سری نگر، نیشنل کانفرنس کے نائب صدر اور سابق وزیر اعلیٰ عمر عبداللہ کا کہنا ہے کہ ملی ٹنسی پر فوج اور پولیس کی بالا دستی کو ثابت کرنے کے لئے جموں وکشمیر میں وقت پر اسمبلی انتخابات منعقد ہونے چاہئے انہوں نے کہا: ‘اگر حکومت کو حملہ کرنے والی طاقتوں کے سامنے جھکنا ہے تو وہ الیکشن مت کرائیں موصوف سابق وزیر اعلیٰ نے ان باتوں کا اظہار جمعرات کو یہاں ایک تقریب کے حاشیئے پر نامہ نگاروں کے ساتھ بات کرنے کے دوران کیا۔
انہوں نے کہا: ‘یہاں نارملسی نہیں ہے، اگر حالات سال 1996 سے بدتر ہیں تو وہ (حکومت) یہاں الیکشن مت کرائیں، اگر وہ ان طاقتوں جو یہاں حملے کر رہی ہے، کے سامنے جھکنا چاہتے ہیں تو وہ الیکشن مت کرائیں’۔
ان کا کہنا تھا: ‘اگر وہ فوج اور پولیس کی بالادستی کے بجائے ملی ٹنسی کی بالادستی کو ثابت کرنا چاہتے ہیں تو الیکشن مت کرائیں’۔
عمر عبداللہ نے کہا کہ اگر حکومت کو ہمت ہے تو یہاں الیکشن منعقد ہونے چاہئے۔
انہوں نے کہا: ‘اگر ہمت نہیں ہے، بزدل ہیں تو الیکشن مت کرائیں لیکن اگر فوج اور پولیس کی بالادستی کو ثابت کرنا چاہتے ہیں تو الیکشن کرائے جانے چاہئے’۔
ان کا کہنا تھا کہ جموں و کشمیر میں اسمبلی انتخابات وقت پر ہونے چاہئے تاکہ جموں و کشمیر کے لوگ خود اپنا فیصلہ کر سکیں۔
نیٹ کے بارے میں پوچھے جانے پر سابق وزیر اعلیٰ نے کہا: ‘نیٹ پر فیصلہ جلد سے جلد ہونا چاہئے تاکہ بچوں کے مستقبل کو در پیش خطرات کو دور کیا جا سکے’۔
انہوں نے کہا کہ بچوں کے مستقبل کے ساتھ کھلوار کرنا نا انصافی ہے۔
بھارتی کرکٹ ٹیم کا آئی سی سی چمپئینز ٹرافی کے لئے ممکنہ طور پر پاکستان نہ جانے کے بارے پوچھے جانے پر انہوں نے کہا کہ یہ کوئی نئی بات نہیں ہے۔
انہوں نے کہا: ‘ یہ کون سی نئی بات ہے دونوں ٹیمیں ایک دوسرے کے ملکوں میں میچ نہیں کھیل رہی ہیں اور یہ بی سی سی آئی کا اپنا فیصلہ ہے’۔
ان کا کہنا تھا: ‘میں ہمیشہ سے کہہ رہا ہوں کہ دونوں ممالک کے درمیان بہتر تعلقات قائم کرنے کے لئے ذمہ داری صرف ہمارے ملک کی نہیں ہے بلکہ زیادہ ذمہ داری پاکستان کی ہے’۔
عمر عبداللہ نے کہا: ‘جس طرح کے حملے ہو رہے اور جس طرح کا ماحول بنایا جا رہا ہے وہ بند ہونا چاہئے’۔
انہوں نے کہا: ‘پاکستان کو اپنا رول ادا کرنا چاہئے تاکہ دونوں ممالک کے درمیان تعلقات بہتر ہو سکیں’۔
یو این آئی- ایم افضل
