نیویارک، امریکہ اور ایران کے درمیان مذاکرات میں مثبت پیش رفت کی خبریں سامنے آتے ہی عالمی منڈی میں خام تیل کی قیمتوں میں کمی کا تسلسل شروع ہو گیا ہے۔

بین الاقوامی مارکیٹ میں برینٹ خام تیل کی قیمت میں 1.45 فیصد کمی ریکارڈ کی گئی، جس کے بعد وہ 79.42 ڈالر فی بیرل پر آگیا ہے۔ اسی طرح امریکی ویسٹ ٹیکساس انٹرمیڈیٹ کی قیمت بھی 2.07 فیصد کی گراوٹ کے ساتھ 75.73 ڈالر فی بیرل پر ٹریڈ کر رہی ہے۔

واضح رہے کہ اس سے قبل ایران اور امریکہ کے مابین مذاکرات کے حوالے سے مختلف قیاس آرائیوں کے باعث عالمی مارکیٹ میں تیل کی قیمتوں میں تیزی دیکھی گئی تھی۔

غیر ملکی میڈیا کے مطابق ان قیاس آرائیوں کے دوران برینٹ خام تیل کی قیمت بڑھ کر 81 ڈالر 27 سینٹ فی بیرل تک پہنچ گئی تھی، تاہم اب مثبت پیش رفت کے اشاروں نے مارکیٹ پر دباؤ کم کر دیا ہے۔

یو این آئی۔ ع ا۔

واشنگٹن، امریکی صدر ڈونلڈ ٹرمپ نے نیویارک ٹائمز کی ایک رپورٹ اور اس کی سُرخی کو سخت تنقید کا نشانہ بناتے ہوئے ٹرتھ سوشل پر اخبار کو مخاطب کرتے ہوئے کہا ’’تم کرپٹ اور بزدل ہو۔‘‘

امریکی صدر نے لکھا کہ کرپٹ اور ناکام نیویارک ٹائمز کی سرخی تھی ’’تقریباً 4 ماہ کی جنگ کے بعد کیا بدلا؟ تجزیہ کار زیادہ کچھ نہیں بتاتے!‘‘ اس پر انھوں نے طنزیہ انداز میں لکھا ’’کیا واقعی؟‘‘ ٹرمپ نے اس کے بعد وہی چیزیں گنوائیں جو ایران جنگ کے آغاز ہی سے وہ روز میڈیا کو گنواتے رہے ہیں، یعنی ’’ان کی فوج ختم ہو چکی ہے، ان کی بحریہ ختم ہو چکی ہے، ان کی فضائیہ ختم ہو چکی ہے، ان کے لانچنگ پیڈز، میزائل، ڈرونز اور ان کی تیاری کی صلاحیت تقریباً ختم ہو چکی ہے۔‘‘

صدر ٹرمپ نے مزید یاد دلایا ’’اُن کی اعلیٰ قیادت کی دونوں صفیں ختم ہو چکی ہیں، ان کی مہنگائی 250 فی صد پر پہنچ چکی ہے، ان کی معیشت تباہ ہو چکی ہے، ان کے فوجیوں کو تنخواہیں نہیں مل رہیں، آبنائے ہرمز کھلی ہوئی ہے، تیل دھڑا دھڑ نکل رہا ہے، اور امریکی اسٹاک مارکیٹ اور روزگار ریکارڈ بلند ترین سطح پر ہیں۔‘‘

امریکی صدر نے لکھا کہ ’’یہ ہے وہ جو تبدیل ہو چکا ہے، اے کرپٹ اور اخلاق باختہ بزدلو!‘‘ ایک اور پوسٹ میں ڈونلڈ ٹرمپ نے لکھا ’’کرپٹ اور زوال پذیر نیویارک ٹائمز جس انداز میں شدید نقصان اٹھانے والے اور بری طرح متاثرہ ایران سے متعلق خبروں کو جعلی اور من گھڑت ’’حقائق‘‘ کے ذریعے پیش کر رہا ہے، وہ میری رائے میں ’’غداری‘‘ کے مترادف ہے۔ میں ان کی تمام جھوٹی اور مضحکہ خیز رپورٹنگ کو ان کے خلاف اپنے کئی ارب ڈالر کے مقدمے میں شامل کروں گا۔ یہ مجرم ہیں!‘‘

یو این آئی۔ ع ا۔

برن، پاکستان اور قطر نے امریکہ ایران مذاکرات کا مشترکہ اعلامیہ جاری کر دیا ہے، جس میں کہا گیا ہے کہ فریقین نے 60 روز میں حتمی معاہدے تک پہنچنے کے لیے روڈ میپ پر اتفاق کر لیا ہے۔

اعلامیے کے مطابق ایران اور امریکہ کے تکنیکی مذاکرات کا آغاز فوری ہوگا، پاکستان اور قطر کی ثالثی میں اعلیٰ سطح کی کمیٹی تشکیل دی جائے گی، یہ کمیٹی مذاکراتی عمل کی نگرانی کرے گی۔ ایٹمی پروگرام، پابندیوں اور تنازعات کے حل کے لیے ورکنگ گروپس تشکیل دیے جائیں گے، لبنان میں فوجی کارروائیوں کے خاتمے پر عمل درآمد کے لیے سیل قائم کیا جائے گا اور آبنائے ہرمز میں تجارتی جہازوں کی محفوظ آمد و رفت کے لیے رابطہ نظام قائم ہوگا۔

عالمی میڈیا رپورٹس کے مطابق ثالث ممالک پاکستان اور قطر کا کہنا ہے کہ سوئٹزرلینڈ میں ہونے والے اعلیٰ سطحی مذاکرات کے پہلے روز امریکہ اور ایران نے ”حوصلہ افزا پیش رفت” کی ہے اور امریکہ اور ایران نے 60 دن کے اندر حتمی معاہدے تک پہنچنے کے لیے ایک روڈ میپ پر اتفاق کر لیا ہے۔ لبنان تنازع کے حل کے لیے امریکہ اور ایران نے لبنان میں فوجی کارروائیوں کے خاتمے کو یقینی بنانے کے لیے قطر اور پاکستان کی سہولت کاری سے ایک ڈی کنفلیکشن سیل قائم کرنے پر اتفاق کیا ہے ۔تکنیکی سطح کے مذاکرات اس ہفتے بھی سوئٹزرلینڈ میں جاری رہیں گے۔

واضح رہے کہ ان انتہائی اہم اور نازک مذاکراتی وقت میں اُس وقت کشیدہ لمحات بھی آئے جب صدر ڈونلڈ ٹرمپ نے تہران کے وفد کو دھمکیاں دے کر ایران کے اعلیٰ مذاکرات کار کو ناراض کر دیا تھا، جس کے باعث مذاکرات تعطل کا شکار ہو گئے تھے۔

ٹرمپ نے فاکس نیوز کو بتایا کہ اگر کوئی معاہدہ نہ ہوا تو امریکہ ایران پر دوبارہ بمباری کر سکتا ہے اور آبنائے ہرمز کا کنٹرول سنبھال سکتا ہے۔ جب امریکی صدر ڈونلڈ ٹرمپ نے حزب اللہ کی حمایت کے معاملے پر ایران پر حملے کی دھمکی دی تھی، تو تہران کے اعلیٰ مذاکرات کار محمد باقر قالیباف نے کہا کہ امریکا کو اپنے بیانات اور لہجے میں احتیاط برتنی چاہیے۔

یو این آئی۔ ع ا۔