سری نگر، محکمہ موسمیات کے حکام نے ہفتہ کے روز بتایا کہ کشمیر میں مسلسل دوسرے دن بھی ہلکی سے درمیانی بارش کا سلسلہ جاری رہا، جبکہ مغربی ڈسٹربنس کے باعث اونچے پہاڑی علاقوں میں ہلکی برف باری بھی ہوئی ہے۔ اگلے دو دنوں تک پورے علاقے میں کہیں کہیں گرج چمک کے ساتھ بارش کی توقع ہے۔

محکمۂ موسمیات کے مطابق وادی کے مختلف علاقوں میں بارش ریکارڈ کی گئی، جہاں سری نگر اور پہلگام میں تقریباً 14.2 ملی میٹر بارش ہوئی، جبکہ شمالی کشمیر میں سب سے زیادہ بارش درج کی گئی جس میں کپواڑہ میں 19 ملی میٹر اور بارہمولہ میں 17 ملی میٹر بارش ریکارڈ ہوئی۔ گلمرگ جیسے مشہور سیاحتی مقام پر 15 ملی میٹر بارش ہوئی، جبکہ جنوبی کشمیر میں نسبتاً کم بارش دیکھی گئی، جہاں کوکرناگ میں 5.2 ملی میٹر اور قاضی گنڈ میں 3.4 ملی میٹر بارش ہوئی، جو چھٹپٹ بارش کی عکاسی کرتی ہے۔

شمالی اور وسطی کشمیر کے بلند و بالا علاقوں، بشمول سونمرگ-زوجیلا پٹی، کپواڑہ اور گریز میں ہلکی برف باری ریکارڈ کی گئی، جبکہ بارش کے باوجود کشمیر ڈویژن کے کئی مقامات پر رات کا درجہ حرارت معمول سے 2 سے 3 ڈگری سیلسیس زیادہ رہا۔ گلمرگ میں کم سے کم درجہ حرارت سب سے کم مائنس 1.5 ڈگری سیلسیس درج کیا گیا، جبکہ سری نگر میں درجہ حرارت 10.7 ڈگری سیلسیس رہا، جو معمول سے تقریباً 2.5 ڈگری سیلسیس زیادہ ہے۔

محکمہ موسمیات نے اگلے 24 گھنٹوں کے دوران جموں و کشمیر کے بیشتر مقامات پر ہلکی سے درمیانی بارش، برف باری اور گرج چمک کے ساتھ چھینٹے پڑنے کی پیش گوئی کی ہے۔ اگلے دو دنوں تک موسم کے غیر مستحکم رہنے کا امکان ہے، جس کے دوران وسیع پیمانے پر بارشیں ہو سکتی ہیں۔

یو این آئی۔ م ع۔ایف اے

جموں، جموں و کشمیر کے لیفٹیننٹ گورنر منوج سنہا نے ہفتہ کو راجوری میں شہید اے ڈی ڈی سی ڈاکٹر راج کمار تھاپا شہید یادگار، میوزیم اور لائبریری کا افتتاح کیا۔

ڈاکٹر تھاپا ‘آپریشن سندور’ کے دوران پاکستان کی بلا اشتعال فائرنگ میں شہید ہو گئے تھے۔ لیفٹیننٹ گورنر نے ڈاکٹر تھاپا کو خراج عقیدت پیش کیا اور ان کی بے لوث خدمت اور عوامی بہبود کے لیے ان کی غیر متزلزل لگن کو یاد کیا۔

انہوں نے کہا کہ “یہ شہید یادگار آنے والی نسلوں کو ترغیب دے گی۔” اس تقریب کے دوران ڈاکٹر تھاپا کی زندگی پر ایک مختصر فلم بھی دکھائی گئی۔

اس موقع پر ڈاکٹر راج کمار تھاپا کے اہل خانہ اور سکیورٹی فورسز، پولیس اور سول انتظامیہ کے اعلیٰ افسران بھی موجود تھے۔

یو این آئی۔ این یو۔

سرینگر،کشمیر کی مختلف سیاسی جماعتوں کے رہنماؤں نے مرکزی حکومت سے پرزور مطالبہ کیا ہے کہ تہاڑ جیل میں بند ممبر پارلیمنٹ انجینئر رشید کو ان کے شدید بیمار والد سے ملاقات کے لیے انسانی بنیادوں پر رہا کیا جائے۔’اپنی پارٹی’ کے صدر الطاف بخاری نے جمعہ کے روز سرینگر کے ایس ایم ایچ ایسہسپتال کا دورہ کیا، جہاں انجینئر رشید کے والد خضر محمد شیخ زیرِ علاج ہیں۔ الطاف بخاری نے بتایا کہ انجینئر رشید کے والد کی حالت تشویشناک ہے اور وہ وینٹی لیٹر پر ہیں۔

الطاف بخاری نے سوشل میڈیا پلیٹ فارم ‘ایکس’ پر وزیر اعظم نریندر مودی اور وزیر داخلہ امیت شاہ سے اپیل کی کہ انجینئر رشید کو فوری طور پر پیرول دی جائے تاکہ وہ اس مشکل گھڑی میں اپنے خاندان کے ساتھ رہ سکیں۔ انہوں نے اسے ایک “انسانی اور باوقار فیصلہ” قرار دیا جس کی پوری وادی میں ستائش کی جائے گی۔

کشمیر کے اہم مذہبی و سیاسی رہنما میرواعظ عمر فاروق نے بھی ہسپتال جا کر خضر محمد شیخ کی عیادت کی۔

میرواعظ نے مرکز پر زور دیا کہ ایک بیٹا اپنے والد کی آخری پکار سن رہا ہے اور یہ ان کی آخری ملاقات بھی ہو سکتی ہے۔

انہوں نے کہا کہ جیلوں میں بند سیاسی قیدیوں کے خاندانوں کا درد دل دہلا دینے والا ہے اور حکومت کو کم از کم انسانی ہمدردی کے ناطے بارہمولہ کے ایم پی کو رہا کرنا چاہیے۔

انجینئر رشید کو اگست 2019 میں دفعہ 370 کی منسوخی سے چند روز قبل این آئی اے نے ‘ٹیرر فنڈنگ’ کے ایک کیس میں گرفتار کیا تھا۔ وہ اس وقت دہلی کی تہاڑ جیل میں عدالتی تحویل میں ہیں۔ حال ہی میں انہوں نے عدالت سے کسٹڈی پیرول ملنے کے بعد پارلیمنٹ کے بجٹ سیشن میں بھی شرکت کی تھی۔

انجینئر رشید کی جماعت ‘عوامی اتحاد پارٹی’ کے ترجمان انعام النبی نے کہا کہ ان کا پورا خاندان اس وقت انتہائی تکلیف دہ دور سے گزر رہا ہے۔ انہوں نے مطالبہ کیا کہ مرکز ہمدردانہ رویہ اختیار کرتے ہوئے عوامی نمائندے کو ان کے والد کی خدمت اور تیمار داری کا موقع فراہم کرے۔

یو این آئی۔م ا ع