واشنگٹن، امریکی صدر ڈونلڈ ٹرمپ نے ایران پر مزید شدید حملوں کا اعلان کردیا امریکی صدر ڈونلڈ ٹرمپ نے ریڈیو میزبان ہیو ہیوٹ سے گفتگو میں کہا ہے کہ امریکہ پیر کی رات اور منگل کو ایران پر بھرپور حملے کرے گا صدر ٹرمپ نے کہا کہ مفاہمتی یادداشت ایران کے لیے ایک امتحان تھی، تاہم ایران نے اس کی پاسداری نہیں کی ہم وسطی ایران کے کوہ کولانگ گاز لا کو نشانہ بنانےجارہےہیں۔

اس کے علاوہ امریکی صدر ٹرمپ نے کہا کہ میری اسرائیلی وزیر اعظم نیتن یاہو کے ساتھ بہت اچھی ہم آہنگی ہے اور ہمارے تعلقات خوشگوار ہیں۔ ٹرمپ نے کہا کہ میں بعض اوقات نیتن یاہو سے اختلاف کرتاہوں، انہیں اپنے اختلاف سے آگاہ بھی کر دیتا ہوں۔ بعد ازاں امریکی صدر ڈونلڈ ٹرمپ نے وائٹ ہاؤس میں میڈیا سے گفتگو میں کہا کہ ہم تیزی سے ایرانی فوج کو تباہ کر رہےہیں، آبنائے ہرمز سے متعلق ایران کی صلاحیتوں کو نشانہ بنا رہے ہیں۔

ٹرمپ نے کہا کہ ہم آج رات بھی ایران پر حملے کر رہےہیں، میرا خیال ہے معاہدہ کرنا ممکن ہے، ایران کی ناکہ بندی بمباری سےزیادہ فائدہ مند ہے، ایران کی پہلی اور دوسری سطح کی قیادت کو ختم کردیا۔ صدر ٹرمپ کا کہنا تھا کہ آبنائے ہرمزمیں جن ممالک کے تحفظ میں ہم مددکر رہےہیں، وہ اس کےاخراجات کی ہمیں ادائیگی کریں۔

واضح رہے کہ پیر کو امریکی صدر ڈونلڈ ٹرمپ نے آبنائے ہرمز کی دوبارہ ناکہ بندی کا اعلان کیا تھا۔ میڈیا سے گفتگو میں صدر ٹرمپ نےکہا کہ امریکہ کو آبنائے ہرمز کے محافظ کے نام سے جانا جائے گا، آبنائے ہرمز سے گزرنے والے تمام کارگو پر 20 فیصد کی شرح سے فیس لیں گے۔

امریکی صدر نے کہا آبنائے ہرمز کھلی ہے اور مستقبل میں بھی کھلی رہے گی، ناکہ بندی صرف ایرانی بحری جہازوں اور انکے گاہکوں کو روکے گی، ایران کےعلاوہ دیگر ملکوں کو آبنائے ہرمز آزادانہ استعمال کی مکمل اجازت ہوگی، آبنائے ہرمز کی ناکہ بندی اور نئے طریقے کار کا عمل فوری شروع کیا جائےگا۔

یو این آئی۔ ع ا۔

ریاض، یمن کے حوثی باغیوں نے سعودی عرب کے جنوبی علاقے میں واقع ابہا ایئرپورٹ کو متعدد بیلسٹک میزائلوں اور ڈرونز سے نشانہ بنایا ہے۔

حملے کے بعد حوثی ملیشیا کی جانب سے جاری کردہ ایک بیان میں سعودی فضائی حدود استعمال کرنے والی تمام فضائی کمپنیوں کو خبردار کیا گیا ہے کہ وہ ان کے اس انتباہ کو انتہائی سنجیدگی سے لیں۔ رپورٹس کے مطابق حوثیوں کی جانب سے یہ کارروائی یمن کی سعودی حمایت یافتہ حکومت کی جانب سے گزشتہ روز حوثیوں کے زیرِ انتظام صنعا ایئرپورٹ پر کیے گئے حملے کے جواب میں کی گئی ہے۔

دوسری جانب، خلیج تعاون کونسل (جی سی سی) نے سعودی عرب کے جنوبی علاقے پر ہونے والے اس بیلسٹک میزائل اور ڈرون حملے کی شدید الفاظ میں مذمت کی ہے اور عالمی برادری سے حوثی ملیشیا کے خلاف سخت کارروائی کا مطالبہ کیا ہے۔

خلیج تعاون کونسل کے سیکریٹری جنرل جاسم محمد البدیوی نے اپنے ایک مذمتی بیان میں کہا کہ حوثی ملیشیا کا یہ دہشت گردانہ حملہ بین الاقوامی قوانین اور بین الاقوامی انسانی قوانین کی کھلی خلاف ورزی ہے۔ انہوں نے کہا کہ یہ حملہ خطے کے امن و استحکام کو سبوتاژ کرنے، معصوم شہریوں اور اہم ترین شہری تنصیبات کو نشانہ بنانے کی مسلسل کوششوں کا ثبوت ہے۔ سیکریٹری جنرل نے عالمی برادری پر زور دیا کہ وہ حوثی ملیشیا کی جانب سے جنگ بندی کی مسلسل خلاف ورزیوں کے خلاف ایک مضبوط، مؤثر اور فیصلہ کن موقف اپنائے تاکہ ان جارحانہ کارروائیوں کو روکا جا سکے اور ذمہ دار عناصر کا محاسبہ کیا جا سکے۔

انہوں نے واضح کیا کہ سعودی عرب کا امن و استحکام خلیج تعاون کونسل کے تمام رکن ممالک کا مشترکہ امن ہے، اور کونسل سعودی عرب کی سلامتی، شہریوں اور وہاں مقیم افراد کے تحفظ کے لیے اٹھائے جانے والے تمام اقدامات کی مکمل حمایت کرتی ہے۔

یو این آئی۔ ع ا۔

تہران، ایران کے پاسدارانِ انقلاب نے اردن کے عوام کے نام پیغام میں کہا ہے کہ اردن کے عوام اپنی سرزمین سے امریکی اڈوں کے خاتمے کا مطالبہ کریں۔

پاسداران نے اپنے بیان میں کہا کہ آج اردن میں اس امریکی فضائی اڈے کو نشانہ بنایا جہاں سے ایران پرحملے کیے گئے، امریکی جارحیت کے پہلے روز انہی اڈوں سے حملوں میں میناب میں 186 بچوں اور اساتذہ کو شہید کیا گیا تھا۔

بیان میں کہا گیا کہ ایران نے امریکی افواج کو ان کی کارروائیوں کا جواب دیا، ایران کو اردن یا اس کے عوام سے کوئی دشمنی نہیں، اردن کےعوام کا انتہائی احترام کرتے ہیں۔

پاسداران انقلاب نے کہا کہ اردن کے عوام کسی بھی دوسری قوم کی نسبت فلسطینیوں کے دکھ اوران کے ساتھ ہونے والی ناانصافیوں کو بہتر سمجھتے ہیں، اردن کے عوام صہیونی ریاست کے جرائم سے آگاہ ہیں جس نے غزہ میں 20 ہزار بچوں سمیت 70 ہزار فلسطینیوں کا قتل عام کیا جو براہ راست امریکی مداخلت سے ہوا۔

پاسداران انقلاب نے کہا کہ اردن کے عوام امریکی فوجی اڈوں کے خاتمے کےلئے اپنی آواز بلند کریں، اردن کے عوام کے مطالبے سے فلسطینی عوام کی مدد اور خطےمیں امن کی بحالی ممکن ہوگی، اردن کی سربلندی ہماری خواہش ہے۔

یو این آئی۔ ع ا۔