سری نگر، دہشت گردی کے لیے فنڈ فراہمی کے ایک مقدمہ میں قومی تحقیقاتی ایجنسی (این آئی اے) کی جانب سے 4 جون 2019 کو گرفتار کیے گئے علیحدگی پسند رہنما شبیر احمد شاہ کو سپریم کورٹ سے ضمانت ملنے پر جموں و کشمیر کی مختلف سیاسی جماعتوں کے رہنماؤں نے خیر مقدم کیا ہے۔

پیپلز ڈیموکریٹک پارٹی کی صدر اور سابق وزیر اعلیٰ محبوبہ مفتی نے فیصلے کا استقبال کرتے ہوئے غیر قانونی سرگرمیوں کی روک تھام کے قانون کے تحت اب بھی زیر حراست دیگر افراد کے بارے میں تشویش ظاہر کی۔ انہوں نے صحافیوں سے بات چیت کرتے ہوئے کہا کہ شاہ کے خاندان، خاص طور پر ان کی بیٹی نے اس قانونی جدوجہد کو سپریم کورٹ تک پہنچانے کے لیے انتھک کوششیں کیں۔ ان کے مطابق شاہ کی بیٹی کی جدوجہد اس بات کی عکاسی کرتی ہے کہ انصاف حاصل کرنے کے لیے خاندانوں کو کتنی ثابت قدمی کے ساتھ کوشش کرنی پڑتی ہے۔

انہوں نے یہ سوال بھی کیا کہ ایسے غریب لوگوں کا کیا ہوگا جن کے پاس اعلیٰ عدالتوں تک جانے کے لیے وسائل موجود نہیں اور جو اب بھی اسی قانون کے تحت مقدمات کا سامنا کر رہے ہیں۔

آل پارٹیز حریت کانفرنس کے چیئرمین اور کشمیر کے ممتاز مذہبی رہنما میرواعظ عمر فاروق نے بھی اس فیصلے کا خیر مقدم کرتے ہوئے امید ظاہر کی کہ عدالتیں دیگر قیدیوں کو بھی اسی جذبے کے ساتھ راحت فراہم کریں گی۔ انہوں نے کہا کہ اس فیصلے سے جموں و کشمیر کے اندر اور باہر جیلوں میں بند لوگوں کے اہل خانہ کو بھی راحت ملے گی۔

میرواعظ نے کہا، ” ہم طویل عرصے تک مقید رہنے کے بعد شبیر شاہ کو سپریم کورٹ سے ضمانت ملنے کا خیر مقدم کرتے ہیں۔ ہمیں امید ہے کہ عدالتیں اسی جذبے کے ساتھ جموں و کشمیر کے اندر اور باہر جیلوں میں بند تمام سیاسی قیدیوں اور نوجوانوں کو بھی راحت فراہم کریں گی، جس سے ان کے خاندانوں اور جموں و کشمیر کے عوام کو خوشی ملے گی۔”

جموں و کشمیر نیشنل کانفرنس کے ترجمان تنویَر صادق نے اسے ایک اہم پیش رفت قرار دیتے ہوئے کہا کہ سپریم کورٹ کا یہ فیصلہ آئینی ڈھانچے میں عدالتی عمل اور انصاف کے اصول کی اہمیت کو اجاگر کرتا ہے اور طویل عرصے سے حراست میں رہنے کے بعد اس سے شاہ کے خاندان کو بڑی راحت ملے گی۔

جموں و کشمیر پیپلز کانفرنس کے صدر سجاد لون نے بھی فیصلے کا خیر مقدم کرتے ہوئے کہا کہ شاہ طویل عرصے سے علیل تھے اور امید ہے کہ اب وہ گھر لوٹ کر اپنے خاندان کے ساتھ وقت گزار سکیں گے۔

جیل میں بند رکن پارلیمان انجینئر رشید کے بیٹے ابرار رشید نے بھی امید ظاہر کی کہ دیگر قیدیوں کو بھی جلد انصاف ملے گا۔

انہوں نے کہا کہ سپریم کورٹ کا یہ فیصلہ ان کئی خاندانوں کے لیے امید کی کرن بن کر آیا ہے جو انصاف کے منتظر ہیں۔

دریں اثنا، شاہ کی بیٹی سحر شبیر نے فیصلے پر اطمینان کا اظہار کرتے ہوئے کہا کہ بغیر جرم ثابت ہوئے 39 برس کی قید کے بعد آج انصاف کی سمت میں پہلا قدم اٹھایا گیا ہے۔ انہوں نے کہا کہ انہیں ہمیشہ عدلیہ پر اعتماد رہا ہے اور آج یہ اعتماد مزید مضبوط ہو گیا ہے۔

واضح رہے کہ شبیر شاہ کو 2019 میں مبینہ دہشت گردی کی مالی معاونت کے ایک مقدمے میں گرفتار کیا گیا تھا اور تب سے وہ تہاڑ جیل میں قید ہیں۔ طویل عرصے سے سرگرم علیحدگی پسند رہنما شاہ اپنی زندگی کے کئی دہائیاں مختلف ادوار میں جیل میں گزار چکے ہیں۔

یو این آئی۔ ایم جے

جموں، جموں وکشمیر کے وزیر اعلیٰ عمر عبداللہ نے جمعرات کو ایک اعلیٰ سطحی جائزہ میٹنگ کی صدارت کی جس میں یونین ٹریٹری میں ایس اے ایس سی آئی اسکیم کے تحت جاری کاموں کی پیش رفت کا جائزہ لیا گیا۔

انہوں نے منصوبوں کی بر وقت تکمیل اور موثر نگرانی پر زور دیتے ہوئے افسروں پر کو ہدایت دی کہ وہ اس اسکیم کے فوائد شفاف اور موثر طریقے سے مقررہ مدت کے اندر عوام تک پہنچائیں۔

انہوں نے اس بات پر زور دیا کہ فنڈز کے استعمال میں کسی قسم کی کوتاہی نہیں ہونی چاہئے۔

یہ جانکاری وزیر اعلیٰ کے دفتر کے ‘ایکس’ ہینڈل پر ایک پوسٹ کے ذریعے فراہم کی گئی۔

پوسٹ میں کہا گیا: ‘وزیر اعلیٰ نے آج ایس اے ایس سی آئی اسکیم کے تحت کاموں پر عمل آوری سے متعلق جائزہ میٹنگ کی صدارت کی۔ انہوں نے منصوبوں کی بروقت تکمیل اور موثر نگرانی پر زور دیا اور افسران کو ہدایت کی کہ وہ اس بات کو یقینی بنائیں کہ اسکیم کے فوائد لوگوں تک شفاف اور موثر انداز میں پہنچیں اور فنڈز کے استعمال میں کسی بھی قسم کی کوتاہی نہ ہونے دی جائے’۔

یو این آئی ایم افضل۔ایف اے