تہران، ایران نے خاتم الانبیا ہیڈکوارٹرز نے امن معاہدے پر تبصرہ کرتے ہوئے ایک بیان میں کہا ہے کہ امریکہ اور اسرائیل کے پاس شکست تسلیم کرنے اور ہتھیار ڈالنے کے سوا کوئی راستہ نہیں تھا۔

خاتم الانبیا ہیڈکوارٹرز کے ترجمان نے کہا ایرانی عوام، مسلح افواج اور علاقائی اتحادیوں کی حمایت نے امریکہ اور اسرائیل کو شکست تسلیم کرنے پر مجبور کردیا۔ بی بی سی کے مطابق ایرانی سرکاری میڈیا اس معاہدے کو ایران کی فتح قرار دے رہا ہے، جب کہ ملک کے اندر سخت گیر حلقوں کی جانب سے اس معاہدے پر تنقید کی جا رہی ہے۔

اسپیکر ایرانی پارلیمنٹ باقر قالیباف کا کہنا ہے کہ دشمن کبھی بھی مزاحمتی ستونوں کے کسی حصے کو اکیلے نہیں گھیر سکتا، لبنانی جنگجوؤں کی جدوجہد اور ایران کی مضبوط سفارت کاری لبنان کی خودمختاری کی ضمانت ہے۔ انھوں نے کہا ایرانی سفارتکاری اسرائیلی حکومت کے پاگل پن اور جنگی جنون میں خلل ڈال دے گی۔

واضح رہے کہ ایرانی نائب وزیر خارجہ کاظم غریب آبادی نے امن معاہدے کی تصدیق کرتے ہوئے کہا ہے کہ معاہدے پر سب کو عمل درآمد کرنا ہوگا، انھوں نے اپنے بیان میں کہا معاہدے کا متن دستخط کے بعد جاری کیا جائے گا۔ انھوں نے کہا حتمی معاہدے کے لیے آئندہ 60 روز تک مذاکرات جاری رہیں گے جن میں پابندیوں کے خاتمے، جوہری معاملات، منجمد اثاثوں کی بحالی اور جنگ کے خاتمے جیسے امور زیرِ بحث آئیں گے۔ انھوں نے واضح کیا کہ ایران نے اپنے مطالبات متن میں شامل کرانے کے بعد ہی ایم او یو پر اتفاق کیا اور معاہدے کی خلاف ورزی کی صورت میں مناسب ردعمل دیا جائے گا۔

یو این آئی۔ ع اْ۔

واشنگٹن، امریکی صدر ڈونلڈ ٹرمپ نے عین وقت پر امریکہ ایران امن معاہدے میں ہونے والی تاخیر کی وجہ بتا دی ہے۔

امریکی صدر ڈونلڈ ٹرمپ نے کہا ہے کہ اسرائیل کا وزیر اعظم نیتن یاہو اگر بیروت پر حملہ نہ کرتا تو اب تک ایران سے معاہدے پر دستخط بھی ہوچکے ہوتے۔ امریکی نیوز ویب سائٹ ایکسیوس کی رپورٹ کے مطابق اسرائیلی حملے کے بعد صدر ٹرمپ نے نیتن یاہو سے ٹیلی فونک گفتگو میں گالم گلوچ بھی کی، امریکی صدر اسرائیلی حملے پر نیتن یاہو سے شدید ناراض ہوئے اور کھری کھری سنا دیں۔

ایکسیوس سے گفتگو میں صدر ٹرمپ نے کہا نیتن یاہو کے پاس فیصلے کرنے کی کوئی عقل یا سمجھ بوجھ نہیں ہے، ان کو اس وقت بے وقوفانہ حملے کی کیا ضرورت تھی؟ ٹرمپ نے صاف کہہ دیا نیتن یاہو کے پاس حالات سمجھنے کی صلاحیت نہیں ہے۔

انھوں نے کہا بیروت پر اسرائیلی حملے سے ایران کے ساتھ معاہدے پر دستخط کا عمل متاثر ہوا، ٹرمپ کے مطابق نیتن یاہو کی حرکت کی وجہ سے ایران سے معاہدے پر دستخط میں تاخیر پیدا ہو گئی۔ ٹرمپ نے کہا اسرائیلی وزیر اعظم نے بہت برا کیا، مجھے یقین نہیں آ رہا، ہم دستخط کرنے جا رہے تھے۔ امریکی صدر کی گالم گلوچ کے بعد نیتن یاہو نے اسرائیل کی سیکیورٹی کابینہ کا ہنگامی اجلاس بلا لیا، عرب میڈیا کے مطابق ایرانی میزائلوں کے ڈر سے نیتن یاہو کی سیکیورٹی کابینہ کا اجلاس بنکرز میں ہوگا۔

صدر ٹرمپ نے ٹروتھ سوشل پر لکھا ’’ہم معاہدے کے قریب ہیں، اسرائیل رکاوٹ نہ بنے، بیروت پر آج حملہ کسی صورت نہیں ہونا چاہیے تھا، اسرائیل نے ایک معمولی حملے کا جواب دیا، ہم ایسے معاہدے کے بہت قریب ہیں، جو لبنان سمیت پورے خطے میں امن لائے گا۔‘‘ انھوں نے لکھا ’’یہ ایک پائیدار امن کی شروعات ہو سکتی ہے، اسے برباد نہ کریں۔‘‘

واضح رہے کہ ذرائع کا کہنا ہے کہ صدر ٹرمپ اپنی سالگرہ کے موقع پر (14 جون) ایران سے معاہدے پر دستخط چاہ رہے تھے۔

یو این آئی۔ ع ا۔

بیروت، امریکہ ایران معاہدے کے باوجود جنوبی لبنان پر اسرائیل کے خوفناک حملے جاری ہیں، جس سے 3 افراد موقع پر ہی شہید اور 15 شدید زخمی ہو گئے۔

تفصیلات کے مطابق عالمی سطح پر ہونے والے جنگ بندی کے تمام تر دعووں اور معاہدوں کو پسِ پشت ڈالتے ہوئے اسرائیلی فوج کی غزہ اور لبنان میں کارروائیاں جاری ہے۔ گزشتہ چوبیس گھنٹوں کے دوران بیروت اور شمالی غزہ میں نئی بمباری کے نتیجے میں متعدد ہلاکتیں رپورٹ ہوئی ہیں، جبکہ مقبوضہ مغربی کنارے میں اسرائیلی آباد کاروں نے اشتعال انگیزی کی تمام حدیں پار کر دی ہیں۔

لبنان کے دارالحکومت بیروت میں اسرائیلی جنگی طیاروں نے بین الاقوامی قوانین کی کھلی خلاف ورزی کرتے ہوئے ایک رہائشی عمارت پر گائیڈڈ میزائلوں سے حملہ کیا۔ اس ہولناک حملے کے نتیجے میں عمارت زمین بوس ہو گئی، جس سے 3 افراد موقع پر ہی شہید اور 15 شدید زخمی ہو گئے۔ ریسکیو ٹیموں نے ملبے سے زخمیوں کو نکال کر ہسپتال منتقل کیا، جہاں کئی افراد کی حالت تشویشناک بتائی جاتی ہے۔

الجزیرہ ٹی وی کے مطابق اسرائیلی توپ خانے نے کفرتبنیت اور نبطیہ الفوقا کےقصبوں پر شیلنگ کی اور ایک گاڑی کونشانہ بنایا۔

دوسری جانب اسرائیلی فوج نے شمالی غزہ کو ایک بار پھر نشانہ بنایا، جبالیہ پناہ گزین کیمپ پر کیے گئے ایک فضائی حملے میں مزید 6 نہتے فلسطینی شہید ہو گئے۔ عینی شاہدین کے مطابق پناہ گزین کیمپ کو اس وقت نشانہ بنایا گیا جب وہاں لوگ خوراک اور پناہ کی تلاش میں موجود تھے۔

مقبوضہ مغربی کنارے کے علاقے رام اللہ کے مشرق میں اسرائیلی آباد کاروں نے مسلح ہو کر فلسطینی آبادیوں پر دھاوا بول دیا ، انتہا پسند آباد کاروں نے فلسطینیوں کے گھروں اور گاڑیوں کو آگ لگا دی جبکہ علاقے کی ایک مقامی مسجد پر حملہ کر کے اسے شہید کر دیا گیا۔ ظلم کی انتہا کرتے ہوئے ایک معمر اور بوڑھے فلسطینی شہری پر پیٹرول چھڑک کر اسے زندہ جلانے کی کوشش کی گئی۔ اس کے علاوہ، ‘دیر دبوان’ کے علاقے میں بھی فلسطینیوں کی متعدد گاڑیاں نذرِ آتش کر دی گئیں، جس سے پورے علاقے میں شدید کشیدگی پھیل گئی ہے۔

فلسطینیوں پر ہونے والے مظالم کے خلاف عالمی سطح پر احتجاج کا سلسلہ بھی تیز ہو گیا، امریکا کی معروف اسٹینفورڈ یونیورسٹی میں گریجویشن کی سالانہ تقریب اس وقت ہنگامہ آرائی کا شکار ہو گئی۔ جب طلبہ نے مہمانِ خصوصی اور گوگل کے سی ای او سندر پچائی کی تقریر کا بائیکاٹ کردیا۔ جیسے ہی سندر پچائی اسٹیج پر آئے، طلبہ نے “آزاد فلسطین” کے فلک شگاف نعرے لگائے اور احتجاجاً ہال سے واک آؤٹ کر گئے۔

یورپ میں بھی فلسطینی بچوں سے یکجہتی کے لیے مظاہرے کیے جا رہے ہیں۔ نیدرلینڈز کے مشہور ‘ڈچ اسکوائر’ پر سماجی کارکنوں اور شہریوں نے غزہ میں اسرائیلی بمباری سے شہید ہونے والے معصوم فلسطینی بچوں کی یاد میں ہزاروں علامتی جوتے رکھ کر احتجاج ریکارڈ کروایا۔

یو این آئی۔ ع ا۔