صنعا، یمن کے شمالی صعدہ صوبے میں ایک حراستی مرکز پر پیر کو امریکی فضائی حملوں میں مرنے والوں کی تعداد بڑھ کر 68 ہو گئی ہے جبکہ دیگر 47 زخمی ہو گئے ہیں۔ یہ تمام افریقی تارکین وطن ہیں۔
حوثیوں کے زیرانتظام المسیرہ ٹی وی نے یہاں رپورٹ کیا کہ شمالی یمن میں ایک حراستی مرکز پر آج صبح ہونے والے امریکی فضائی حملوں میں مرنے والوں کی تعداد 68 ہو گئی ہے جبکہ دیگر 47 زخمی ہو گئے ہیں۔ حوثی باغیوں کا شمالی یمن کے بیشتر علاقوں پر کنٹرول ہے۔ ہلاک ہونے والے تمام افراد غیر قانونی افریقی تارکین وطن ہیں جنہیں شمالی یمن کے دارالحکومت صعدہ میں ایک حراستی مرکز میں رکھا گیا تھا۔
تاہم امریکی فضائی حملوں کی وجہ سے حراستی مرکز میں لگنے والی آگ کو شہری دفاع کی ٹیموں نے بجھایا۔ جس کے بعد ملبے سے تقریباً 68 لاشیں نکالی گئیں۔ زخمیوں کو اسپتال لے جایا گیا ہے۔
ٹیلی ویژن کے مطابق “حراستی مرکز پر داغا گیا ایک امریکی میزائل نہیں پھٹا۔ یہ مرکز انٹرنیشنل آرگنائزیشن فار مائیگریشن (آئی او ایم) اور انٹرنیشنل کمیٹی آف ریڈ کراس کی نگرانی میں ہے۔ اسے نشانہ بنانا ایک قطعی جنگی جرم ہے”۔
دریں اثنا، آئی او ایم کے مطابق یمن، ملک کی سالہا سال سے جاری خانہ جنگی کے باوجود، افریقہ کے ہارن اور سعودی عرب کے درمیان سفر کرنے والے ہزاروں تارکین وطن کے لیے ایک اہم منزل بنا ہوا ہے۔
قابل ذکر ہے کہ 15 مارچ کو یمن میں حوثیوں کے ٹھکانوں پر امریکی فضائی حملے دوبارہ شروع ہو گئے تھے جس کے بعد سے حوثی گروپ اور امریکی فوج کے درمیان کشیدگی میں تیزی سے اضافہ ہوا ہے۔ امریکی حملوں کا مقصد حوثیوں کو بحیرہ احمر اور بحیرہ عرب میں اسرائیلی اور امریکی بحری جہازوں کو نشانہ بنانے سے روکنا ہے۔
یو این آئی زنہوا۔ م ع۔ 2033
