کابل، پاکستانی فوج نے افغانستان کے مختلف حصوں میں فضائی آپریشن کیا ہے جن میں دارالحکومت کابل کے ساتھ ساتھ قندھار اور پکتیا کے صوبے بھی شامل ہیں۔یہ اطلاع افغان حکومت کے ترجمان نے دی ہے۔

ایک بیان میں افغان حکام نے کہا کہ پاکستانی فورسز نے کچھ مخصوص علاقوں کو فضائی حملوں کا نشانہ بنایا اور مقامی وقت کے مطابق تقریباً صبح ڈھائی بجے کابل کے مرکزی علاقے میں متعدد بڑے دھماکے رپورٹ کیے گئے۔

ترک میڈیا کے مطابق افغان حکومت کے ایک ترجمان نے دعویٰ کیا ہے کہ حملوں میں کسی جانی نقصان کی اطلاع نہیں ملی مگر اسلام آباد نے اس سے کہیں زیادہ سنگین صورتِ حال پیش کی ہے۔

پاکستانی وزیراعظم کے ترجمان مشرف زیدی نے کہا کہ جوابی کارروائیوں میں 133 افغان فوجی ہلاک اور 200 سے زیادہ زخمی ہوئے ہیں۔

ان کے بقول پاکستانی فورسز نے 27 افغان فوجی پوسٹس، دو کور ہیڈکوارٹرز، اور 80 سے زائد ٹینکوں اور زرہ بکتر گاڑیوں کو تباہ کر دیا ہے۔

پاکستانی سکیورٹی ذرائع نے کہا کہ قندھار میں حملوں کے دوران ایک گولہ بارود کا ڈپو اور ایک لاجسٹکس بیس تباہ ہو گئے۔

دریں اثنا افغانستان کی وزارتِ دفاع نے کہا کہ ڈیورنڈ لائن کے ساتھ پاکستانی مقامات کو نشانہ بنانے کے لیے افغان فورسز کی جوابی کارروائیاں آدھی شب ختم ہو گئی ہیں۔

جمعرات کو ایک چار گھنٹے طویل سرحدی جھڑپ کے دوران کم از کم آٹھ افغان اور دو پاکستانی فوجی ہلاک ہو گئے تھے۔

یہ کشیدگی پچھلے ہفتے کے فضائی حملوں کے بعد سامنے آئی ہے جن کے بارے میں اسلام آباد کا کہنا تھا کہ ان میں 70 “دہشت گرد” ہلاک ہوئے جبکہ اقوامِ متحدہ نے شہری ہلاکتوں کی رپورٹس دی تھیں۔

اقوامِ متحدہ کے سیکریٹری جنرل انتونیو گوٹیرِش نے ان جھڑپوں پر تشویش کا اظہار کیا ہے۔

ان کے ترجمان اسٹیفان ڈوجارک نے کہا کہ گوٹیرِس “متعلقہ فریقین پر زور دیتے ہیں کہ وہ بین الاقوامی قانون کے تحت اپنی ذمہ داریوں کی پابندی کریں” اور سفارتی حل تلاش کریں

پاکستان کا الزام ہے کہ عسکریت پسند افغان علاقے سے کارروائیاں کر رہے ہیں جسے کابل مسترد کرتا ہے۔

یو این آئی۔ ع ا۔

واشنگٹن، صدر ڈونلڈٹرمپ کو وائٹ ہائوس میں ایران اور روس یوکرین پر انٹیلی جنس بریفنگ دی گئی ہے۔

صدر ٹرمپ کو ایران کے ساتھ جنیوا میں مذاکرات کے تیسرے دور پر بھی بریفنگ دی گئی ہے جو آج ہو رہے ہیں۔

ٹرمپ کو مشیروں نے تجویز دی ہے کہ ایران پر پہلا حملہ اسرائیل کی جانب سے ہو تو بہتر ہو گا کیونکہ اسرائیلی حملہ ایران کو جوابی کارروائی پر مجبور کرے گا جس سے جوابی کارروائی کےلیے امریکہ میں حمایت حاصل کرنے میں مدد ملے گی۔

یہ بھی تجویزپیش کی گئی ہے کہ پہلے امریکہ یا اس کے اتحادی پر حملہ ہو تو زیادہ امریکی عوام جنگ برداشت کرنے کو تیار ہوں گے۔

امریکی اخبار پولیٹیکو کا دعویٰ ہے کہ رائے شماری میں امریکی عوام ایران میں قیادت کی تبدیلی کی حمایت کرتے ہیں واشنگٹن میں ایران کے ساتھ کشیدگی کے سفارتی حل کی امیدیں ماند پڑ رہی ہیں۔

ٹرمپ کو تجویز پیش کی گئی ہے کہ اسرائیل پہلے حملہ کرے پھر جوابی کارروائی پر امریکی حملوں کو سیاسی جواز مل جائے گا۔

یو این آئی۔ ع ا۔

جنیوا، ایرانی وزیر خارجہ عباس عراقچی نے کہا ہے کہ امریکہ سے بات چیت اچھی رہی اور دونوں ملک ممکنہ معاہدے کے قریب ہیں۔

غیر ملکی میڈیا کے مطابق ایران اور امریکہ کے درمیان مذاکرات کا تیسرا دور سوئٹزرلینڈ کے شہر جنیوا میں جاری ہے۔

الجزیرہ کے مطابق ایرانی وزیر خارجہ سے گزشتہ روز مذاکرات میں وقفے کے دوران گفتگو کرتے ہوئے خوشخبری سنائی ہے کہ امریکہ سے بات چیت اچھی رہی ہے اور دونوں ملک ممکنہ معاہدے کے قریب ہیں۔

عباس عراقچی کا مزید کہنا تھا کہ اگرچہ کچھ معاملات پر ابھی بھی اختلاف رائے ہیں، جوہری ہتھیاروں اور پابندیوں کے معاملات پر اب ایک مفاہمت کے بہت قریب پہنچ چکے ہیں۔ یہ معاہدہ ممکنہ جنگ کو روک سکتا ہے۔

ان کا کہنا تھا کہ ایران پر عائد پابندیوں میں ریلیف کے معاملے پر ہم نے واضح طور پر اپنے مطالبات پیش کیے۔ اور فیصلہ کیا گیا کہ اگلے سیشن میں ان معاملات پر مزید تفصیل سے غور کیا جائے گا۔

دوسری جانب ترجمان وزارت خارجہ نے ایرانی ٹیلی ویژن کو بتایا کہ مذاکرات بہت سنجیدہ تھے اور کئی اقدامات ایسے اٹھائے گئے ہیں جن پر مزید ممالک سے مشاورت کی ضرورت ہے، جس سے واضح ہوتا ہے کہ یہ مذاکرات تیسرے مرحلے سے آگے بڑھنا چاہتے ہیں۔

واضح رہے کہ سوئٹزرلینڈ کے شہر جنیوا میں عمان کی ثالثی میں ایران امریکہ مذاکرات کے تیسرے دور میں بات چیت کے دوران وقفے کے دوران یہ بات چیت ہوئی ہے۔

یو این آئی۔ ع ا۔