بارہمولہ،
گانتمولہ، نارواو بارہمولہ کی رہائشی اور مسٹر ناصر حسین میر کی صاحبزادی عروج ناصر میر کو یونیورسٹی آف کشمیر کے ، 21ویں کانووکیشن کے موقع پر بیچلر آف وِژول آرٹس میں گولڈ میڈل سے نوازا گیا۔

یہ اعزاز انہیں شعبہ فائن آرٹس میں نمایاں تعلیمی کارکردگی پر دیا گیا۔ تقریب کے دوران یہ تمغہ نائب صدرِ ہند کی جانب سے پیش کیا گیا۔

عروج کی اس کامیابی کو مقامی سطح پر سراہا جا رہا ہے۔

جموں، اینٹی کرپشن بیورو نے اودھمپور اور ریاسی اضلاع میں دو روزہ خصوصی کارروائی کے دوران متعدد اسٹون کرشر یونٹس پر چھاپے مارے اور بڑے پیمانے پر غیر قانونی کان کنی کے شواہد برآمد کیے۔ یہ کارروائی اس وقت عمل میں لائی گئی جب بیورو کو جموں صوبے کے مختلف حصوں میں ممنوعہ معدنیات کی غیر قانونی نکاسی سے متعلق متعدد شکایات موصول ہوئیں۔

ابتدائی تحقیقات میں انکشاف ہوا تھا کہ کچھ معدنیات ٹھیکیداروں اور محکمۂ مائننگ و ایکولوجی کے چند اہلکاروں کے درمیان مبینہ گٹھ جوڑ کے باعث غیر قانونی سرگرمیوں کو خفیہ طور پر جاری رہنے کی اجازت دی جارہی تھی۔ انہی اطلاعات کی بنیاد پر اے سی بی کی ٹیموں نے دو دن تک مربوط چھاپہ مار کارروائیاں کیں جن کی قیادت متعلقہ محکموں کے گزٹیڈ افسران کر رہے تھے۔

چھاپوں کے دوران متعدد مقامات سے اہم ریکارڈ، الیکٹرانک ڈیوائسز اور دیگر قابلِ ثبوت دستاویزات ضبط کی گئیں۔ افسران کے مطابق کارروائی کے دوران بڑی تعداد میں جعلی ’فارم اے‘ ٹرانزٹ پاسز بھی برآمد ہوئے، جن کا استعمال معدنیات کی غیر قانونی نقل و حمل کے لیے کیا جاتا تھا۔

حکام نے بتایا کہ جن تمام اسٹون کرشر یونٹس کا معائنہ کیا گیا وہ قواعد و ضوابط کی سنگین خلاف ورزیوں کے مرتکب پائے گئے اور غیر قانونی کان کنی میں ملوث تھے، جس سے ماحولیات کو شدید نقصان پہنچ رہا تھا۔

اے سی بی نے ضبط شدہ ریکارڈ کی جانچ اور اس پورے نیٹ ورک میں شامل افسران، ٹھیکیداروں اور دیگر افراد کے رول کی تحقیقات شروع کر دی ہیں۔ بیورو کے مطابق قدرتی وسائل کے بے دریغ استحصال اور بدعنوانی کے خلاف سخت کارروائی جاری رہے گی تاکہ ایسے غیر قانونی دھندوں پر مؤثر طریقے سے روک لگائی جاسکے۔

یو این آئی۔ ارشید بٹ

سری نگر،رمضان المبارک کے دوسرے جمعہ کے موقع پر تاریخی جامع مسجد سرینگر میں ہزاروں فرزندانِ توحید کے ایک عظیم الشان اجتماع سے خطاب کرتے ہوئے میرواعظِ کشمیرمولوی محمد عمر فاروق نے مشرقِ وسطیٰ کے مسلسل بگڑتے ہوئے حالات پر گہری تشویش کا اظہار کیا اور عالمی برادری سے فلسطین کے لیے فوری انصاف اور خطے میں پائیدار امن یقینی بنانے کا مطالبہ کیا۔

انہوں نے کہا کہ غزہ اور مغربی کنارے میں اسرائیل کی جانب سے جاری ظلم و جبر نے فلسطینی عوام کی زندگی اجیرن بنا دی ہے۔ بین الاقوامی احتساب کے فقدان نے اسرائیل کو مزید دلیر بنا دیا ہے اور وہ جانتے بوجھتے ہوئے اپنی غیر انسانی کارروائیوں میں اضافہ کر رہا ہے۔

میرواعظ نے کہا کہ اسرائیل کی جانب سے فلسطینیوں کی زمینوں پر قبضے کو باقاعدہ شکل دینا، انہیں ان کی سرزمین سے بے دخل کرنا اور غزہ میں جاری نسل کشی، عالمی قانون اور عالمی اخلاقیات کے لیے ایک بدترین دھبہ ہے۔

انہوں نے مشرقِ وسطیٰ میں بڑھتی ہوئی امریکی فوجی موجودگی کو بھی خطرناک قرار دیتے ہوئے کہا کہ یہ پورے خطے کو ایک بڑے تصادم کی طرف دھکیلنے کا باعث بن سکتی ہے، جس کے اثرات عالمی امن تک پھیل سکتے ہیں۔

کشمیر اور ایران کے دیرینہ ثقافتی و مذہبی روابط کا ذکر کرتے ہوئے میرواعظ نے کہا کہ بڑی تعداد میں کشمیری طلبہ ایران میں زیرِ تعلیم ہیں، جس کے باعث وہاں جنگی نوعیت کی صورتحال سے والدین اور اہلِ خانہ سخت پریشان ہیں۔ انہوں نے ایرانی عوام، وہاں مقیم کشمیری طلبہ اور پورے خطے کے امن و استحکام کے لیے خصوصی دعا کی۔

خطے کی دوسری صورتحال کا حوالہ دیتے ہوئے میرواعظ نے پاکستان اور افغانستان کے درمیان حالیہ کشیدگی پر افسوس کا اظہار کیا اور کہا کہ دونوں مسلم ممالک ماہِ مقدس میں آپس میں برسرِپیکار ہیں جو انتہائی افسوسناک ہے۔

یو این آئی۔ ارشید بٹ