بیروت، لبنان کے صدر جوزف عون نے کہا ہے کہ حزب اللہ کو غیر مسلح کرنے کے لیے جنوبی لبنان سے اسرائیلی افواج کا مکمل انخلاء ضروری ہے۔ ادھر حزب اللہ نے لبنانی حکومت اور اسرائیل کے درمیان ہونے والے معاہدے کو مسترد کرتے ہوئے اسرائیل کے ساتھ براہ راست مذاکرات کرنے کے لبنان کے فیصلے پر تنقید کی ہے۔

حزب اللہ کا کہنا ہے کہ صرف سفارتی کوششوں کے ذریعے جنوبی لبنان سے اسرائیلی افواج کو ہٹانا ممکن نہیں ہے، کیونکہ لبنان میں ایران جیسی سودے بازی کی طاقت نہیں ہے۔ امریکی ثالثی کے معاہدے پر عمل درآمد اس ہفتے پہلے پائلٹ زون میں لبنانی فوج کی تعیناتی کے ساتھ شروع ہوا۔ تاہم امریکی صدر ڈونلڈ ٹرمپ نے وائٹ ہاؤس میں مسٹر عون کے ساتھ ملاقات کے دوران صرف مختصراً اس عمل کا تذکرہ کیا اور لبنان کو امریکی حمایت جاری رکھنے کا یقین دلایا، لیکن کسی ٹھوس امداد کا اعلان نہیں کیا۔ لبنانی صدر کے دفتر کے مطابق، مسٹر عون نے امریکی قانون سازوں اور ٹرمپ انتظامیہ کے اہلکاروں کو بتایا کہ لبنانی مسلح افواج حزب اللہ کو غیر مسلح کرنے کی صلاحیت رکھتی ہیں، لیکن اس کے لیے جنوبی لبنان سے اسرائیلی افواج کے مکمل انخلاء کی ضرورت ہے۔

“لبنان اس وقت تک محفوظ اور متحد نہیں ہو سکتا جب تک کہ ایک ریاست اور ایک فوج تمام لبنانی شہریوں کی حفاظت کر رہی ہو۔ اگر حزب اللہ کو حقیقی معنوں میں غیر مسلح کرنا ہے تو پہلے قبضے کو ختم کرنا ہو گا اور فوج کو پورے علاقے کا کنٹرول سنبھالنا ہو گا۔”

تاہم اسرائیل نے لبنانی فوج کی صلاحیتوں پر شکوک کا اظہار کرتے ہوئے کہا ہے کہ حزب اللہ کو سرحد کے قریب دوبارہ سرگرم ہونے سے روکنے کے لیے جنوبی لبنان میں اسرائیلی فوجیوں کی موجودگی اب بھی ضروری ہے۔

مسٹر عون نے مسٹر ٹرمپ کے ساتھ اپنی ملاقات میں لبنانی فوج کو ملک کی سلامتی اور استحکام میں ریڑھ کی ہڈی قرار دیا۔ جب ان سے پوچھا گیا کہ کیا امریکہ حزب اللہ کو غیر مسلح کرنے کے لیے لبنانی فوج کو اضافی مدد فراہم کرے گا، مسٹر ٹرمپ نے عوامی طور پر کوئی تبصرہ کرنے سے انکار کرتے ہوئے کہا کہ وہ مسٹر عون سے نجی طور پر اس معاملے پر بات کریں گے۔

مارچ سے جاری اسرائیل-حزب اللہ تنازع میں لبنان کو بھاری نقصان اٹھانا پڑا ہے۔ لبنانی حکام کے مطابق 10 لاکھ سے زیادہ لوگ بے گھر ہو چکے ہیں اور تقریباً 4,300 ہلاک ہو چکے ہیں، حالانکہ یہ اعداد و شمار عام شہریوں اور جنگجوؤں میں فرق نہیں کرتے۔

دریں اثنا، اسرائیل نے گزشتہ ماہ کے آخر تک حزب اللہ کے کم از کم 2500 جنگجوؤں کو ہلاک کرنے کا دعویٰ کیا ہے، جن میں گروپ کی رادوان فورس کے سینکڑوں ارکان بھی شامل ہیں۔ اسرائیل کے مطابق جنوبی لبنان میں آپریشن کے دوران اس کے 38 فوجی اور وزارت دفاع کا ایک سویلین کنٹریکٹ ملازم بھی مارا گیا۔ حزب اللہ کے راکٹ حملوں میں دو اسرائیلی شہری بھی مارے گئے جب کہ ایک اور شہری شمالی اسرائیل میں اسرائیلی توپ خانے سے مارا گیا۔

یو این آئی۔ ع ا۔

منیلا، امریکی وزیر خارجہ مارکو روبیو نےکہا ہےکہ بحران کے خاتمےکے لیے امریکہ اب بھی ایران کے ساتھ مذاکرات کا خواہاں ہے، تاہم ایران بات چیت میں سنجیدہ نظر نہیں آ رہا۔

آسیان وزرائے خارجہ کے اجلاس سے خطاب کے دوران انہوں نے کہا کہ امریکہ ہمیشہ سفارت کاری پر یقین رکھتا ہے، ہم اختلافات کے حل کے لیے مذاکرات کے لیے ہر وقت تیار ہیں، اور ایران کے معاملے میں بھی یہی مؤقف برقرار ہے۔

مارکو روبیو نےکہا کہ ایران ماضی میں کیےگئے معاہدوں کی پاسداری نہیں کرسکا، اگر ایران مذاکرات میں سنجیدہ ہوا تو امریکہ بھی سنجیدگی سے بات کرےگا، بصورت دیگر امریکہ اپنے اور اپنے اتحادیوں کے مفادات کے تحفظ کے لیے ضروری اقدامات کرے گا۔

آبنائے ہرمز کے حوالے سے مارکو روبیو کا کہنا تھا کہ اگر مشرق وسطیٰ میں کسی ملک کو یہ مثال قائم کرنے دی گئی کہ وہ کسی بین الاقوامی آبی گزرگاہ پر قبضہ کرے، وہاں سےگزرنے والے جہازوں پر ٹول عائد کرے اور ادائیگی نہ کرنےکی صورت میں جہازوں کو نشانہ بنائے تو یہ ایک انتہائی خطرناک نظیر ہوگی، ایسی مثال بعد میں دنیا کے دیگر خطوں، خصوصاً اس خطے میں بھی دہرائی جاسکتی ہے جو عالمی تجارت اور آزادی جہاز رانی کے لیے سنگین خطرہ بنے گی۔

مارکو روبیو کا کہنا تھا کہ ایران کے ساتھ ایساسفارتی حل چاہتے ہیں جو ایران کے جوہری ہتھیار حاصل نہ کرنےکویقینی بنائے، ایرانی حکومت کے ساتھ اعتماد کا فقدان ہے، مفاہمتی یادداشت پر دستخط ہونے کے دو ہفتے سے بھی کم عرصےمیں اس کی خلاف ورزی کر دی گئی، چین نے ایران کے ساتھ جنگ کے رخ کو تبدیل کرنے کے لیےکوئی اقدام نہیں کیا اور بعض مواقع پر تعاون بھی کیا ہے۔

امریکی وزیر خارجہ مارکو روبیو نے کہا ہے کہ مشرقِ وسطیٰ میں سب سے بڑا “فساد پھیلانے والا” ملک ایران ہے۔

یو این آئی۔ ع ا۔

نیویارک، میئر نیویارک زہران ممدانی نے اسرائیلی وزیراعظم نیتن یاہو کی گرفتاری کے بیان پر یوٹرن لے لیا اور کہا انتظامیہ انہیں گرفتار نہیں کرسکتی۔

تفصیلات کے مطابق نیویارک شہر کے میئر زہران ممدانی نے میڈیا سے گفتگو کرتے ہوئے کہا ہے کہ اسرائیلی وزیراعظم بنیامین نیتن یاہو کے خلاف موجود بین الاقوامی فوجداری عدالت کے وارنٹ گرفتاری کو سنجیدگی سے لیا جانا چاہیے، تاہم اس وقت نیویارک شہر کی انتظامیہ انہیں گرفتار نہیں کر سکتی۔

ظہران ممدانی کا کہنا تھا کہ انتظامیہ اس قانونی پہلو کا جائزہ لے رہی ہے کہ آیا اگر نیتن یاہو اقوام متحدہ کی جنرل اسمبلی کے اجلاس میں شرکت کے لیے نیویارک آئیں تو بین الاقوامی فوجداری عدالت کے وارنٹ کے تحت ان کی گرفتاری ممکن ہے یا نہیں۔

انہوں نے وفاقی حکومت پر زور دیا کہ اگر قانونی طور پر ممکن ہو تو نیتن یاہو کے خلاف جاری وارنٹ پر عمل درآمد کیا جائے۔

میئر نیویارک نے مزید کہا کہ “نیتن یاہو جنگی مجرم ہیں اور ان کی اصل جگہ ہیگ میں بین الاقوامی فوجداری عدالت کے سامنے ہے، جہاں ان پر مبینہ جرائم کی سماعت ہونی چاہیے۔”

واضح رہے کہ اسرائیلی وزیراعظم بنیامین نیتن یاہو کی ستمبر میں اقوام متحدہ کی جنرل اسمبلی کے اجلاس میں شرکت کے لیے نیویارک آمد متوقع ہے، جس کے تناظر میں ان کے خلاف جاری آئی سی سی وارنٹ پر ایک بار پھر بحث شروع ہوگئی ہے۔

یو این آئی۔ ع ا۔