سری نگر، سیکورٹی فورسز نے بارہمولہ ضلع کے اوڑی سیکٹر میں دراندازی کی ایک کوشش کو ناکام بنا دیا اور ایک مشتبہ پاکستانی دہشت گرد کو رات بھر جاری رہنے والے آپریشن کے دوران ہلاک کر دیا۔

اس سال کشمیر خطے میں لائن آف کنٹرول کے ساتھ پہلی دراندازی کی کوشش کو اوڑی سیکٹر کے بُچھر علاقے میں ہفتہ اور اتوار کی درمیانی شب جموں و کشمیر پولیس (جے کے پی) کی فراہم کردہ مخصوص انٹیلی جنس اطلاع کے بعد ناکام بنایا گیا۔

فوج کی سری نگر میں قائم چنار کور نے ایک پوسٹ میں بتایا کہ “ڈیگی 2 اوڑی” نامی آپریشن ابھی جاری ہے۔ فوج نے کہاکہ”جے کے پی کی جانب سے دراندازی کی کوشش کے بارے میں مخصوص انٹیلی جنس اطلاع کی بنیاد پر 14-15 مارچ کی درمیانی شب اوڑی سیکٹر کے بُچھر علاقے میں مشترکہ آپریشن شروع کیا گیا۔ چوکس دستوں نے جھاڑیوں میں ایک دہشت گرد کی مشکوک حرکت دیکھی۔ گھات کو دوبارہ ترتیب دیا گیا اور دہشت گرد کو للکارا گیا جس پر اس نے اندھا دھند فائرنگ شروع کر دی۔ جھڑپ میں ایک پاکستانی دہشت گرد مارا گیا۔”

فوج نے مزید بتایا کہ دہشت گرد کے قبضے سے جنگی ساز و سامان بشمول ایک اے کے رائفل، پستول اور بڑی مقدار میں گولہ بارود برآمد ہوا ہے۔

یو این آئی۔ ظ ا

سری نگر، جموں و کشمیر کے وزیر اعلیٰ عمر عبداللہ نے ہفتہ کے روز کہا کہ وہ چاہتے ہیں کہ ’’ایران کے عوام پر مسلط کی گئی غیر منصفانہ جنگ بند ہو۔‘‘

انہوں نے کہا کہ ہر وہ پیش رفت جو ہندوستان کو ایندھن کی قیمتیں کم رکھنے میں مدد دیتی ہے وہ فائدہ مند ہے، لیکن انہوں نے اس بات پر زور دیا کہ دیرپا فائدہ تبھی ہوگا جب مغربی ایشیا میں امن قائم ہوگا۔ سری نگر میں آبنائے ہرمز سے ایران کی جانب سے خام تیل کے دو ٹینکرز کو گزرنے کی اجازت دینے کے سوال پر عمر عبداللہ نے صحافیوں کو بتایا’’ کوئی بھی چیز جو ہمیں قیمتیں کم رکھنے کی اجازت دیتی ہے، وہ ہمارے لیے اچھی ہے۔ چاہے اس کا مطلب روس سے تیل خریدنا ہو یا اس آبنائے کے ذریعے اپنی گیس اور ایندھن کی سپلائی کو منتقل کرنا ہو جو کہ باقی سب کے لیے بند ہے، یہ ہمارے لیے بہتر ہے۔‘‘

تاہم، انہوں نے مزید کہا کہ معاشی فوائد خطے میں امن کی ضرورت پر حاوی نہیں ہونے چاہئیں۔ انہوں نے کہا، ’’آخر کار، ہم جو چاہتے ہیں وہ امن ہے۔ ہم چاہتے ہیں کہ ایران کے لوگوں پر مسلط یہ غیر منصفانہ جنگ ختم ہو۔‘‘

عمر عبداللہ نے ایران کی قیادت پر اثر انداز ہونے کی بیرونی طاقتوں کی کوششوں پر بھی تنقید کی۔ انہوں نے کہا ’’جیسا کہ میں نے بارہا کہا ہے، امریکہ اور اسرائیل کو یہ فیصلہ کرنے کا حق نہیں ہے کہ ایران کی قیادت کون کررہا ہے۔ اسرائیل اور امریکہ یہ طے نہیں کر سکتے کہ سپریم لیڈر کون ہوگا۔ یہ وہاں کی کمیونٹی، وہاں کے عوام اور ایران کے شہریوں کا فیصلہ ہے۔‘‘

ایران کے سپریم لیڈر آیت اللہ علی خامنہ ای کا حوالہ دیتے ہوئے عمر عبداللہ نے کہا کہ وہ نہ صرف ایک قومی رہنما تھے بلکہ ایک ایسی مذہبی شخصیت تھے جن کا پوری مسلم دنیا میں احترام کیا جاتا ہے۔ انہوں نے کہا ’’جس شخصیت کو انہوں نے شہید کیا، آیت اللہ خامنہ ای، وہ صرف ایران کے لیڈر نہیں تھے۔ وہ پوری مسلم امہ کے لیے ایک تسلیم شدہ مذہبی پیشوا تھے۔ اس لیے اسے صرف ایران کے ساتھ تنازع کے طور پر نہیں دیکھا جانا چاہیے، اس کے اثرات کہیں زیادہ وسیع ہیں۔‘‘

وزیر اعلیٰ نے اس امید کا بھی اظہار کیا کہ ایندھن کی قیمتوں پر اثر انداز ہونے والے بین الاقوامی تنازع کی وجہ سے ہوائی کرایوں میں اضافے کے خدشات کے باوجود، موسم گرما کے آنے والے سیزن میں بڑی تعداد میں سیاح کشمیر کا رخ کریں گے۔

عبداللہ نے کہا، ’’ توقع ہے کہ لوگ بڑی تعداد میں آئیں گے، کشمیر کی خوبصورتی سے لطف اندوز ہوں گے اور واپس جائیں گے۔‘‘ جب ان سے پوچھا گیا کہ کیا عالمی کشیدگی اور ایندھن کی بڑھتی ہوئی قیمتیں سیاحوں کی آمد پر اثر انداز ہو سکتی ہیں، تو انہوں نے کہا کہ خدشات موجود ہیں کیونکہ ہوائی جہاز کے ٹکٹ مہنگے ہونا شروع ہو گئے ہیں۔

یاحت کا تعلق ہے، امید تو ہے، لیکن ٹکٹوں کی قیمت صرف بین الاقوامی پروازوں پر نہیں بڑھ رہی، انڈیگو نے یہاں بھی فیول سرچارج لگانا شروع کر دیا ہے۔ اب ہمیں دیکھنا ہوگا کہ اس کا ہمارے سیزن پر کتنا اثر پڑتا ہے۔‘‘ ان چیلنجوں کے باوجود عمر عبداللہ نے کہا کہ حکومت کو سیاحت کے اچھے سیزن کی امید ہے۔

یواین آئی۔ایف اے

جموں، جموں و کشمیر کے رام بن ضلع کے سرسبز و شاداب میدانوں میں واقع خوبصورت سنسار میں دو لاکھ سے زیادہ کھلے ہوئے گل لالہ سیاحوں کو اپنی جانب متوجہ کرنے کے لیے تیار ہیں۔

سسنار کا ٹیولپ گارڈن جلد ہی عوام کے لیے کھول دیا جائے گا، جس سے نئے سیاحتی موسم کی شروعات ہوگی۔

رام بن کے ڈپٹی کمشنر محمد الیاس خان نے کہاکہ “جموں کا پہلا ٹیولپ گارڈن سنسار میں ایک شاندار پھولوں کی منزل بن گیا ہے۔

25 مختلف اقسام کے دو لاکھ سے زیادہ ٹیولپس کے ساتھ یہ پورے ملک سے آنے والے سیاحوں کو اپنی طرف کھینچنے کے لیے تیار ہے اور اس سے خطے کی سیاحت کی صلاحیت مزید بڑھے گی۔”

انہوں نے بتایا کہ 35 کنال زمین پر لگے سینکڑوں کھلے ہوئے گل لالہ نہایت دلکش منظر پیش کر رہے ہیں۔ اس سال سنسار گارڈن میں 25 اقسام کے ٹیولپس لگائے گئے ہیں۔

مسٹر الیاس خان نے مزید کہا کہ پٹن ٹاپ ڈیولپمنٹ اتھارٹی کی جانب سے سنسار میں گلف کورس بھی تیار کیا جا رہا ہے تاکہ گلف کی سرگرمیوں کے ساتھ دیگر ترقیاتی کام شروع کیے جا سکیں اور اس سیاحتی مقام کو مزید بہتر بنایا جا سکے۔ انہوں نے کہا کہ سرگرمیوں کے کیلنڈر میں ان مقامات کی تشہیر پر زور دیا جائے گا اور خاص طور پر پٹن ٹاپ اور سنسار کو “ویڈنگ ڈیسٹینیشن” اور “فلم شوٹنگ ڈیسٹینیشن” کے طور پر فروغ دیا جائے گا۔

محکمہ فلوریکلچر کے ضلعی افسر وکرانت شرما نے کہا کہ “25 اقسام کے دو لاکھ سے زیادہ گل لالہ مکمل طور پر کھل جائیں گے اور باغ جلد ہی عوام کے لیے کھول دیا جائے گا۔ جموں و کشمیر بے مثال قدرتی خوبصورتی اور مناظر سے مالا مال ہے، جس میں سیاحت کی بے پناہ صلاحیت ہے۔”

انہوں نے عوام سے اپیل کی کہ بڑی تعداد میں آئیں اور کھلے ہوئے ٹیولپ پھولوں کا نظارہ کریں۔ قابل ذکر ہے کہ 2023 میں حکومت نے جموں ڈویژن کا سب سے بڑا ٹیولپ گارڈن تیار کرنے کے منصوبے کو منظوری دی تھی، جو وسیع رقبے پر پھیلا ہوا ہے۔

یواین آئی۔ ظ ا