جموں، شری امرناتھ جی یاترا کا سلسلہ جوش و خروش سے جاری رہتے ہوئے جموں کے بھگوتی نگر بیس کیمپ سے ہفتے کی صبح قریب پانچ ہزار یاتریوں کا ایک اور قافلہ سخت سیکورٹی بندوبست کے بیچ کشمیر کے لئے روانہ ہوا۔
سرکاری ذرائع نے بتایا کہ بھگوتی نگر بیس کیمپ سے ہفتے کی صبح سخت سیکورٹی حصار میں 4 ہزار 6 سو 69 یاتریوں کا ایک اور قافلہ پوتر گھپا کے درشن کے لئے جنوبی کشمیر ضلع اننت ناگ کے ننون پہلگام اور وسطی کشمیر کے ضلع گاندربل کے بالتل بیس کیمپ کے لئے روانہ ہوا۔انہوں نے کہا کہ یاتریوں کا یہ سولہواں قافلہ جس میں 1 ہزار 1 سو 30 خواتین اور 23 بچے شامل تھے، 1 سو 83 چھوٹی بڑی گاڑیوں میں بم بم بولے نعروں کی گونج میں کشمیر روانہ ہوا۔ان کا کہنا تھا کہ ان میں سے 3 ہزار 39 ننون پہلگام جبکہ 1 ہزار 6 سو 30 بالتل بیس کیمپپ کے لئے روانہ ہوئے۔یاد رہے کہ جموں وکشمیر کے لیفٹیننٹ گورنر منوج سنہا نے 28 جون کی صبح 4 ہزار 6 سو 3 یاتریوں کے پہلے جتھے کو جموں کے بھگوتی نگر بیس کیمپ سے کشمیر کے لئے روانہ کیا تھا۔
وادی میں انتظامیہ، سول سوسائٹی تنظمیوں، تجارتی یونیوں اور عام لوگوں نے یاتریوں کا پرتپاک استقبال کیا۔ یاترا کو تحفظ کو یقینی بنانے کے لئے تمام تر انتطامات کئے گئے ہیں۔ جہاں یاتریوں کو تمام سہولیات و خدمات بہم پہنچانے کے لئے بہترین انتظامات کئے گئے ہیں وہیں سیکورٹی کا بھی فقید المثال بند وبست کیا گیا ہے۔ پولیس ذرائع کے مطابق یاترا روٹوں پر قریب 800 سی سی ٹی وی کیمرے نصب کئے گئے ہیں۔علاوہ ازیں سیکورٹی فورسز کی 500 اضافی کمپنیاں تعینات کی گئیں ہیں۔ ہر کمپنی کم از کم ایک سو اہلکاروں پر مشتمل ہے۔ 52 دنوں پر محیط یہ یاترا 19 اگست کو رکشا بندھن کے موقع پر اختتام پذیر ہوگی۔
یو این آئی ایم افضل
