واشنگٹن، امریکہ کے نائب صدر جے ڈی وینس کے ممکنہ دورۂ پاکستان کے حوالے سے امریکی میڈیا میں متضاد رپورٹس سامنے آئی ہیں، جس سے صورت حال غیر واضح ہو گئی ہے۔

ابتدائی طور پر وائٹ ہاؤس کی جانب سے نائب صدر کی روانگی سے متعلق اطلاعات جاری کی گئیں، جنھیں بعض امریکی میڈیا اداروں نے رپورٹ کرتے ہوئے دعویٰ کیا کہ جے ڈی وینس اسلام آباد کا دورہ کریں گے۔ تاہم کچھ ہی دیر بعد امریکی صدر ڈونلڈ ٹرمپ کے حوالے سے یہ بیان سامنے آیا کہ نائب صدر اسلام آباد نہیں جا رہے۔ میڈیا رپورٹس کے مطابق اس حوالے سے مزید ابہام اس وقت پیدا ہوا جب یہ کہا گیا کہ صدر ٹرمپ اور ان کے نائب ایک ہی وقت میں ایک ہی مقام پر موجود نہیں ہوسکتے۔

اطلاعات کے مطابق اگر صدر ٹرمپ خود اسلام آباد جانے کا فیصلہ کرتے ہیں تو ایسی صورت میں جے ڈی وینس کا دورہ منسوخ ہو سکتا ہے۔

دریں اثنا، فاکس نیوز کو دیے گئے ایک انٹرویو میں صدر ٹرمپ نے بتایا کہ امریکی شخصیات اسٹیو وٹکوف اور جیرڈ کشنر اسلام آباد میں ایرانی حکام کے ساتھ ممکنہ مذاکرات کے لیے روانہ ہو رہے ہیں۔

امریکی فورسز نے آبنائے ہرمز میں ایرانی بحری جہاز پر قبضہ کر لیا، ایرانی فوج کا جواب دینے کا اعلان وال اسٹریٹ جرنل نے رپورٹ کیا کہ امریکی وفد اسلام آباد پہنچنے والا ہے اور اس میں جے ڈی وینس، اسٹیو وٹکوف اور جیرڈ کشنر شامل ہو سکتے ہیں، جب کہ نیویارک پوسٹ کی رپورٹ کے مطابق وینس ممکنہ طور پر خود سفر نہ کریں بلکہ پسِ منظر میں کردار ادا کریں۔

تازہ ترین میڈیا رپورٹس کے مطابق وائٹ ہاؤس کے ایک اہلکار نے تصدیق کی ہے کہ جے ڈی وینس پاکستان جا کر ایران سے مذاکرات میں حصہ لیں گے۔ یاد رہے کہ اسلام آباد میں اس سے پہلے ہونے والے مذاکرات (11–12 اپریل) کسی حتمی معاہدے کے بغیر ختم ہوئے تھے، ایران نے نئی بات چیت میں شرکت سے ہچکچاہٹ ظاہر کی ہے اور امریکہ پر جنگ بندی کی خلاف ورزی کے الزامات بھی لگائے ہیں۔ جب کہ موجودہ جنگ بندی جلد ختم ہونے والی ہے، جس کی وجہ سے یہ دورہ انتہائی اہم ہو گیا ہے۔ جے ڈی وینس کے دورے پر ابھی بھی مکمل یکسوئی نہیں، تاہم امریکہ ہر صورت اسلام آباد میں مذاکرات جاری رکھنا چاہتا ہے، اور پاکستان اس وقت امریکا-ایران سفارتکاری کا مرکزی مقام بن چکا ہے۔

یو این آئی۔ ع ا۔

تہران، ایرانی پولیس نے ملک کے مختلف علاقوں میں بڑے پیمانے پر کریک ڈاؤن کرتے ہوئے دہشت گرد گروہوں سے وابستہ 100 سے زائد کارندوں کو گرفتار کر لیا ہے۔

پولیس چیف بریگیڈیئر جنرل احمد رضا رادان کے مطابق یہ کارروائیاں ملک کی سلامتی کو یقینی بنانے کے لیے کی گئیں، انہوں نے بتایا کہ ایرانی سیکیورٹی فورسز نے حالیہ کارروائیوں کے دوران دہشت گرد گروہوں سے وابستہ 100 سے زائد افراد کو گرفتار کیا ہے۔ بریگیڈیئر جنرل احمد رضا رادان کے مطابق ان آپریشنز کے دوران 3,000 سے زائد ہتھیار، بڑی مقدار میں زندہ گولیوں کا ذخیرہ اور سرد اسلحہ برآمد کیا گیا۔ اس کے علاوہ تقریباً 6,000 نگرانی کے آلات اور جاسوسی کے اوزار بھی قبضے میں لیے گئے اور ان سے منسلک مشتبہ افراد کو بھی حراست میں لے لیا گیا۔

انہوں نے مزید کہا ہمارے سپاہی سرحدوں پر تمام تر ساز و سامان کے ساتھ موجود ہیں اور ان کے ہاتھ ٹرگر پر ہیں۔ رادان نے اس بات پر زور دیا کہ موجودہ سکیورٹی حالات میں فوجی اور سرحدی تیاری کی اہمیت بڑھ گئی ہے۔ گزشتہ روز ایران کی سپاہ پاسداران انقلاب اسلامی (آئی آر جی سی) نے صوبہ مازندران میں امریکہ اور اسرائیل سے وابستہ 69 ایجنٹوں کی گرفتاری کا اعلان کیا تھا۔

رپورٹ کے مطابق یہ نیٹ ورک حساس مقامات کے بارے میں معلومات اکٹھی کرنے اور انہیں منتقل کرنے کے ساتھ ساتھ ایرانی سرزمین کے اندر تخریب کاری کی کارروائیوں کی تیاری کر رہا تھا۔ سکیورٹی فورسز نے انٹیلی جنس مانیٹرنگ اور نگرانی کے بعد یہ کارروائی کی۔

یو این آئی۔ ع ا۔

میو نخ، نیٹو سیکرٹری جنرل مارک روٹے نے دعویٰ کیا ہے کہ ان کا ماننا ہے کہ امریکہ اور یورپی یونین کے تعلقات کو درپیش چیلنجز کے باوجود امریکہ نیٹو سے دستبردار نہیں ہو گا لیکن اس کے لیے ’ایک مضبوط نیٹو کے اندر ایک مضبوط یورپ‘ کی ضرورت ہے۔ بین الاقوامی خبر رساں ادارے کی رپورٹ کے مطابق مارک روٹے نے ایک انٹرویو کے دوران کہا کہ امریکی صدر ڈونلڈ ٹرمپ نیٹو کے بعض ارکان سے واضح طور پر ناراض ہیں اور وہ ٹرمپ کی ناراضگی کو سمجھتے ہیں۔

انہوں نے کہا کہ یورپ نیٹو میں زیادہ سے زیادہ کردار ادا کرنا چاہتا ہے، جس کا مطلب ہے کہ نیٹو ’غیر صحت مندانہ انحصار‘ سے حقیقی شراکت داری پر مبنی ٹرانس ایٹلانٹک اتحاد کی طرف منتقل ہو رہا ہے۔

انہوں نے مزید کہا کہ امریکی جوہری چھتری یورپی سلامتی کی حتمی ضمانت ہے اور انہیں یقین ہے کہ یہ برقرار رہے گی۔ یاد رہے کہ ڈونلڈ ٹرمپ نے حال ہی میں متعدد مواقع پر شکایت کی ہے کہ نیٹو کے یورپی ممبران ایران کے خلاف امریکی فوجی کارروائی کی حمایت کرنے کو تیار نہیں ہیں۔

یو این آئی۔ ع ا۔