واشنگٹن، امریکی صدر ڈونلڈ ٹرمپ نے کہا ہے کہ ایران کے ساتھ جاری کشیدگی کے دوران تجارتی جہازوں یا ان کے سامان کو پہنچنے والے کسی بھی نقصان کا ازالہ امریکہ کے قبضے میں موجود ایران کے منجمد اثاثوں سے کیا جانا چاہیے۔ انہوں نے یہ بھی واضح کیا کہ واشنگٹن فوری جنگ بندی کے بجائے ایران پر فوجی دباؤ برقرار رکھے گا۔

ٹرمپ نے اپنے سوشل میڈیا پلیٹ فارم ٹروتھ سوشل پر لکھا، “جہازوں یا ان کے سامان کو پہنچنے والے ہر نقصان کی تلافی امریکہ کے زیرِ کنٹرول موجود ایرانی رقوم سے کی جائے گی۔”

انہوں نے مزید کہا، “یہ نقصانات بہت زیادہ بھی ہو سکتے ہیں، لیکن یہی منصفانہ اور مناسب طریقہ ہے۔”

ٹرمپ کا یہ بیان ایک روز بعد سامنے آیا جب ایران کے حمایت یافتہ حوثی باغیوں نے بحیرۂ احمر میں سعودی جہازوں کو نشانہ بنایا، جس کے بعد عالمی منڈی میں خام تیل کی قیمت تقریباً 100 ڈالر فی بیرل تک پہنچ گئی۔

بحیرۂ احمر میں ان حملوں نے آبنائے ہرمز میں پہلے سے جاری کشیدگی اور بحری نقل و حمل میں رکاوٹوں کو مزید بڑھا دیا۔

امریکہ اور ایران کے درمیان کئی ارب ڈالر کے منجمد ایرانی اثاثوں کا معاملہ طویل عرصے سے تنازع کا سبب رہا ہے۔ جون میں دونوں ممالک کے درمیان ہونے والی مفاہمت نامے (ایم او یو) میں ان اثاثوں کی رہائی ایک اہم نکتہ تھا، تاہم حالیہ فوجی کشیدگی کے بعد یہ معاہدہ عملاً غیر مؤثر ہو چکا ہے۔

صدر ٹرمپ نے فوری جنگ بندی کے امکان کو بھی مسترد کرتے ہوئے کہا کہ ایران پر مسلسل فوجی دباؤ برقرار رکھنا ضروری ہے۔

یو این آئی۔ ایم جے

تہران، ایران نے برطانیہ کی جانب سے مبینہ طور پر امریکہ کو ایران کے خلاف کارروائیوں کے لیے اپنے فوجی اڈے استعمال کرنے کی اجازت دینے کی سخت مذمت کرتے ہوئے خبردار کیا ہے کہ جو بھی ملک ایران کے خلاف فوجی کارروائی میں کسی بھی شکل میں تعاون کرے گا، اسے اس کے نتائج کی ذمہ داری اٹھانا ہوگی۔

یہ ردِعمل ان میڈیا رپورٹس کے بعد سامنے آیا جن میں کہا گیا کہ برطانوی وزیرِاعظم اینڈی برنہم نے امریکہ کو بحرِ ہند میں واقع ڈیگو گارشیا کے فوجی اڈے اور انگلینڈ کے آر اے ایف فیئر فورڈ سمیت دیگر فوجی تنصیبات ایران کے خلاف کارروائیوں کے لیے استعمال کرنے کی اجازت دے دی ہے۔

ایرانی وزارتِ خارجہ نے اپنے بیان میں کہا کہ برطانیہ کی جانب سے فوجی اڈے اور لاجسٹک سہولتیں فراہم کرنا امریکہ کے ان حملوں کی حمایت ہے جنہیں ایران نے “غیر قانونی” قرار دیا ہے۔ وزارت کے مطابق یہ اقدام اقوامِ متحدہ کے منشور اور بین الاقوامی قانون کی صریح خلاف ورزی ہے۔

بیان میں کہا گیا کہ برطانوی حکومت کا اپنے فوجی اڈے امریکہ کے لیے دستیاب کرنا بین الاقوامی قوانین اور اقوامِ متحدہ کے منشور کی بنیادی اصولوں کے منافی ہے۔

وزارتِ خارجہ نے مزید کہا کہ اقوامِ متحدہ کی جنرل اسمبلی کی قرارداد 3314 کے آرٹیکل 3(ف) کے مطابق اگر کوئی ملک اپنی سرزمین کسی دوسرے ملک کو کسی تیسرے ملک پر حملے کے لیے استعمال کرنے کی اجازت دیتا ہے تو اسے جارحیت تصور کیا جاتا ہے۔ اس لیے برطانیہ کا یہ اقدام بھی جارحیت کے زمرے میں آتا ہے۔

جاری یو این آئی۔ ایم جے

تہر ان، ایرانی پاسدارانِ انقلاب کی ایرو اسپیس فورس کے کمانڈر بریگیڈیئر جنرل سید مجید موسوی نے امریکہ اور اس کے اتحادی کو خبردار کردیا۔

ایرانی پاسدارانِ انقلاب کی ایرو اسپیس فورس کے کمانڈر بریگیڈیئر جنرل سید مجید موسوی نے خبردار کیا ہے کہ ایران کی توانائی کی بنیادی تنصیبات پر کسی بھی حملے کی صورت میں خطے میں فوری اور سخت جوابی کارروائی کی جائے گی۔

سماجی رابطے کی سائٹ ‘ایکس’ پر اپنے ایک پیغام میں بریگیڈیئر جنرل سید مجید موسوی نے لکھا کہ اگر ایران کے پلوں اور بجلی گھروں کو نشانہ بنایا گیا تو اس کے نتیجے میں خطے میں موجود امریکی فوج کے اتحادیوں اور میزبان ممالک میں بجلی کی بندش یقینی ہوگی۔انہوں نے واضح کیا کہ ایران اپنی تنصیبات کے خلاف کسی بھی قسم کی کارروائی کا فوری اور دندان شکن جواب دے گا۔

ایرانی کمانڈر کا یہ سخت بیان امریکی صدر ڈونلڈ ٹرمپ کے اس انتباہ کے بعد سامنے آیا ہے، جس میں انہوں نے کہا تھا کہ اگر ایران نے آبنائے ہرمز سے گزرنے والے کسی بھی جہاز کو نشانہ بنایا تو امریکہ اس کے جواب میں ایران کا ایک پل یا ایک پاور پلانٹ تباہ کر دے گا۔

واضح رہے کہ امریکی صدر ڈونلڈ ٹرمپ نے امریکی فوج کو ایران پر جہنم کے دروازے کھولنے کا حکم دیا۔ رپورٹ کے مطابق امریکی صدر ٹرمپ نے 3 روز قبل سینٹکام کو حکم جاری کیا، امریکی صدر نے تین روز پہلے کا بیان سوشل میڈیا اکاؤنٹ پر آج دوبارہ جاری کیا۔

امریکی صدر ڈونلڈ ٹرمپ نے دھمکی دیتے ہوئےکہا ہے کہ ایران کو بڑی قیمت ادا کرنا پڑے گی، انہیں تباہ کیا جا رہا ہے، حملے جاری رہیں گے۔

یو این آئی۔ ع ا۔