ ادھم پور کے ساتھ ساتھ کٹھوعہ کے کئی علاقوں میں بھی سیکورٹی فورسز نے جگہ جگہ تلاشی آپریشن شروع کیا ہے۔
ذرائع کے مطابق مقامی لوگوں نے ادھم پور اور کٹھوعہ کے جنگلی علاقوں میں ملی ٹینٹوں کے دو گروپوں کو دیکھا ہے جس کے بعد سیکورٹی فورسز نے ایک وسیع العریض جنگلی علاقے کو محاصرے میں لے رکھا ہے۔
دفاعی ذرائع نے بتایا کہ جنگلی علاقے میں موجود دہشت گردوں کو مار گرانے کی خاطر سراغ رساں کتوں، ڈرون کیمروں کے ساتھ ساتھ ہیلی کاپٹروں کی بھی خدمات حاصل کی گئی ہے۔
انہوں نے مزید بتایا کہ سیکورٹی فورسز نے جنگلی علاقے میں کئی افراد کو دھر دبوچ کر سلاخوں کے پیچھے دھکیل دیا اور ان سے پوچھ تاچھ ہو رہی ہیں۔
ذرائع کا کہنا ہے کہ حال کے دنوں میں دہشت گردوں کے دو گروپ اس طرف آنے میں کامیاب ہوئے اور انہیں بسنت گڑھ اور کٹھوعہ کے جنگلی علاقوں میں اس وقت دیکھا گیا جب وہ چناب ویلی کی طرف جارہے تھے۔
یہاں یہ امر قابل ذکر ہے کہ اے ڈی جی پی جموں آنند جین نے منگل کے روز ادھم پور جا کر وہاں دہشت گردوں کے خلاف چلائے جارہے آپریشن کے بارے میں سینئر آفیسران سے جانکاری حاصل کی ۔
اتوار کے روز جنگلی علاقے میں ملی ٹینٹوں اور وی ڈی جی ممبران کے درمیان آمنا سامنا ہوا اس کے بعد دہشت گردوں کا کئی پر اتہ پتہ نہیں چل سکا ہے۔
یو این آئی-ارشید بٹ
