واشنگٹن، امریکیوں کو مارنے کے رد عمل میں صدر ڈونلڈ ٹرمپ کی ہدایت پر رات کو امریکی فوج نے ایران پر شدید حملہ کیا ہے۔

صدر ٹرمپ نے بتایا کہ آج رات ایران پر شدید حملہ کیا گیا ہے، جو امریکیوں کو مارنے کا ردعمل ہے۔ انھوں نے کہا کہ انھیں فوجیوں کی ہلاکت پر افسوس ہے، جو فوجی مارے گئے وہ اس مقصد کے لیے لڑ رہے تھے کہ ایران کبھی جوہری ہتھیار حاصل نہ کر سکے۔

سینٹکام نے بتایا کہ ایران پر مسلسل نویں رات فضائی حملوں کا سلسلہ مکمل کر لیا گیا ہے، جن میں ایرانی فوجی کمانڈ سینٹرز اور فضائی دفاعی نظام کو نشانہ بنایا گیا، ساحلی نگرانی کے مراکز، میزائل اور ڈرون لانچ سائٹس کو بھی نشانہ بنایا گیا۔

سینٹ کام کے مطابق صدر ٹرمپ کی ہدایت پر ایران پر شام 7 بجے فضائی حملے شروع کیے گئے، یہ امریکی حملے ایرانی فوجی صلاحیتوں کو مزید کمزور کرنے کے لیے جاری رہیں گے۔

دوسری طرف ایرانی سرکاری میڈیا نے خبر دی ہے کہ جنوبی ایران کے صوبے ہرمزگان، بوشہر اور جنوبی شہر خورموج میں دھماکوں کی آوازیں سنی گئیں۔ تسنیم خبر رساں ایجنسی کے مطابق امریکی سینٹرل کمانڈ کی جانب سے اسلامی جمہوریہ ایران پر حملوں کی نئی لہر کا اعلان کیے جانے کے فوراً بعد ایران کے 5 شہروں میں، جن میں شمال مغرب کا بڑا شہر تبریز اور 2 اہم بندرگاہیں بھی شامل ہیں، دھماکوں کی آوازیں سنی گئی ہیں۔

عینی شاہدین اور مقامی رپورٹرز نے تسنیم کو بتایا کہ تبریز، جنوب مشرقی ساحلی شہروں چابہار اور کنارک، نیز جنوب مغربی توانائی کے مراکز بندر ماہشہر اور بندر امام خمینی میں دھماکوں کی آوازیں سنی گئیں۔ یہ اطلاعات اس کے چند ہی منٹ بعد سامنے آئیں جب سینٹ کام نے کہا کہ اس نے ایرانی اہداف کے خلاف حملوں کے ایک نئے مرحلے کا آغاز کر دیا ہے۔

امریکی حکام کے مطابق یہ کارروائی جاری مہم کا حصہ ہے، جس کا مقصد آبنائے ہرمز میں تجارتی جہاز رانی کو لاحق خطرات کا خاتمہ کرنا ہے۔

یو این آئی۔ ع ا۔

واشنگٹن، امریکی وزیر خارجہ مارکو روبیو نے کہا ہے کہ امریکہ 3 فوجیوں کی ہلاکت کے باوجود تنازع کے حل کے لیے تیار ہے۔

امریکی وزیر خارجہ مارکو روبیو نے لبنانی صدر جوزف عون سے ملاقات کے بعد میڈیا سے گفتگو میں کہا کہ امریکہ مسلسل 9 دنوں کے فضائی حملوں تین امریکی فوجیوں کی ہلاکت کے باوجود سفارتی حل کا خواہاں ہے۔

مارکو روبیو کا بیان ایسے وقت سامنے آیا ہے جب امریکہ ایران کے خلاف فوجی کارروائی جاری رکھے ہوئے ہے۔ سینٹکام کا کہنا ہے کہ امریکی فوج نے ایران پر مسلسل نویں رات فضائی حملوں کا سلسلہ مکمل کر لیا، جن میں ایرانی فوجی کمانڈ سینٹرز اور فضائی دفاعی نظام کو نشانہ بنایا گیا۔

سینٹکام کے مطابق ساحلی نگرانی کے مراکز، میزائل اور ڈرون لانچ سائٹس کو بھی نشانہ بنایا گیا، امریکی فوج نے عندیہ دیا کہ یہ حملے ایرانی فوجی صلاحیتوں کو مزید کمزور کرنے کے لیے جاری رہیں گے۔

یو این آئی۔ ع ا۔

ماسکو، روس نے کہا ہے کہ وہ امریکہ اور ایران، نیز ایران اور عرب ممالک کے درمیان اختلافات کے پرامن حل اور مذاکرات میں تعاون کے لیے تیار ہے، تاہم وہ اپنی جانب سے کوئی کردار مسلط نہیں کرنا چاہتا۔

یہ بات روس کے نائب وزیر خارجہ الیگزینڈر علیموف نے کہی۔

انہوں نے اخبار ازویستیا کو انٹرویو دیتے ہوئے کہا، “ہم امریکہ اور ایران کے ساتھ ساتھ ایران اور عرب ممالک کے درمیان اختلافات کے پرامن حل میں مدد دینے کے لیے تیار ہیں۔ ہمیں ایران اور عرب ممالک کے درمیان مذاکرات کے لیے پلیٹ فارم فراہم کرنے میں خوشی ہوگی، لیکن ہم اپنی خدمات کسی پر مسلط نہیں کرنا چاہتے۔”

انہوں نے بتایا کہ روس اسلام آباد، ریاض اور انقرہ سمیت تمام متعلقہ فریقوں کے ساتھ قریبی رابطے میں ہے۔

علیموف نے کہا، “ہمیں معلوم ہے کہ فریقوں کو دوبارہ مذاکرات کی میز پر لانے کی کوششیں جاری ہیں۔”

یو این آئی /سپوتنک