جموں، جموں و کشمیر کے لیفٹیننٹ گورنر منوج سنہا نے امرناتھ یاترا کے دوران عہدیداروں کو ہدایت دی ہے کہ یاتریوں کی مسلسل بڑھتی ہوئی آمد کے پیش نظر افرادی قوت کی مؤثر تعیناتی کو یقینی بنایا جائے تاکہ پوری یاترا کے دوران انتظامات بلا رکاوٹ جاری رہیں۔

بدھ کے روز بھگوتی نگر یاتری نواس کے دورے کے موقع پر لیفٹیننٹ گورنر نے جاری شری امرناتھ جی یاترا کے لیے فراہم کی جانے والی سہولیات اور خدمات کا جائزہ لیا۔ اس دوران انہوں نے جموں و کشمیر پولیس، فوج، سیکورٹی فورسز، شری امرناتھ شرائن بورڈ اور سول انتظامیہ کے حکام سے ملاقات کرکے یاتریوں کی رہائش، سہولتوں اور انتظامات پر تفصیلی بریفنگ حاصل کی۔

منوج سنہا نے حکام کی محنت اور خدمات کو سراہتے ہوئے زور دیا کہ ہر یاتری کو “دیوی مہمان” سمجھ کر اس کی خدمت کی جائے۔ انہوں نے کہا کہ محکمۂ موسمیات کی پیش گوئیوں پر مسلسل نظر رکھی جائے اور موسم کی کسی بھی اچانک تبدیلی سے نمٹنے کے لیے مکمل طور پر تیار رہا جائے۔

انہوں نے کہا کہ صرف بارہ دنوں میں امرناتھ یاترا میں شریک ہونے والے عقیدت مندوں کی تعداد تین لاکھ سے تجاوز کر چکی ہے، اس لیے زائرین کو ہموار، محفوظ اور بے فکر سفر فراہم کرنا انتظامیہ کی اولین ترجیح ہے۔لیفٹیننٹ گورنر نے یاتریوں کی رجسٹریشن، آرام دہ رہائش اور سفری انتظامات کو ہر مرحلے پر مؤثر اور منظم بنانے کی ہدایت بھی دی۔اس موقع پر انہوں نے جموں خطے کی سیاحت اور ثقافت کو فروغ دینے پر بھی زور دیتے ہوئے متعلقہ حکام کو ہدایت دی کہ یاتریوں کے لیے جموں ڈویژن کے اہم مذہبی اور سیاحتی مقامات کے سیر و سیاحت کے پروگرام ترتیب دیے جائیں۔ ساتھ ہی مقامی دستکاری اور ہینڈلوم مصنوعات کی بھرپور تشہیر کی جائے تاکہ زائرین واپسی پر جموں کی یادگار کے طور پر مقامی ہاتھ سے تیار اشیا اپنے ساتھ لے جا سکیں۔

یواین آئی ۔م ا ع

جموں، جموں و کشمیر کے جموں میں واقع بھگوتی نگر یاتری نیواس آدھار کیمپ سے بدھ کو سخت حفاظتی انتظامات کے درمیان 6,200 سے زائد عقیدت مندوں کا نیا جتھہ جنوبی کشمیر ہمالیہ میں واقع شری امرناتھ گپھا کے دونوں آدھار کیمپوں کے لیے روانہ ہوا۔

حکام نے بتایا کہ آج علی الصبح جموں میں واقع آدھار کیمپ سے 230 ہلکی اور بھاری موٹر گاڑیوں کے قافلے میں 6,251 عقیدت مند روانہ ہوئے۔ ان میں 2,985 عقیدت مند بالٹال راستے اور 3,266 عقیدت مند پہلگام راستے سے بابا برفانی کی مقدس گپھا کی یاترا پر نکلے۔ انہوں نے بتایا کہ یاترا کے محفوظ، اور خوش اسلوبی سے انعقاد کے لیے سول انتظامیہ، پولیس، سیکورٹی فورسز اور شری امرناتھ شرائن بورڈ کی جانب سے کثیر الجہتی سیکورٹی اور مربوط انتظامات کیے گئے ہیں۔ اس دوران، شری امرناتھ یاترا نے نیا ریکارڈ قائم کرتے ہوئے محض 13 دنوں میں تین لاکھ عقیدت مندوں کا ہندسہ عبور کر لیا ہے۔

جموں و کشمیر انتظامیہ نے عقیدت مندوں سے اپیل کی ہے کہ وہ صرف رجسٹریشن کی تصدیق ہونے اور مقررہ تاریخ پر ہی یاترا کے لیے روانہ ہوں۔ بغیر رجسٹریشن والے کسی بھی عقیدت مند کو آدھار کیمپوں کی طرف جانے کی اجازت نہیں دی جائے گی۔ قابل ذکر ہے کہ جموں و کشمیر کے لیفٹیننٹ گورنر منوج سنہا نے دو جولائی کو جموں سے شری امرناتھ یاترا کے پہلے جتھے کو روانہ کیا تھا۔

یو این آئی۔ ایم جے

جموں ، جموں و کشمیر کے ضلع راجوری کے تھانہ منڈی علاقے میں مشتبہ دہشت گردوں کی موجودگی کی اطلاع ملنے کے بعد سکیورٹی فورسز نے بڑے پیمانے پر سرچ آپریشن شروع کر دیا۔سرکاری ذرائع کے مطابق علاقے میں نصب سی سی ٹی وی کیمروں کی فوٹیج میں دو مشتبہ افراد کو دیکھا گیا، جس کے بعد جموں و کشمیر پولیس، ہندوستانی فوج، سینٹرل ریزرو پولیس فورس (سی آر پی ایف) اور اسپیشل آپریشنز گروپ (ایس او جی) کی مشترکہ ٹیموں نے فوری کارروائی کرتے ہوئے تھنہ منڈی اور اس سے ملحقہ دیہات میں تلاشی مہم شروع کر دی۔ذرائع کا کہنا ہے کہ سکیورٹی اہلکار مشتبہ افراد کا سراغ لگانے کے لیے علاقے کے مختلف مقامات کی باریک بینی سے تلاشی لے رہے ہیں، جبکہ داخلی اور خارجی راستوں پر بھی نگرانی سخت کر دی گئی ہے۔آخری اطلاعات موصول ہونے تک سرچ آپریشن جاری تھا، تاہم کسی گرفتاری یا جھڑپ کی اطلاع نہیں ملی۔

یو این آئی۔م ا ع