مطالبات کے حق میں جموں وکشمیرکے سرکاری ملازمین کاانوکھاطریقہ
بازوﺅں پرسیاہ پٹیاں باندھ کرکیا علامتی احتجاج
سری نگر: سرکاری ملازمین نے دیرینہ مطالبات کولیکر منگل کے روزدوران ڈیوٹی بازوﺅں پر سیاہ پٹیاں باندھ کر اپناعلازمتی احتجاج درج کرایا۔ملازم انجمنوںکے بڑے فورم EJCCکی کال پرکئے گئے اس پُرامن احتجاج کیلئے فورم نے تمام مستقل وعارضی ملازمین کا شکریہ اداکرتے ہوئے کہاکہ جائز مطالبات کو منوانے کیلئے احتجاج کا جمہوری حق آئندہ بھی استعمال کیاجائے گا۔جے کے این ایس کے مطابق لاکھوں مستقل وعارضی ملازمین کے مطالبات کو اُجاگر کرانے کیلئے ملازم انجمنوں کے مشترکہ فورم ایمپلائز جوائنٹ کنسلٹیٹو کمیٹیEJCCنے 17جون کو سیاہ پٹیاں باندھ کر احتجاج کی کال دی تھی ۔

ملازمین کے مطالبات بشمول جی پی فنڈکی فراہمی ،ریٹائرڈ ملازمین کو مراعات کی واگزاری،اولڈ پیشن اسکیم کانفاذ،ایس آراﺅ43میں ترمیم ،2فیصد ہاﺅس رینٹ کی فراہمی،میڈیکل الاﺅنس اور60 ہزار سے زیادہ ڈیلی ویجروں،کیجول لیبروں اور فیرپرائس شاپ ڈیلروںکی مستقلی کیساتھ ساتھ EJCC جموں وکشمیر بینک کی جانب سے گزشتہ 2مہینوںکے دوران ملازمین کے قرضوںکی دو،دو قسطیں کا ٹے جانے پر بھی نالاں ہے۔

منگل کے روز ای جے سی سی کی کال پر عمل کرتے ہوئے مختلف سرکاری محکموںمیں تعینات عارضی اور مستقل ملازمین نے اپنے دفتروں اور فیلڈ میں ڈیوٹیاں انجام دینے کے دوران اپنی بازوﺅں پرکالی پٹیاں باندھ رکھی تھیں۔اس دوران ملازمین اپنے فرائض بھی انجام دیتے رہے تاہم انہوںنے بازوﺅں پر سیاہ پٹیاں باندھ کر اپنے مطالبات کو سرکار اور انتظامیہ کے اعلیٰ ذمہ داروںکی نوٹس میں لانے کیلئے احتجاج کایہ پُرامن طریقہ اختیار کیا ۔

EJCCکے ترجمان نے کہاکہ کشمیر وادی کیساتھ ساتھ جموں صوبے میں بھی ملازمین نے فورم کی کال پر دوران ڈیوٹی بازوﺅں پرکالی پٹیاں باندھ رکھی تھیں لیکن وہ اپنے فرائض چاہئے دفتروں میں یا فیلڈ میں انجا م دیتے رہے ۔ترجمان نے کہاکہ حکومت نے بار بارکی یقین دہانیوں کے باوجود اپنے ملازمین کاکوئی جائز مطالبہ اب تک پورا نہیں کیاہے ،جسکے باعث ملازمین کی حق تلفی کیساتھ ساتھ اُن کیساتھ ناانصافی بھی ہورہی ہے ۔

فورم ترجمان کے مطابق EJCCکے چیئرمین اعجاز احمدخان نے جمہوری حق کااستعمال کرتے ہوئے سیاہ پٹیاں باندھ کر احتجاج کرنے پر ملازمین کا شکریہ ادا کیا ،اور کہاکہ ایمپلائز جوائنٹ کنسلٹیٹو کمیٹیEJCC،تمام مستقل و عارضی اور ریٹائرڈ ملازمین کے جائز مطالبات کو اُجاگر کرنے کیلئے پُرامن انداز میں اپنی آوازبلند کرتی رہے گی ۔انہوںنے یاددہانی کراتے ہوئے کہاکہ حاضرسروس ملازمین کیلئے جی پی فنڈ اورریٹائرڈ ملازمین نے بقایاجات ومراعات حاصل کرنا کارِدارد والا معاملہ بنادیاگیاہے ۔انہوںنے کہاکہ یہ بات انتہائی افسوسناک ہے کہ جائز مطالبات کو پس پشت ڈالکر ملازمین کو مایوس کیاجارہاہے ۔

اعجاز احمدخان نے مزید کہاکہ منگل17جون کو لاکھوں ملازمین نے سیاہ پٹیاں باندھ کر ارباب حل وعقد تک پُرامن انداز میں اپنی بات پہنچائی ہے اوراب یہ حکومت وانتظامیہ کی ذمہ دار ی ہے کہ وہ اپنے ملازمین کے جائز مطالبات کو پورا کرنے کی پہل کرے تاکہ ملازمین کامتزلزل شدہ اعتماد بحال ہوسکے اوروہ اپنے فرائض حسب روایت احسن طریقے سے انجام دیتے رہیں ۔سینئر ٹریڈیونین رہنما اعجاز احمدخان نے لیفٹنٹ گورنر منوج سنہا ،وزیراعلیٰ عمرعبداللہ اور چیف سیکرٹری اتل ڈلو سے پھراپیل کی کہ ملازمین کے دیرینہ اور جائز مطالبات کو پورا کرنے کیساتھ ساتھ مشکلات بشمول جموں وکشمیر بینک کی ملازمین کے تئیں ناانصافی پر مبنی پالیسی کو رکوانے کیلئے فوری اقدامات کئے جائیں ،تاکہ ملازمین اپنے فرائض انجام دینے کے دوران کسی مایوسی اور بددلی کے شکار نہ رہیں ۔اُدھر جموں صوبے میں بھی سرکاری ملازمین نے اپنے مذکورہ بالامطالبات کو لیکر اپنے اپنے دفترمیں بطور احتجاج بازوﺅں پرکالی پٹیاں باندھ رکھی تھیں۔EJCCکے جنرل سیکرٹری ونود شرما نے جموں میں میڈیا سے بات کرتے ہوئے کہاکہ ایک جانب حکومت نے ملازمین کے جائز مطالبات کو سردخانے میں ڈال رکھاہے اوردوسری جانب جموں وکشمیر بینک کی انتظامیہ کے ملازمین کے تئیں غیر منصفانہ پالیسی اپنا رکھی ہے ۔

انہوںنے کہاکہ جنوری2025سے ملازمین کے جی پی فنڈ کیس سرکاری ٹریجریوںمیں دھول چاٹ رہے ہیں جبکہ ریٹائرڈ ملازمین اپنی گریجویٹی اور دوسرے بقایات کیلئے سڑکوںکی خاک چھان رہے ہیں ۔ونود شرما نے کہاکہ ڈیلی ویجروںکی کوئی سن نہیں رہاہے ،اورسرکاری ملازمین کے دوسری سارے جائز مطالبات کو پس پشت ڈال دیاگیاہے ۔انہوںنے کہاکہ اگر حکومت نے ہمارے مطالبات کے تئیں منصفانہ پالیسی نہ اپنائی تو ساڑھے چار لاکھ سے زیادہ ملازمین بڑے احتجاج کیلئے مجبور ہوجائیں گے ۔