سری نگر، محکمہ موسمیات کی پیش گوئی کے عین مطابق سری نگر سمیت وادی کشمیر کے میدانی علاقوں میں پیر کو دن بھر رک رک کر بارشیں ہوئیں جس سے درجہ حرارت میں نمایاں گراوٹ درج ہوئی۔
گرمائی دارلحکومت سری اور اس کے ملحقہ علاقوں میں پیر کو رک رک کر بارشیں ہوئیں جس سے جہاں درجہ حرارت میں نمایاں گراوٹ ریکارڈ ہوئی وہیں معمولات زندگی بھی متاثر ہوئے۔
محکمہ موسمیات کے ایک ترجمان نے بتایا کہ وادی میں اگلے ایک ہفتے کے دوران موسم خراب رہنے کا امکان ہے۔
انہوں نے کہا کہ وادی میں اگلے چوبیس گھنٹوں کے دوران بھی رک رک کر بارشوں کا سلسلہ جاری رہ سکتا ہے۔
ان کا کہنا تھا کہ وادی میں 11 مارچ کو پہاڑی علاقوں میں کہیں کہیں ہلکی برف باری یا بارشوں کا امکان ہے جبکہ اس دوران میدانی علاقوں میں ہلکی بارشیں ہوسکتی ہیں۔
موصوف ترجمان نے بتایا کہ12 اور 14 مارچ کو وادی میں کئی مقامات پر ہلکی برف باری یا بارشیں متوقع ہیں جبکہ 15 اور 16 مارچ کو بھی کئی مقامات پر رک رک کر ہلکی سے درمیانی درجے کی برف باری یا بارشوں کا امکان ہے۔
انہوں نے کہا کہ بعد ازاں وادی میں 17 سے 21 مارچ تک موسم عام طور پر خشک رہنے کی توقع ہے۔
محکمے نے اپنی ایڈوائزری میں سیاحوں، مسافروں اور ٹرانسپورٹروں سے ٹریفک ایڈوائزری پر عمل کرنے کو کہا ہے جبکہ کسانوں سے کہا گیا ہے کہ وہ 10 سے 18 مارچ تک اپنے کھیت کھلیانوں اور باغوں میں آپریشنز معطل رکھنے کی صلاح دی ہے۔
علاوہ ازیں لوگوں سے ان علاقوں جہاں برفانی تودے گر آنے کے خطرات رہتے ہیں، میں جانے سے احتراز کرنے کی اپیل کی ہے۔
دریں اثنا وادی کے بیشتر مقامات پر شبانہ درجہ حرارت معمول سے 4 سے 5 ڈگری سینٹی گریڈ زیادہ ریکارڈ ہوا ہے۔
گرمائی دار لحکومت سری نگر میں کم سے کم درجہ حرارت 3.7 ڈگری سینٹی گریڈ ریکارڈ کیا گیا جو معمول سے4.7 ڈگری سینٹی گریڈ کم ریکارڈ ہوا تھا۔
وادی کے شہرہ آفاق سیاحتی مقام گلمرگ میں کم سے کم درجہ حرارت 0.5 ڈگری سینٹی گریڈ ریکارڈ کیا گیا جو معمول سے4.5 ڈگری سینٹی گریڈ زیادہ ریکارڈ ہوا تھا۔
وادی کے دوسرے مشہور سیاحتی مقام پہلگام میں کم سے کم درجہ حرارت4.6 ڈگری سینٹی گریڈ ریکارڈ کیا گیا جو معمول سے6.2 ڈگری سینٹی گریڈ زیادہ ریکارڈ ہوا تھا۔
یو این آئی – ایم افضل
