لندن، بلے باز ہیری بروک کو انگلینڈ کی نئی ون ڈے اور ٹی20 ٹیم کا کپتان مقرر کیا گیا ہے۔
26 سالہ ہیری بروک کو سفید گیند کے فارمیٹ میں جوس بٹلر کی جگہ کپتان بنایا گیا ہے۔ بٹلر نے چیمپئنز ٹرافی 2025 میں جیت نہ ملنے کے بعد اپنی ذمہ داریوں سے استعفیٰ دے دیا تھا۔ 2022 سے سفید گیند کے سیٹ اپ کا حصہ رہے بروک تمام فارمیٹس میں انگلینڈ کی بیٹنگ لائن اپ کے لیے اہم رہے ہیں۔
فی الحال آئی سی سی مردوں کی ٹیسٹ بیٹنگ رینکنگ میں دوسرے نمبر پر موجود بروک نے پچھلے ایک سال میں ون ڈے اور ٹی20 دونوں فارمیٹس میں نائب کپتان کے طور پر کام کیا ہے۔ انہوں نے بٹلر کی غیر موجودگی میں پچھلے ستمبر میں آسٹریلیا کے خلاف کپتانی کا آغاز کیا تھا۔ بروک انگلینڈ انڈر-19 کے کپتان بھی تھے، جنہوں نے 2018 کے انڈر-19 ورلڈ کپ میں انگلینڈ کی قیادت کی تھی۔
انگلینڈ کرکٹ بورڈ (ای سی بی) نے بروک کے حوالے سے کہا، “انگلینڈ کا وائٹ بال کپتان بننا واقعی اعزاز کی بات ہے۔ جب سے میں ورفڈیل میں برلے میں کرکٹ کھیلتا تھا، تب سے میں یارکشائر کی نمائندگی کرنے، انگلینڈ کے لیے کھیلنے اور شاید ایک دن ٹیم کی قیادت کرنے کا خواب دیکھتا تھا۔ اب مجھے وہ موقع ملنا میرے لیے بہت معنی رکھتاہے۔”
بروک نے کہا، “میں اپنے خاندان اور کوچز کا شکریہ ادا کرنا چاہتا ہوں جنہوں نے ہر قدم پر میرا ساتھ دیا۔ مجھ پر ان کے اعتماد نے کافی فرق ڈالا ہےاور میں ان کے بغیر اس مقام پر نہیں ہوتا۔ اس ملک میں بہت صلاحیت ہے اور میں آغاز کرنے، ہمیں آگے بڑھانے اور سیریز، ورلڈ کپ اور بڑے ایونٹس جیتنے کی سمت کام کرنے کے لیے پرجوش ہوں۔ میں آگے بڑھنے اور اپنا سب کچھ دینے کے لیے پرجوش ہوں۔”
بطور کپتان بٹلر کا دور 2022 کے مردوں کے ٹی20 ورلڈ کپ میں انگلینڈ کی فتح کے ساتھ شاندار طریقے سے شروع ہوا۔ تاہم، انگلینڈ حالیہ آئی سی سی ٹورنامنٹس میں اپنی کارکردگی کی وجہ سے سوالات کی زد میں آیا ہے۔
یواین آئی۔ م س
