واشنگٹن، صدر ڈونلڈ ٹرمپ نے ایران سے مجوزہ معاہدے سے متعلق سی این این کی رپورٹ کو جھوٹ پر مبنی خبر قرار دے دیا۔

امریکی صدر ڈونلڈ ٹرمپ نے ایران کے ساتھ مجوزہ معاہدے سے متعلق امریکی نشریاتی ادارے سی این این کی رپورٹنگ کو فیک نیوز قرار دیدیا۔

ٹروتھ سوشل پر لکھا کہ سی این این نے معمول کے مطابق ایک بار پھر فیک نیوز پھیلائی۔ سی این نےآج کہا اور کہتا رہتا ہے کہ ایران سے متعلق معاہدے میں جوہری امور کا ذکر نہیں۔

امریکی صدر نے مزید کہا کہ حقیقت یہ ہے معاہدے میں واضح طور پر درج ہے کہ ایران جوہری ہتھیار حاصل نہیں کرے گا۔ جوہری شقیں اس معاہدے کا مرکزی حصہ ہیں۔ ان کا کہنا تھا کہ معاہدے میں ایران کے جوہری پروگرام پر نہایت مضبوط اور تفصیلی شقیں شامل ہیں۔ معاہدے کا زیادہ تر حصہ درحقیقت اسی بارے میں ہے۔

یو این آئی۔ ع ا۔

تہران، ایرانی سیکیورٹی کونسل نے ٹرمپ کے دعوے کی تردید کرتے ہوئے کہا ہے کہ ہم نے ایٹمی پروگرام سے متعلق امریکہ سے کوئی وعدہ نہیں کیا ہے۔

گزشتہ روز امریکی صدر ڈونلڈ ٹرمپ نے اپنی بہو کو فاکس نیوز پر انٹرویو دیتے ہوئے دعویٰ کیا تھا کہ ایران ایٹمی ہتھیار حاصل نہ کرنے پر رضامند ہو گیا ہے۔ تاہم ایرانی سیکیورٹی کونسل نے امریکی صدر کے اس دعوے کی تردید کر دی ہے۔

ایرانی میڈیا کے مطابق ترجمان ایرانی سیکیورٹی کونسل ابراہیم رضائی نے واضح طور پر کہا ہے کہ ایٹمی پروگرام سے متعلق ہم نے امریکہ سے کوئی وعدہ نہیں کیا اور نہ ہی امریکہ سے افزودہ شدہ یورینیم یا یورینیم افزودگی سے متعلق کوئی بات ہوئی ہے۔ ترجمان ایرانی سیکیورٹی کونسل نے کہا کہ امریکہ سے واضح کہہ دیا ہے کہ جنگ کے خاتمے کیلیے ہماری یہ شرائط ہیں اور ان طے شدہ شرائط سے کسی صورت پیچھے نہیں ہٹیں گے۔

ابراہیم رضائی نے کہا کہ اب دیکھتے ہیں امریکی سفارت کاری کے ذریعے کسی نتیجے پر پہنچتے ہیں یا نہیں۔ امریکہ نے کسی بھی فیصلے کا معاملہ سفارت کاروں کے ذریعہ حل کرنا ہے یا پھر اس کا فیصلہ ہمارے میزائلوں سے ہوگا۔ انہوں نے مزید کہا کہ خلیج فارس کی کارروائیاں ایران کی جانب سے ایک قسم کی پیشگی کارروائی تھی۔ محاصرے کے حوالے سے یقین رکھیں کہ حالات ہمیشہ ایسے نہیں رہیں گے۔

ترجمان ایرانی سیکیورٹی کونسل نے یہ بھی کہا کہ ہمیں فوجی معاملات کو فوج پر ہی چھوڑنا چاہیے۔ ہم آپریشن شروع کرنے کے بہترین وقت تک پہنچنے کا انتظار کر رہے ہیں، جب وقت صفر پر پہنچ جائے گا تو فوج ضرور کارروائی کرے گی۔

واضح رہے کہ امریکی نشریاتی ادارے سی این این نے بھی ایک رپورٹ میں امریکی صدر کے دعوے کی نفی کرتے ہوئے کہا تھا کہ مجوزہ معاہدے میں ایران کے جوہری ہتھیاروں سے دستبرداری کی کوئی شق شامل نہیں ہے۔ سی این این کی اس رپورٹ پر صدر ٹرمپ نے سیخ پا ہوتے ہوئے امریکی نشریاتی ادارے کو ایک بار پھر جھوٹا قرار دے ڈالا۔

یو این آئی۔ ع ا۔

تہران، ایرانی وزارتِ خارجہ کے ترجمان اسماعیل بقائی نے کہا ہے کہ یورپی یونین غیر قانونی حملوں کا جواب دینے والے ممالک کو موردِ الزام ٹھہرانا بند کرے۔

انہوں نے ایک بیان میں کہا ہے کہ ایران کے حقِ دفاع کے خلاف یورپی بیان منافقانہ اور غیر ذمے دارانہ ہے۔ ترجمان ایرانی وزارتِ خارجہ کا کہنا ہے کہ یورپی یونین کو قانون کی حکمرانی اور اقوامِ متحدہ کے اصولوں پر قائم رہنا چاہیے۔ ان کا کہنا ہے کہ غیر قانونی حملوں کے لیے استعمال ہونے والے اڈوں، عسکری وسائل کو نشانہ بنانا حقِ دفاع ہے۔

ترجمان ایرانی دفترِ خارجہ اسماعیل بقائی نے کہا ہے کہ ریاستوں کی ذمےداری ہے کہ وہ اپنی سر زمین یا وسائل دوسرے ممالک پر حملے کے لیے استعمال نہ ہونے دیں۔ انہوں نے کہا کہ امریکی جارحانہ کارروائی جنگ بندی کی خلاف ورزی ہے، امریکی جارحیت حملے کے لیے استعمال ہونے والے مقامات پر ایرانی جوابی کارروائی کا سبب بنی۔

ترجمان ایرانی وزارتِ خارجہ نے کہا کہ کویت زیرِ حراست 4 ایرانی شہریوں سے متعلق جلد از جلد وضاحت کرے، مخالف فریق کی جانب سے موقف کی تبدیلی، نئے متضاد مطالبات کے سبب مذاکرات کا دورانیہ طویل ہو رہا ہے۔ ان کا کہنا ہے کہ مذاکرات کا مطلب یہ نہیں کہ مذاکراتی فریقوں کے درمیان اعتماد ہو، اس مرحلے پر جوہری معاملے پر کوئی بات چیت نہیں ہوئی۔

اسماعیل بقائی کا کہنا ہے کہ لبنان میں صہیونی حکومت کے جرائم کا ذمے دار امریکہ ہے، اعتماد کا فقدان، لبنان میں امریکی اوراسرائیلی اقدامات کی مسلسل تبدیلیاں سفارتی عمل میں تاخیر کا سبب ہیں، لبنان میں جنگ بندی امریکہ کے ساتھ جنگ کے خاتمے کے کسی بھی معاہدے کا لازمی حصہ ہے۔

یو این آئی۔ ع ا۔