جموں و کشمیر

گاندربل کے تلمولہ مندر میں سالانہ کھیر بھوانی میلے میں ہزاروں لوگوں کی شرکت

Published

3 weeks ago

June 22, 2026

سری نگر، ہزاروں عقیدت مندوں نے پیر کے روز گاندربل ضلع کے تلمولہ گاؤں میں مشہور ماتا راگنیا دیوی مندر میں سالانہ کھیر بھوانی میلے میں شرکت کی، جو کشمیری پنڈتوں کے لیے سب سے اہم مذہبی مواقع میں سے ایک سمجھا جاتا ہے۔ اس موقع پر لیفٹیننٹ گورنر منوج سنہا اور پی ڈی پی صدر محبوبہ مفتی بھی یہاں پہنچے۔

جموں و کشمیر کے مختلف حصوں اور ملک بھر سے عقیدت مند صبح سے ہی مندر کے احاطے میں ماتا راگنیا دیوی کے درشن اور پوجا کرنے کے لیے جمع ہونا شروع ہو گئے جنہیں ماتا کھیر بھوانی کے نام سے جانا جاتا ہے۔

عقیدت مندوں کی ایک بڑی تعداد گلاب کی پتیاں اور چراغ لے کر مندر کے احاطے میں واقع مقدس چشمہ کی طرف بڑھتے ہوئے دیکھی گئی۔

مندر کے احاطے میں گونجنے والے بھجن اور بھکت گیتوں کے درمیان، عقیدت مندوں نے امن، خوشحالی اور خوشی کے لیے دعا کی۔

اس سالانہ میلے نے کشمیری پنڈتوں میں پرانی یادیں بھی تازہ کر دیں۔ بہت سے کشمیری پنڈت ہر سال اپنی جڑوں اور ثقافتی ورثے سے دوبارہ جڑنے کے لیے مندر میں واپس آتے ہیں۔ بہت سے عقیدت مندوں نے کشمیر سے اپنے جذباتی تعلق کی بات کی۔ ان کا کہنا تھا کہ اگرچہ انہوں نے کہیں اور سکونت اختیار کر لی ہے اور مادی آسائشیں حاصل کر لی ہیں لیکن حقیقی ذہنی سکون اپنے وطن میں ہی ملتا ہے۔

اس موقع پر لیفٹیننٹ گورنر منوج سنہا نے راگنیا دیوی مندر کا دورہ کیا اور وہاں پوجا کی۔ عقیدت مندوں کے لیے اپنی نیک خواہشات کا اظہار کرتے ہوئے، انہوں نے کہا کہ ماتا راگنیا دیوی کا آشیرواد لوگوں کو ہم آہنگی، ترقی اور روحانی تکمیل کی طرف لے جاتا رہے گا۔ کشمیری پنڈت برادری کے ارکان سے بات چیت کرتے ہوئے لیفٹیننٹ گورنر نے انہیں یقین دلایا کہ تمام عقیدت مندوں کے لیے وسیع انتظامات کیے گئے ہیں۔ انہوں نے مقامی انتظامیہ اور دیگر اسٹیک ہولڈرز کی کاوشوں کو سراہا۔

“آج میں نے سب کی بھلائی، امن اور خوشحالی کے لیے دعا کی ہے۔ ماتا کھیر بھوانی کا کرم سب پر قائم رہے۔ اس سال مقدس مندر میں آنے والے عقیدت مندوں کی تعداد پچھلے برسوں کے مقابلے زیادہ ہے۔ انتظامیہ نے تمام یاتریوں کی سہولت، حفاظت اور ہموار انعقاد کو یقینی بنانے کے لیے وسیع اور فول پروف انتظامات کیے ہیں”۔

گاندربل کے ڈپٹی کمشنر جتن کشور نے بتایا کہ مندر میں صبح سے ہی بڑی تعداد میں عقیدت مند پہنچ رہے ہیں۔ انہوں نے کہا کہ انتظامیہ نے زائرین کے آرام دہ قیام اور روحانی طور پر بھرپور سفر کو یقینی بنانے کی ہر ممکن کوشش کی ہے۔

پی ڈی پی کی صدر محبوبہ مفتی نے مندر کا دورہ کیا اور مقامی باشندوں کی طرف سے کشمیری پنڈتوں کے پرتپاک استقبال پر خوشی کا اظہار کیا۔

انہوں نے فرقہ وارانہ ہم آہنگی کو مضبوط کرنے کی ضرورت پر زور دیا اور لوگوں پر زور دیا کہ وہ کشمیر کی مشترکہ روایات اور وراثت کو برقرار رکھتے ہوئے مستقبل کی طرف دیکھیں۔

انہوں نے نامہ نگاروں کو بتایا، “ہمیں پیچھے مڑ کر نہیں دیکھنا چاہیے، ہمیں آگے دیکھنا چاہیے۔ کشمیری پنڈتوں میں سے جو قوتیں اپنے دکھوں کو ہتھیار بنانا چاہتی ہیں، انہیں مسترد کر دینا چاہیے۔”

بی جے پی جموں و کشمیر کے صدر اور راجیہ سبھا رکن ست شرما نے کہا کہ یاتریوں کی بڑھتی ہوئی تعداد وادی میں پرامن ماحول کی عکاسی کرتی ہے۔ انہوں نے اس بات پر زور دیا کہ میلے میں مختلف برادریوں اور سیاسی پس منظر کے لوگ شرکت کر رہے ہیں اور عقیدت مندوں کی خدمت کر رہے ہیں۔

کانگریس لیڈر اور ایم ایل اے جی۔ میر نے کہا کہ پنڈت کشمیر کا مستقل حصہ رہے ہیں۔ انہوں نے کہا کہ ہندو مسلم بھائی چارے کی جو مثال یہاں نظر آتی ہے، وہ باقی ملک میں نہیں ملتی۔ دریں اثناء حریت چیئرمین میر واعظ عمر فاروق نے کشمیری پنڈت برادری کو اس موقع پر مبارکباد دی۔ انہوں نے کہا کہ یہ دن باہمی احترام، بھائی چارے اور کشمیر کے مشترکہ ورثے کے جذبے کی تجدید کرے جو ہمیں ورثے میں ملا ہے۔

یو این آئی۔ ظ ا۔ م الف

جموں و کشمیر

راجوری: مشتبہ دہشت گردوں کی موجودگی کی اطلاع، سکیورٹی فورسز کا وسیع سرچ آپریشن

Published

1 hour ago

July 14, 2026

Online Desk

جموں ، جموں و کشمیر کے ضلع راجوری کے تھانہ منڈی علاقے میں مشتبہ دہشت گردوں کی موجودگی کی اطلاع ملنے کے بعد سکیورٹی فورسز نے بڑے پیمانے پر سرچ آپریشن شروع کر دیا۔سرکاری ذرائع کے مطابق علاقے میں نصب سی سی ٹی وی کیمروں کی فوٹیج میں دو مشتبہ افراد کو دیکھا گیا، جس کے بعد جموں و کشمیر پولیس، ہندوستانی فوج، سینٹرل ریزرو پولیس فورس (سی آر پی ایف) اور اسپیشل آپریشنز گروپ (ایس او جی) کی مشترکہ ٹیموں نے فوری کارروائی کرتے ہوئے تھنہ منڈی اور اس سے ملحقہ دیہات میں تلاشی مہم شروع کر دی۔ذرائع کا کہنا ہے کہ سکیورٹی اہلکار مشتبہ افراد کا سراغ لگانے کے لیے علاقے کے مختلف مقامات کی باریک بینی سے تلاشی لے رہے ہیں، جبکہ داخلی اور خارجی راستوں پر بھی نگرانی سخت کر دی گئی ہے۔آخری اطلاعات موصول ہونے تک سرچ آپریشن جاری تھا، تاہم کسی گرفتاری یا جھڑپ کی اطلاع نہیں ملی۔

یو این آئی۔م ا ع

جموں و کشمیر

پہلگام دہشت گردانہ حملہ کیس: این آئی اے عدالت نے حافظ سعید کے خلاف غیر ضمانتی وارنٹ جاری کر دیا

Published

1 hour ago

July 14, 2026

Online Desk

جموں، قومی تحقیقاتی ایجنسی (این آئی اے) کی جانب سے پہلگام دہشت گردانہ حملے کے سلسلے میں پاکستان میں مقیم ممنوعہ تنظیم لشکرِ طیبہ کے سرغنہ حافظ سعید کے خلاف سپلیمنٹری چارج شیٹ (تتمہ فردِ جرم) داخل کیے جانے کے چند دن بعد، جموں کی خصوصی این آئی اے عدالت نے ان کے خلاف غیر ضمانتی وارنٹ جاری کر دیا ہے۔

یہ حکم خصوصی این آئی اے عدالت کے جج نے پہلگام حملے کی جاری تحقیقات کے سلسلے میں دائر درخواست پر سماعت کے بعد پاس کیا۔ عدالت کے حکم نامے کے مطابق، کیس (RC No. 02/2025/NIA/JMU) میں مفرور ملزم حافظ محمد سعید کے خلاف غیر ضمانتی وارنٹ جاری کرنے کے لیے ایک درخواست پیش کی گئی تھی، جس پر کارروائی کرتے ہوئے یہ وارنٹ جاری کیا گیا ہے۔

عدالتی حکم نامے میں کہا گیا ہے کہ غیر قانونی سرگرمیوں کی روک تھام کے قانون (یو اے پی اے) 1967 کے تحت نامزد دہشت گرد اور لشکرِ طیبہ کا بانی حافظ سعید، جو سرگودھا، پنجاب (پاکستان) کا رہنے والا ہے، اس وقت پاکستان سے اپنی سرگرمیاں چلا رہا ہے۔ آرڈر کے مطابق

“ملزم جان بوجھ کر اپنی گرفتاری سے بچ رہا ہے، اس لیے این آئی اے نے معاملے میں مزید کارروائی شروع کرنے اور تفتیش کو آگے بڑھانے کے لیے ملزم کے خلاف کھلی تاریخ کا غیر ضمانتی وارنٹ جاری کرنے کی استدعا کی تھی۔”

عدالت نے مزید کہا کہ مقدمے کی منصفانہ، مکمل اور مؤثر تحقیقات کے لیے ملزم کی گرفتاری اور حراستی تفتیش انتہائی ضروری ہے۔ اسی بنیاد پر حافظ محمد سعید کے خلاف غیر ضمانتی وارنٹ جاری کر کے اسے قانون کے مطابق تعمیل کے لیے ڈی آئی جی، این آئی اے، جموں کو بھیج دیا گیا ہے۔

حافظ سعید، جنہیں ہندوستان اور امریکہ کی جانب سے عالمی دہشت گرد قرار دیا جا چکا ہے، 2008 کے ممبئی دہشت گردانہ حملوں کے ماسٹر مائنڈ بھی مانے جاتے ہیں۔ قومی تحقیقاتی ایجنسی ( این آئی اے) نے 6 جولائی 2026 کو پہلگام حملے کے کیس میں ان کے خلاف چارج شیٹ داخل کی تھی۔

یو این آئی۔م ا ع

جموں و کشمیر

لداخ میں غیر قانونی ‘آف روڈنگ’ پر12 بائیکرز اورایس یو وی ڈرائیور کو بھاری جرمانہ

Published

2 hours ago

July 14, 2026

Online Desk

سری نگر، لداخ انتظامیہ نے ماحولیاتی طور پر انتہائی حساس اور جنگلی حیات کے لیے محفوظ علاقوں میں غیر قانونی طور پر گاڑیاں چلانے (آف روڈنگ) کے خلاف سخت ترین کارروائی کی ہے۔ انتظامیہ نے 12 موٹر سائیکل سواروں پر مجموعی طور پر 1.20 لاکھ روپے اور ایک ایس یو وی کے مالک پر 50 ہزار روپے کا بھاری جرمانہ عائد کیا ہے۔ موٹر سائیکل سواروں کے کسی گروپ کے خلاف ممنوعہ علاقوں میں آف روڈنگ پر لداخ انتظامیہ کی یہ اب تک کی پہلی بڑی کارروائی ہے۔

حکام کے مطابق، یہ کارروائی لداخ کے نازک ماحولیاتی نظام کو نقصان پہنچانے والی غیر قانونی آف روڈنگ کی بڑھتی ہوئی سرگرمیوں کو روکنے کے لیے شروع کی گئی مہم کا حصہ ہے۔محکمہ جنگلی حیات (وائلڈ لائف) کی جانب سے دو مختلف مقامات پر کارروائی کی گئی۔

4 جولائی کو وائلڈ لائف حکام نے چانگ تھانگ وائلڈ لائف سینکچری کے اندر واقع حساس دلدلی علاقے تسو موریری کے قریب 12 بائیکرز کے ایک گروپ کو غیر قانونی آف روڈنگ کرتے ہوئے پکڑا۔ یہ گروپ گروگرام (ہریانہ) کے ایک ٹور آپریٹر ‘وانڈران ایکسپیرینسز پرائیویٹ لمیٹڈ’ کے تحت سفر کر رہا تھا۔ ان پر وائلڈ لائف (پروٹیکشن) ایکٹ 1972 کے سیکشن 29 کی خلاف ورزی کے تحت فی بائیکر 10 ہزار روپے (مجموعی طور پر 1.20 لاکھ روپے) جرمانہ عائد کیا گیا۔

اس سے قبل، 30 جون کو حکام نے پینگونگ جھیل کے کنارے ‘مان’ نامی گاؤں کے پاس چانگ تھانگ سینکچری کی حدود میں غیر قانونی طور پر چلنے والی ایک مہندرا گاڑی کو قبضے میں لیا۔ اتر پردیش کے شہر میرٹھ سے تعلق رکھنے والے اس گاڑی کے ڈرائیور پر سیکشن 50 کے تحت 50 ہزار روپے کا جرمانہ عائد کیا گیا، جس کی ادائیگی کے بعد گاڑی کو چھوڑا گیا۔

یو این آئی۔م ا ع