تہران، اسماعیل بقائی نے کہا ہے کہ ایران نے 30 دنوں کا وعدہ پورا کیا جب کہ ایم او یو کے مطابق امریکا منجمد اثاثے جاری نہ کر سکا۔

ایران کی وزارت خارجہ کے ترجمان اسماعیل بقائی نے آسٹریا کے نشریاتی ادارے سے گفتگو کرتے ہوئے کہا کہ امریکہ کے ساتھ پیغامات کا فعال طور پر تبادلہ کیا جا رہا ہے، پاکستان اور قطر ثالث کے طور پر تہران اور واشنگٹن کے درمیان پیغامات کا تبادلہ کر رہے ہیں۔

اسماعیل بقائی نے کہا حملے کے دوران تہران کی اوّلین ترجیح اپنی خودمختاری کا دفاع ہے، انھوں نے بتایا کہ ایران نے 30 دنوں میں آبنائے ہرمز سے محفوظ گزرنے کی یقین دہانی کا وعدہ پورا کر دیا ہے۔

ترجمان نے کہا امریکہ نے ڈیڈ لائن ختم ہونے سے پہلے ہی جہاز رانی واقعات کو بہانہ بنا کر حملے شروع کر دیے، اس طرح ایک سال میں تیسری مرتبہ مذاکرات کے دوران حملوں سے ایران کی سفارت کاری کو دھوکہ دیا گیا۔

انھوں نے کہا کہ امریکہ مفاہمت کی یادداشت (ایم او یو) کے تحت ایران کے منجمد اثاثے جاری کرنے میں ناکام رہا ہے۔

واضح رہے کہ ایران پر قریب دو ہفتے سے جاری حملوں کا سلسلہ رک گیا ہے، امریکی میڈیا کا کہنا ہے کہ صدر ٹرمپ نے ایران پر مزید حملوں کی منظوری نہیں دی۔ یہ فیصلہ اس وقت کیا گیا جب امریکی حکام نے پیٹریاٹ دفاعی میزائلوں کے ذخائر میں کمی اور خلیج فارس میں امریکا کے عرب اتحادیوں کے دور ہونے کے خدشات پر تشویش کا اظہار کیا۔

یو این آئی۔ ع ا۔

سنگاپور، امریکی صدر ڈونلڈ ٹرمپ کے ایران پر حملے روکنے کے اعلان کے بعد خام تیل کی قیمتوں میں کمی آ گئی ہے۔

روئٹرز کے مطابق ہفتے کے اختتام پر امریکہ اور ایران نے دو ہفتوں تک جاری رہنے والے حملوں کے بعد اپنی فوجی کارروائیاں عارضی طور پر روک دیں، جس کے نتیجے میں پیر کے روز تیل کی قیمتیں 5 فی صد تک گر گئیں۔

برینٹ خام تیل کی قیمت 5.58 فی صد کم ہو کر 91.38 ڈالر فی بیرل رہ گئی، جب کہ کاروبار کے آغاز میں یہ مختصر طور پر 90 ڈالر کی اہم تکنیکی حد سے بھی نیچے آ گئی تھی۔

امریکی ویسٹ ٹیکساس انٹرمیڈیٹ خام تیل کی قیمت میں 5.46 فی صد کمی کے بعد اس کی قیمت 84.43 ڈالر فی بیرل رہی۔

گزشتہ تین ہفتوں کے دوران مسلسل اضافے کے بعد دونوں معاہدے تقریباً ایک ہفتے کی کم ترین سطح پر ٹریڈ ہو رہے ہیں۔

برینٹ خام تیل کی قیمت 100 ڈالر فی بیرل تک پہنچ گئی تھی، کیوں کہ یہ تنازع آبنائے ہرمز سے آگے بڑھ کر بحیرۂ احمر تک پھیل گیا تھا۔ اس کے باعث آبنائے ہرمز کے راستے تیل کی ترسیل متاثر ہوئی، جب کہ دنیا کے سب سے بڑے برآمد کنندہ سعودی عرب کی ایشیا کے لیے باب المندب کی آبنائے کے ذریعے ہونے والی برآمدات بھی رکاوٹ کا شکار ہو گئیں۔

یو این آئی۔ ع ا۔

جنیوا، اقوام متحدہ کے جنیوا دفتر میں روس کے مستقل مندوب گیناڈی گیتیلوف نے ریا نوووستی کو بتایا کہ یورپی ممالک نے امریکی ایٹمی چھتری کی قابل اعتماد صلاحیت پر شک ظاہر کرتے ہوئے اپنے ڈیٹرنس میکانزم تیار کرنے پر کام شروع کر دیا ہے۔

سفارت کار نے کہا کہ یورپی ممالک امریکی ایٹمی چھتری کی قابل اعتمادی پر شک کرتے ہوئے اب اپنے ڈیٹرنس میکانزم تیار کرنے پر کام کر رہے ہیں۔ گیتیلوف کے مطابق یہ سب صرف کاغذوں تک محدود نہیں ہے۔ انہوں نے کہا کہ فرانس پہلے ہی جرمنی اور پولینڈ کے ساتھ عملی ایٹمی تعاون کے عناصر شروع کر رہا ہے۔ ابھی گزشتہ ہفتے ہی ایٹمی ہتھیار لے جانے والے فائٹر جیٹس میں فضائی ایندھن بھرنے کی مشترکہ فرانسیسی اور جرمن مشقیں ہوئیں۔ گیتیلوف کا ماننا ہے کہ یہ واضح طور پر صرف شروعات ہے۔

انہوں نے نوٹ کیا کہ یہ بات علامتی ہے کہ برلن میں اپنے ایٹمی اثاثے رکھنے کی افادیت پر عوامی بحث پہلے ہی جاری ہے اور وارسا میں بھی ایسے لوگ موجود ہیں جو اس امکان سے انکار نہیں کرتے۔ مستقل مندوب نے کہا کہ فن لینڈ، ایسٹونیا اور لتھوانیا جیسے دیگر ممالک اپنے سینئر اتحادی سے وفاداری کا مقابلہ کر رہے ہیں اور نیٹو شراکت داروں کے ایٹمی ہتھیاروں کی میزبانی کے امکان کو یقینی بنانے کی کوشش کر رہے ہیں۔

فرانسیسی صدر ایمانوئل میکرون نے مارچ میں اعلان کیا تھا کہ ان کا ملک جدید ایٹمی ڈیٹرنس کے دور میں داخل ہو رہا ہے۔

اس نئے طریقہ کار کے تحت پیرس ایٹمی وار ہیڈز کی تعداد میں اضافہ کرے گا اور یورپی ممالک مشترکہ ڈیٹرنس مشقوں میں حصہ لے سکیں گے۔ فرانسیسی رہنما کے مطابق آٹھ یورپی ممالک برطانیہ، جرمنی، پولینڈ، نیدرلینڈز، بیلجیئم، یونان، سویڈن اور ڈنمارک فرانس کے اس نظریے میں شامل ہوں گے۔

حالیہ برسوں میں روس اپنی مغربی سرحدوں کے قریب نیٹو کی غیر معمولی سرگرمیوں کا اعلان کرتا رہا ہے۔ نیٹو اپنے اقدامات میں توسیع کر رہا ہے اور اسے روسی جارحیت کا ڈیٹرنس قرار دے رہا ہے۔ ماسکو نے یورپ میں اتحاد کی جانب سے فوج کی صف بندی پر بارہا تشویش کا اظہار کیا ہے۔ کریملن نے اس بات پر زور دیا کہ روس سے کسی کو کوئی خطرہ نہیں ہے لیکن وہ اپنے مفادات کے لیے ممکنہ طور پر خطرناک اقدامات کو نظر انداز نہیں کرے گا۔

یو این آئی۔ ایم جے