جنیوا، امریکہ اور ایران کے درمیان بالواسطہ بات چیت جمعرات کو ممکنہ فریم ورک معاہدے کے قریب پہنچ گئی ہے ۔

ایران کے وزیرِ خارجہ عباس عراقچی اور امریکی نمائندگان اسٹیو وٹکوف اور جیریڈ کشنر نے عمان کی ثالثی میں کئی گھنٹوں تک بالواسطہ مذاکرات کیے، جنہیں دونوں فریقوں نے سنجیدہ مگر نامکمل قرار دیا۔

عمان کے وزیرِ خارجہ نے کہا کہ مذاکرات کے تیسرے مرحلے کا اختتام قابلِ قدر پیش رفت کے ساتھ ہوا اور تکنیکی گفتگو اگلے ہفتے ویانا میں ہو گی۔

بدر البوسعیدی نے ایکس پر ایک پوسٹ میں کہا کہ ہم نے امریکہ اور ایران کے درمیان مذاکرات میں نمایاں پیش رفت دیکھی ہے جبکہ تکنیکی سطح پر گفتگو اگلے ہفتے ویانا میں ہو گی۔

ایک سینئر ایرانی اہلکار نے کہا کہ اگر واشنگٹن جوہری امور کو دیگر تنازعات سے الگ کرے جن میں بیلسٹک میزائل اور تہران کی علاقائی حمایتیں شامل ہیں تو معاہدہ دسترس میں ہو سکتا ہے ۔

یہ بات چیت اس دباؤ کے پس منظر میں ہو رہی ہیں جو ڈونلڈ ٹرمپ کی طرف سے بڑھ رہا ہے،جنہوں نے ایران کو کہا ہے کہ وہ جلدی معاہدہ کرے ورنہ نتائج بھگتنا ہوں گے۔

واشنگٹن چاہتا ہے کہ تہران یورینیم کی افزودگی کو مکمل طور پر بند کر دے کیونکہ یہ صلاحیت جوہری ہتھیاروں کی ترقی ممکن بنا سکتی ہے۔

ایران اس بات سے انکار کرتا ہے کہ وہ بم چاہتا ہے اور کہتا ہے کہ وہ پابندیوں میں نرمی اور پرامن افزودگی کے حق کے اعتراف کے بدلے رعایتیں دینے کے لیے تیار ہے۔

امریکی وزیرِ خارجہ مارکو روبیو نے کہا کہ ایران کا اپنا میزائل پروگرام زیرِ بحث لانے سے انکار ایک بڑا رکاوٹ ہے، جبکہ ایرانی حکام اصرار کرتے ہیں کہ مذاکرات صرف جوہری معاملات اور پابندیوں پر مرکوز ہونے چاہئیں۔

یہ سفارتی کوششیں اس خدشے کے ساتھ سامنے آ رہی ہیں کہ تنازعہ وسیع ہوسکتا ہے۔ امریکہ نے خطے میں اضافی فضائی اور بحری اثاثے تعینات کیے ہیں، جن میں طیارہ بردار جہاز یو ایس ایس جیرالڈ آر۔ فورڈ شامل ہے، جبکہ ایران نے خبردار کیا ہے کہ وہ کسی بھی نئی حملے کے خلاف سخت جوابی کارروائی کرے گا۔

یو این آئی۔ ع ا۔

واشنگٹن، صدر ڈونلڈٹرمپ کو وائٹ ہائوس میں ایران اور روس یوکرین پر انٹیلی جنس بریفنگ دی گئی ہے۔

صدر ٹرمپ کو ایران کے ساتھ جنیوا میں مذاکرات کے تیسرے دور پر بھی بریفنگ دی گئی ہے جو آج ہو رہے ہیں۔

ٹرمپ کو مشیروں نے تجویز دی ہے کہ ایران پر پہلا حملہ اسرائیل کی جانب سے ہو تو بہتر ہو گا کیونکہ اسرائیلی حملہ ایران کو جوابی کارروائی پر مجبور کرے گا جس سے جوابی کارروائی کےلیے امریکہ میں حمایت حاصل کرنے میں مدد ملے گی۔

یہ بھی تجویزپیش کی گئی ہے کہ پہلے امریکہ یا اس کے اتحادی پر حملہ ہو تو زیادہ امریکی عوام جنگ برداشت کرنے کو تیار ہوں گے۔

امریکی اخبار پولیٹیکو کا دعویٰ ہے کہ رائے شماری میں امریکی عوام ایران میں قیادت کی تبدیلی کی حمایت کرتے ہیں واشنگٹن میں ایران کے ساتھ کشیدگی کے سفارتی حل کی امیدیں ماند پڑ رہی ہیں۔

ٹرمپ کو تجویز پیش کی گئی ہے کہ اسرائیل پہلے حملہ کرے پھر جوابی کارروائی پر امریکی حملوں کو سیاسی جواز مل جائے گا۔

یو این آئی۔ ع ا۔

جنیوا، ایرانی وزیر خارجہ عباس عراقچی نے کہا ہے کہ امریکہ سے بات چیت اچھی رہی اور دونوں ملک ممکنہ معاہدے کے قریب ہیں۔

غیر ملکی میڈیا کے مطابق ایران اور امریکہ کے درمیان مذاکرات کا تیسرا دور سوئٹزرلینڈ کے شہر جنیوا میں جاری ہے۔

الجزیرہ کے مطابق ایرانی وزیر خارجہ سے گزشتہ روز مذاکرات میں وقفے کے دوران گفتگو کرتے ہوئے خوشخبری سنائی ہے کہ امریکہ سے بات چیت اچھی رہی ہے اور دونوں ملک ممکنہ معاہدے کے قریب ہیں۔

عباس عراقچی کا مزید کہنا تھا کہ اگرچہ کچھ معاملات پر ابھی بھی اختلاف رائے ہیں، جوہری ہتھیاروں اور پابندیوں کے معاملات پر اب ایک مفاہمت کے بہت قریب پہنچ چکے ہیں۔ یہ معاہدہ ممکنہ جنگ کو روک سکتا ہے۔

ان کا کہنا تھا کہ ایران پر عائد پابندیوں میں ریلیف کے معاملے پر ہم نے واضح طور پر اپنے مطالبات پیش کیے۔ اور فیصلہ کیا گیا کہ اگلے سیشن میں ان معاملات پر مزید تفصیل سے غور کیا جائے گا۔

دوسری جانب ترجمان وزارت خارجہ نے ایرانی ٹیلی ویژن کو بتایا کہ مذاکرات بہت سنجیدہ تھے اور کئی اقدامات ایسے اٹھائے گئے ہیں جن پر مزید ممالک سے مشاورت کی ضرورت ہے، جس سے واضح ہوتا ہے کہ یہ مذاکرات تیسرے مرحلے سے آگے بڑھنا چاہتے ہیں۔

واضح رہے کہ سوئٹزرلینڈ کے شہر جنیوا میں عمان کی ثالثی میں ایران امریکہ مذاکرات کے تیسرے دور میں بات چیت کے دوران وقفے کے دوران یہ بات چیت ہوئی ہے۔

یو این آئی۔ ع ا۔