سری نگر، کالعدم جماعت اسلامی نے شمالی کشمر کے سوپور اسمبلی حلقے پر سابق حریت لیڈر اور آزاد امید وار حاجی منظور احمد کلو کو حمایت دینے کا اعلان کیا ہے۔
یہ اعلان جماعت اسلامی کے سابق رکن غلام قادر وانی نے پیر کو سوپور میں نامہ نگاروں کے ساتھ بات کرنے کے دوران کیا۔
انہوں نے کہا: ’جماعت اسلامی ہمیشہ جمہوری عمل میں یقین رکھتی ہے اور سال 1971 سے الیکشن لڑتے آئی ہے‘۔
ان کا کہنا تھا: ’سال1987 میں یہاں مسلم یونائیٹڈ فرنٹ کے نام سے ایک فرنٹ وجود میں آیا جس میں جماعت کا کلیدی رول تھا لیکن اس وقت کی بر سراقتدار جماعت نے اس قدر دھاندلیاں کیں کہ محمد یوسف شاہ جو ایک امید وار تھا، صلاح الدین بن گیا اور اس کے بعد یہاں ملی ٹنسی شروع ہوئی اور جماعت الیکشن سے بد دل ہوگئی‘۔
موصوف سابق رکن جماعت نے کہا: ’سال 1987 کے الیکشن کے بعد جتنے بھی یہاں انتخابات ہوئے جماعت نے ان میں احتجاجاً حصہ نہیں لیا‘۔
انہوں نے کہا: ’صورتحال یہ ہوئی کہ جماعت پر پابندی عائد کر دی گئی جس کا یہ چھٹا سال ہے‘۔
ان کا کہنا تھا: ’جماعت کی شوریٰ نے ایک پینل تشکیل دی جو جماعت سے پابندی ہٹانے کے لئے تگ و دو کر رہی ہے اور مرکزی حکومت کے ساتھ بھی اس سلسلے میں بات چیت چل رہی ہے جو ابھی آخری مرحلے میں شامل نہیں ہوئی ہے‘۔
انہوں نے کہا: ’جماعت نے رواں الیکشن میں آزاد امید واروں کو سپورٹ کرنے کا فیصلہ لیا تاکہ جمہوری عمل میں جو ہمارا یقین ہے اس کا عملی مظاہرہ کیا جائے‘۔
غلام قادر نے کہا کہ جماعت نے الیکشن کو کبھی حرام قرار نہیں دیا ہے۔
انہوں نے کہا: ’جماعت جمہوری طریقہ اختیار کرکے اپنا مسائل حل کرائے گی اور جماعت پر عائد پابندی ہٹانے کے لئے بھی جمہوری طریقہ اختیار کیا جائے گا‘۔
یو این آئی – ایم افضل
