خبراردو:
حریت کانفرنس (ع) چیرمین میر واعظ عمر فاروق نے مرکزی جامع مسجد میں بھاری عوامی اجتماع سے خطاب کرتے ہوئے دو ٹوک الفاظ میں یہ بات پھر واضح کردی کہ کشمیری قیادت اور عوام نے ہر طرح کے نام نہاد انتخابات کو کلی طور پر مسترد کردیا ہے کیونکہ آئین ہند کے تحت انتخابی ڈراموں سے نہ تو مسئلہ کشمیر کی متنازعہ حیثیت اور نہ ہی ہیئت تبدیل ہو سکتی ہے اور نہ ہی اس طرح کے ڈراموں سے عوام کو اُنکے پیدائشی حق، حق خودارادیت کی پر امن جدوجہد سے دستبردار کرایا جاسکتا ہے ۔انہوں نے کہا کہ حریت پسند عوام نے جس طرح نام نہاد بلدیاتی انتخابات کو عملاً مسترد کرکے کلی طور اُس لاحاصل مشق سے دوری اختیار کی ۔ اسی طرح کل17 نومبر کو ہونے جارہے پنچایتی انتخابی ڈرامے کو بھی عملاً مسترد کریں گے اور پوری دنیا کو یہ پیغام دیں گے کہ کشمیری عوام کیا چاہتے ہیں؟

انہوں نے کہا کہ حکمرانوں کا یہ تاثر دینا کہ انتخابی عمل سے جموں وکشمیر میں جمہوری ادارے مضبوط اور مستحکم ہونگے جھوٹ اور پروپیگنڈہ ہے کیونکہ انتخابات وہاں کوئی معنی رکھتے ہیں جہاں واقعی جمہوریت کا بول بالا ہولیکن جہاں مطلق العنانیت ہو، ظلم و جبر کی انتہا ہو، قیادت کی پر امن سرگرمیوں پر قدغن اور پہرے ہوں، نوجوانوں کو چُن چُن کر نشانہ بنایا جارہا ہو اور عوام کے سارے حقوق طاقت کے بل پر سلب کرلئے گئے ہوں جہاں فوج اور سرکاری فورسز کو بے پناہ اختیارات کے تحت کسی بھی شہر ی کے گھر میں گھس کر کسی بھی فرد کو نشانہ بنانے کی کھلی چھوٹ ہو جہاں رہائشی مکانوں کوبموں اور بارود سے کھنڈرات میں تبدیل کئے جاتے ہوں جہاں اپنے حق کے مطالبہ کی پاداش میں برسوں معصوم لوگوں کو جیلوں میں سڑایا جاتا ہو ، جہاں کالے قوانین افسپا اور بدنام زمانہ پبلک سیفٹی ایکٹ وغیرہ کے ذریعہ نوجوانوں کو برسوں پابند سلاسل رکھا جارہا ہو ، یہاں تک کہ مزاحمتی خواتین کو بھی فرضی کیسوں میں گرفتار کرکے تہاڑ جیسے جیلوں میں مقید رکھا جاتا ہووہاں جمہوریت کا نام لینا خود حقیقی جمہوریت کی توہین کے مترادف ہے ۔
میرواعظ نے کہا کہ مہذب دنیا میں انتخابات کو ایک جمہوری عمل تصور کیا جاتا ہے اور کوئی بھی باہوش انسان اسکی مخالفت نہیں کرسکتا تاہم جموں وکشمیر میں جب تک حقیقی جمہوریت کو بحال نہ کیا جائے اور اس کے لئے کشمیریوں کے جذبات اور احساسات اور بے پناہ قربانیوں کو مد نظر رکھ کر حق خودارادیت کی بنیاد پر اصل مسئلہ کو حل کرنے کیلئے اقدامات نہ اٹھائے جائیں تب تک نہ تو کشمیریوں کے سیاسی مستقبل کا تعین ہو سکے گا اور نہ ہی موجودہ غیر یقینی حالات کے اندر تبدیلی آسکے گی۔انہوں نے کہا کہ کشمیری عوام یہ انتخابی تماشے 1947 سے آج تک دیکھتے آرہے ہیں ، اس دوران کتنے وزیراعلیٰ آئے اور گئے لیکن مسئلہ اپنی جگہ موجود تھا، ہے اور رہے گا۔میرواعظ نے حکمرانوں کے ان کھوکھلے دعوؤں کو کہ انتخابات سے کشمیر میں تعمیر و ترقی ہوگی اور خوشحالی آئیگی کو مسترد کرتے ہوئے کہا کہ جب کشمیریوں سے ان کے زندہ رہنے کا حق ہی چھین لیا گیا ہے تو تعمیر و ترقی کا کیا مطلب ہے۔انہوں نے کہا کہ یہاں درجنوں قتل عام کے سانحات ہوئے اور بے گناہوں کو تہہ تیغ کیا گیا، ان کے خلاف کتنے ایف آئی آر درج کئے گئے اور کس کس کو سزا دی گئی؟

انہوں نے کہا کہ یہ اس لئے ممکن نہیں ہے کیونکہ ہندوستانی قانون میں قاتلوں کے تحفظ اور دفاع کی پہلو موجود ہیں اس لئے کشمیری عوام اور قیادت نے مسئلہ کشمیر کے حل تک ہر طرح کے نام نہاد انتخابی عمل کو مسترد کرتے ہوئے واضح کردیا ہے کہ ہمارا بس ایک ہی مطالبہ ہے اور وہ حق خودارادیت ہے۔کشمیر نیوز سروس کے مطابق میرواعظ نے عوام کو تلقین کی کہ وہ آج سنیچر وار کو مشترکہ مزاحمتی قیادت کی جانب سے جو ہمہ گیر احتجاجی ہڑتال کی کال دی گئی ہے اُس پر عوام من و عن عمل کریں اور اُس کے علاوہ بقیہ دنوں میں جن جن علاقوں میں انتخابی ڈرامے رچائے جارہے ہیں ان علاقوں کے عوام مقامی طور پر احتجاجی ہڑتال کرکے رواں خونین تحریک آزادی کے ساتھ اپنی مکمل ہم آہنگی اور یکجہتی کا اظہار کریں۔
دریں اثناحریت (ع) چیرمین میرواعظ عمر فاروق بزرگ سیاسی رہنما سید علی شاہ گیلانی کی رہائش گاہ حیدر پورہ گئے جہاں انہوں نے بزرگ رہنما کے فرزند نسبتی مرحوم غلام حسن مخدومی کی وفات حسرت آیات پر ذاتی طور پررنج و غم کا اظہار کیا اورکچھ وقت بزرگ رہنما کے ساتھ گزار کر انہیں تعزیت اور تسلیت پیش کی۔ اس موقعہ پر میرواعظ نے مرحوم مخدومی کی مغفرت اور جنت نشینی کیلئے ایصال ثواب کیا اور فاتحہ پڑھی۔