ہلاکتوں کی تعداد 4لاکھ سے تجاوز، متاثرین کی تعداد72 لاکھ
سرینگر: پوری دنیا کورونا وبا کے جاری قہر سے پریشان ہے اور روزانہ متاثرین اور ہلاکتوں کی تعداد میں اضافہ ہو رہا ہے۔تازہ اعداد و شمار کے مطابق پوری دنیا میں کورونا متاثرین کی تعداد 72 لاکھ کے قریب پہنچ گئی ہے جبکہ اس وبا سے ہونے والی اموات کی تعداد4لاکھ سے زیادہ ہو گئی ہے۔
کے این ایس مانیٹر نگ ڈیسک کے مطابق ہندوستان میں بھی کورونا وائرس کا قہر بڑھتا جارہا ہے اور اب یہاں متاثرین کی تعداد اڑھائی لاکھ سے زیادہ ہو گئی ہے اور ہلاک ہونے والوں کی تعداد7 ہزار سے تجاوز کر گئی ہے۔
امریکہ میں تازہ اعداد و شمار ملنے تک کورونا کی وبا سے اب تک20 لاکھ سے زیادہ لوگ متاثر ہوچکے ہیں جبکہ ایک لاکھ 13 ہزار سے زیادہ لوگوں کی موت ہوچکی ہے۔ برازیل میں متاثرین کی تعداد 7لاکھ سے تجاوز کر گئی ہے اور وہاں 37 ہزار سے زیادہ لوگوں کی موت ہوچکی ہے۔
روس میں بھی کورونا کا قہر بڑھتا جارہا ہے اور یہاں اس وائرس سے ا ب تک پونے5لاکھ سے زیادہ لوگ متاثر ہو چکے ہیں جبکہ5971لوگوں نے جان گنوائی ہے۔ چین میں متاثرین کی تعداد 83 ہزار سے زیادہ ہے اور ترکی میں کورونا متاثرین کی تعداد ایک لاکھ 71 ہزار سے زیادہ ہو گئی ہے۔
سعودی عرب میں بھی کورونا متاثرین کی تعداد میں بہت تیزی سیاضافہ ہورہا ہے اور وہاں متاثرین کی تعداد ایک لاکھ سے زیادہ ہو گئی ہے جبکہ اس سے ہلاک ہونے والوں کی تعداد764 ہے۔
پڑوسی ملک پاکستان میں متاثرین کی تعداد ایک لاکھ سے تجاوز کر گئی ہے اور وہاں ہونے والی اموات کی تعداد2067سے زیادہ ہے۔برطانیہ میں بھی اس وائرس کی وجہ سے حالات مسلسل خراب ہوتے جارہے ہیں۔ وہاں اب تک اس بیماری سے پونے تین لاکھ لوگوں سے زیادہ متاثر ہو چکے ہیں اور اس وبا سے ہلاک ہونے والوں کی تعداد ساڑے 40 ہزار سے تجاوز کر گئی ہے۔
اٹلی میں اب تک اس وائرس سے ہلاک ہونے والوں کی تعداد 33ہزار لوگوں سے زیادہ ہو چکی ہے۔اسپین میں ہلاک ہونے والوں کی تعداد27ہزار سے زیادہ ہو چکی ہے۔
