جموں، وزیر اعظم نریندر مودی کٹرہ سے کشمیر وندے بھارت ٹرین کا ماہ رواں کے تیسرے ہفتے میں ممکنہ طور پر ضلع ریاسی کے کٹرہ ریلوے اسٹیشن سے افتتاح کریں گے۔
سرکاری ذرائع نے بتایا کہ وزیر اعظم نریندر کٹرہ سے کشمیر خصوصی طور پر تیار کی گئی وندے بھارت ٹرین کا افتتاح ماہ فروری کے تیسرے ہفتے میں کریں گے۔انہوں نے کہا کہ وزیر اعظم ممکنہ طور پر اس ٹرین کا افتتاح شری ماتا ویشنو دیوی ریلوے اسٹیشن کٹرہ سے کریں گے۔
حکام نے بتایا کہ افتتاح کی عارضی تاریخ 17 فروری مقرر کی گئی ہے تاہم اس ضمن میں وزیر اعظم کے دفتر سے فی الوقت کوئی اعلان نہیں ہوا ہے۔یہ وندے بھارت ٹرین دہلی سے سری نگر تک کے 8 سو کلومیٹر فاصلے کو صرف 13 گھنٹوں میں طے کرے گی۔یہ ٹرین شری ماتا ویشنو دیوی کٹرہ سے سری نگر کے درمیان 190 کلو میٹر کے فاصلے کو محض 3 گھنٹوں میں طے کرے گی اور اس دوران یہ ٹرین بعض اہم اسٹیشنوں پر رکے گی۔اس ٹرین کو وادی کشمیر کے سرد موسمی حالات کو مدنظر رکھتے ہوئے ڈیزائن کیا گیا ہے۔
اس ٹرین میں جو کلیدی خصوصیات موجود ہیں ان میں پانی اور بائیو ٹوائلٹ ٹینک کو جمنے سے روکنے کے لیے جدید ترین حرارتی نظام، ویکیوم سسٹمز کے لیے گرم ہوا، اور زیرو زیرو درجہ حرارت میں ہموار آپریشن کے لیے بہتر ایئر بریک کی فعالیت شامل ہیں۔
علاوہ ازیں وندے بھارت ٹرین میں تمام معیاری سہولیات جیسے مکمل طور پر ایئر کنڈیشنڈ کوچز، خودکار پلگ دروازے، اور موبائل چارجنگ ساکٹ بھی موجود ہیں۔حکام کا کہنا ہے کہ وادی کشمیر کو قومی ریلوے نیٹ ورک سے جوڑ کر یہ ٹرین ادھم پور- سری نگر-ب ارہمولہ ریل لنک (یو ایس بی آر ایل) پروجیکٹ پر عالمی معیار کا سفری تجربہ ہے۔انہوں نے کہا کہ یہ پروجیکٹ جغرافیائی اور اقتصادی خلا کو ختم کرنے کے لیے ہندوستان کے عزم کو واضح کرتی ہے۔شری ماتا ویشنو دیوی کٹرا کو دہلی سے جوڑنے والے دو کامیاب راستوں کے بعد شمالی ریلوے زون کے ذریعے چلائی جانے والی یہ خطے کے لیے تیسری وندے بھارت ٹرین ہے۔قابل ذکر ہے کہ ریلوے نے 272 کلو یٹروں پر محیط اودھم پور- سری نگر- بارہمولہ ریل لنک (یو ایس بی آر ایل) پروجیکٹ کو مکمل کیا ہے۔
یو این آئی ایم افضل
