نئی دہلی، سپریم کورٹ نے مغربی بنگال کے مدرسوں میں اپنی تقرری کو منظوری دینے کا مطالبہ کرنے والے 350 اساتذہ اور دیگر اسٹاف کی عرضی پیر کو مسترد کر دی مغربی بنگال مدرسہ سروس کمیشن ایکٹ 2008 کو کلکتہ ہائی کورٹ کی سنگل جج بنچ نے غیر آئینی قرار دیا تھا، جس کے بعد ان سبھی کی ملازمت چلی گئی تھی۔ عدالت نے بعد میں اس فیصلے کو برقرار رکھا تھا۔ عرضی گزاروں نے سپریم کورٹ سے کہا کہ ان کی تقرری مستقل تھی اس لیے انہیں مغربی بنگال کی گرانٹ ان ایڈ اسکیم کے تحت تنخواہ ملنی چاہیے۔

جسٹس دیپانکر دتا اور جسٹس اے جی مسیح کی بنچ نے متعلقہ عرضیوں کو یہ کہتے ہوئے مسترد کر دیا کہ وہ سماعت کے قابل نہیں ہیں۔ عدالت عظمی میں 361 سے زیادہ عرضی گزاروں نے 40 سے زیادہ عرضیاں دائر کی تھیں۔ اعلیٰ عدالت نے مارچ 2016 کے کلکتہ ہائی کورٹ کے فیصلے کو برقرار رکھا۔

اس سے پہلے چھ جنوری 2020 کو سپریم کورٹ نے 2008 کے قانون کو آئینی طور پر درست بتایا تھا۔

سپریم کورٹ نے ان عرضیوں کو مسترد کرتے ہوئے کہا کہ 13 عرضی گزاروں کے معاملات گزشتہ حکم کے بعد اس کے سامنے رکھے گئے تھے۔ اعلیٰ عدالت نے کہا تھا کہ اگر یہ 13 عرضیاں اسے راضی کرنے میں کامیاب رہتی ہیں تو باقی عرضی گزاروں کے دعووں کی بھی جانچ کی جائے گی، تاہم کوئی بھی عرضی عدالت کو اپنی بات نہیں سمجھا سکی۔

یو این آئی۔ ایف اے

نئی دہلی، کانگریس کے سابق صدر اور لوک سبھا میں اپوزیشن کے لیڈر راہل گاندھی نے کہا ہے کہ ملک کا تعلیمی نظام بدعنوانی، وصولی اور جانبدار ہوکر طلبہ کے مستقبل کے ساتھ کھلواڑ کر رہا ہے، اس لیے طلبہ کو اب متحد ہو کر لڑنا ہوگا تاکہ ’طلبہ کی گونج‘ مہم تعلیمی نظام میں انقلاب کا ذریعہ بنے مسٹر گاندھی نے پیر کو سوشل میڈیا ’ایکس‘ پر ایک پیغام میں کہا کہ ’بدعنوانی ، ناانصافی، جانبداری اور بے ایمانی‘ جیسے الفاظ ان کے نہیں، بلکہ ملک کے طلبہ کے ہیں، جو آج کے تعلیمی نظام کی عکاسی کر رہے ہیں۔ انہوں نے الزام لگایا کہ بچوں کا مستقبل سنوارنے کے لیے بنایا گیا تعلیمی نظام اب ایک ’بے ایمان وصولی نظام‘ میں بدل چکا ہے، جو طلبہ اور ان کے خاندانوں کو قرض، تناؤ اور مایوسی کی طرف دھکیل رہا ہے۔ انہوں نے کہا کہ تعلیمی نظام میں پھیلی بدعنوانی نے پیپر لیک مافیا کو جنم دیا ہے، جو لاکھوں طلبہ کی برسوں کی محنت ایک جھٹکے میں برباد کر دیتا ہے۔ ان کا الزام تھا کہ اس نظام میں قصوروار وینڈروں اور افسران کو کارروائی کے بجائے نئے ٹینڈر اور ترقیاں ملتی ہیں جبکہ سزا طلبہ بھگتتے ہیں اور انہیں ٹوٹے ہوئے خوابوں اور غیر یقینی مستقبل کے ساتھ چھوڑ دیا جاتا ہے۔

کانگریس رہنما نے کہا، ”وزیر اعظم نریندر مودی کی قیادت والی مرکزی حکومت اور مرکزی وزیر تعلیم اس پورے معاملے پر خاموشی اختیار کیے ہوئے ہیں نیز جواب دہی سے بچ رہے ہیں اور میڈیا بھی اس سنگین مسئلے پر خاموش ہے۔ اب بہت ہو چکا ہے اور تعلیمی نظام میں بڑے پیمانے پر تبدیلی کی ضرورت ہے۔“ انہوں نے طلبہ، نوجوانوں اور سرپرستوں سے 17 جولائی کو دہرادون میں منعقد ہونے والے ’طلبہ کی گونج‘ پروگرام میں بڑی تعداد میں شرکت کرکے تعلیمی نظام میں تبدیلی کی اس مہم کو مضبوط کرنے کی اپیل کی ہے۔

یو این آئی۔ ایف اے

نئی دہلی، کانگریس نے وزیر اعظم نریندر مودی پر بدعنوانی کے معاملات کو دبانے اور جوابدہی سے بچنے کا الزام لگاتے ہوئے کہا ہے کہ ان کی حکومت کی اصل پالیسی ‘کم از کم حکمرانی، زیادہ سے زیادہ لیپا پوتی’ کی رہی ہے کانگریس شعبہ مواصلات کے انچارج جے رام رمیش نے پیر کو سوشل میڈیا ‘ایکس’ پر ایک بیان میں کہا کہ مئی 2014 میں وزیر اعظم بننے کے بعد مسٹر مودی نے ‘نہ کھاؤں گا، نہ کھانے دوں گا’ کا نعرہ دیا تھا لیکن یہ دعویٰ پوری طرح سے کھوکھلا ثابت ہوا ہے۔

سابق وزیر اعظم ڈاکٹر منموہن سنگھ نے 8نومبر 2016 کی مسٹر مودی کی نوٹ بندی کے اعلان کو ‘منظم لوٹ اور قانونی لوٹ’ بتانے کا ذکر کرتے ہوئے کہا کہ اس کے بعد گجرات اسٹیٹ پٹرولیم کارپوریشن (جی ایس پی سی) کو او این جی سی میں ملا کر 20 ہزار کروڑ روپے کے مبینہ گھوٹالے کو چھپانے، انتخابی بانڈ اسکیم کے ذریعے مبینہ ‘چندہ دو، دھندا لو’ نظام، رافیل سودے پر اٹھے سوالات، بغیر شفافیت اور جوابدہی والے پی ایم کیئرز فنڈ اور آیوشمان بھارت اور پردھان منتری کوشل وکاس یوجنا جیسی بڑی سرکاری اسکیموں میں کنٹرولر اینڈ آڈیٹر جنرل (سی اے جی) کی رپورٹوں میں سامنے آنے والی بے ضابطگیوں کا ذکر کیا۔

مسٹر رمیش نے کہا کہ گزشتہ چند ہفتوں میں کئی اور واقعات سامنے آئے ہیں، جنہوں نے ‘نہ کھاؤں گا، نہ کھانے دوں گا’ کے دعوے کی حقیقت کو بے نقاب کر دیا ہے۔ انہوں نے الزام لگایا کہ ایودھیا کے رام مندر میں چڑھاوے کی چوری کا معاملہ ملک کے عقیدے کے ساتھ دھوکہ ہے اور کہا کہ سپریم کورٹ کی جانب سے مرکزی تحقیقاتی بیورو (سی بی آئی) کے حکم کے باوجود اروناچل پردیش کے وزیر اعلیٰ عہدے پر برقرار ہیں، جبکہ مدھیہ پردیش کے وزیر اعلیٰ پر اپنے اہل خانہ کو مبینہ طور پر فائدہ پہنچانے کے سنگین الزامات لگے ہیں اور وہ بھی عہدے پر برقرار ہیں۔

کانگریس رہنما نے الزام لگایا کہ اپوزیشن جماعتوں کو مختلف قسم کے معاشی ترغیبات دے کر توڑا جا رہا ہے۔ مرکزی حکومت میں ایک ریاستی وزیر اپنی ہی وزارت کی اسکیم کا فائدہ اٹھانے کے الزامات کے باوجود عہدے پر برقرار ہیں۔ اسی طرز پر وزارت ماحولیات، جنگلات اور موسمیاتی تبدیلی میں مرکزی وزیر کے چار قریبی ساتھیوں کو اچانک ہٹائے جانے، وزارت سڑک ٹرانسپورٹ اور شاہراہوں کی ای-20 پالیسی سے مرکزی وزیر کے خاندان کو مبینہ فائدہ پہنچانے اور دہلی کی وزیر اعلیٰ کے خاندان کی انتظامی کاموں میں مبینہ مداخلت جیسے معاملات کا بھی ذکر کیا۔

انہوں نے کہا کہ مسٹر مودی ایسے وزیر تعلیم کو بھی عہدے پر برقرار رکھے ہوئے ہیں جن کے دور کار میں امتحانی نظام کرپٹ اور سمجھوتہ زدہ ہو گیا ہے اور اس سے ملک کے کروڑوں نوجوانوں کی امیدوں اور مستقبل کے ساتھ کھلواڑ ہوا ہے۔

مودی حکومت کی پہچان اب ‘کم از کم گڈ گورننس، زیادہ سے زیادہ لپا پوتی’ بن گئی ہے۔ انہوں نے الزام لگایا کہ حکومت کا حقیقی منتر ‘نا کھاؤں گا، نا کھانے دوں گا’ نہیں بلکہ ‘کھاؤں گا، کھانے دوں گا اور کھلاؤں گا’ بن گیا ہے اور زیادہ سے زیادہ گڈ گورننس کی بات کرنے والی حکومت کا کام ‘کم از کم گڈ گورننس، زیادہ سے زیادہ لپا پوتی’ کی پالیسی پر مبنی ہو گیا ہے۔

یو این آئی۔ م الف