سری نگر، جموں و کشمیر پولیس کی کرائم برانچ کے خصوصی دستے نے پیر کے روز ایک مبینہ بھتہ خور گروہ کے سلسلے میں سری نگر اور گاندربل اضلاع میں متعدد مقامات پر چھاپے مارے۔ اس گروہ نے ایک بزرگ شہری کو اپنا نشانہ بنا کر ان سے 30 لاکھ روپے سے زائد کی ٹھگی کی تھی۔

حکام نے بتایا کہ یہ چھاپے بھارتیہ نیاۓ سنہتا (بی این ایس) کی مختلف دفعات کے تحت درج کی گئی ایف آئی آر کے سلسلے میں مارے گئے ہیں۔

کرائم برانچ کے مطابق پکڑے گئے ملزمان ایک منظم گروہ کا حصہ تھے، جو مبینہ طور پر کرائم برانچ اور اینٹی کرپشن بیورو کے اعلیٰ افسران بن کر لوگوں کو ڈراتے دھمکاتے تھے۔

الزام ہے کہ ان دھوکے بازوں نے خود کو ان محکموں کا افسر بتا کر سری نگر کے ایک بزرگ شہری کو جھوٹی شکایتوں اور گرفتاری کا خوف دکھایا اور ان سے 30 لاکھ روپے سے زائد کی رقم اینٹھ لی۔

معاملے کی باریک بینی سے تفتیش کرتے ہوئے پولیس نے گاندربل کے رنگیل ناگ بل کے رہنے والے مبشر احمد یٹو عرف وانی، سری نگر کے خواجہ یاربل کے رہائشی نصیر مقبول بیچو، کلال دوری کے رہائشی مدثر صادق نجار اور الٰہی باغ کے باشندہ منیر احمد میر کے گھروں کی تلاشی لی۔

کرائم برانچ نے عام عوام سے اپیل کی ہے کہ وہ دھوکہ دہی، جعل سازی، انٹرنیٹ کے ذریعے ہونے والے جرائم، دوسروں کا روپ دھارنے اور ایسے منظم جرائم میں ملوث دھوکہ بازوں سے پوری طرح ہوشیار رہیں۔

محکمے نے شہریوں سے کہا ہے کہ اگر انہیں ایسی کسی بھی مشکوک سرگرمی کا علم ہوتا ہے تو وہ فوری طور پر اپنے قریبی تھانے یا کرائم برانچ کو اس کی اطلاع دیں تاکہ مجرموں کے خلاف فوری قانونی کارروائی کی جا سکے۔

یو این آئی۔ الف الف۔ م الف

سری نگر، کشمیر میں رات بھر ہونے والی موسلا دھار بارش نے پیر کو سری نگر کے کئی حصے پانی میں ڈوب گئے، محکمہ موسمیات نے 23 جولائی تک جموں و کشمیر میں بڑے پیمانے پر بارش اور گرج چمک کے ساتھ بارش کی پیش گوئی کی ہے۔

بارش کے اعداد و شمار کے مطابق گاندربل میں 46.0 ملی میٹر بارش ریکارڈ کی گئی، جب کہ سری نگر میں 45.6 ملی میٹر بارش ہوئی، جس سے شہر کے کئی نشیبی علاقوں میں پانی جمع ہوگیا اور صبح کے وقت مسافروں کو مشکلات کا سامنا کرنا پڑا۔

دیگر بڑے مراکز میں سوپور میں 55.4 ملی میٹر، گلمرگ میں 8.2 ملی میٹر، پہلگام میں 3.2 ملی میٹر، کپواڑہ میں 0.8 ملی میٹر، اننت ناگ میں 1.0 ملی میٹر، پلوامہ میں 2.0 ملی میٹر، بانڈی پورہ میں 10.5 ملی میٹر، بڈگام میں 15.0 ملی میٹر اورقاضی گنڈ میں 0.1 بارش ریکارڈ کی گئی۔ ۔

فی الحال کشمیر میں پانی کی سطح مکمل طور پر نارمل ہے۔

محکمہ موسمیات نے جمعرات تک جموں و کشمیر میں ہلکی سے درمیانی بارش اور گرج چمک کے ساتھ بارش کی پیش گوئی کی ہے۔

محکمہ نے وسیع پیمانے پر درمیانے درجے سے بھاری بارش اور گرج چمک کے ساتھ بارش کی پیش گوئی کی ہے، جس سے مرکز کے زیر انتظام علاقوں کے کئی حصوں میں بارش کی سرگرمیوں میں اضافہ کا اشارہ ملتا ہے۔

حکام نے لوگوں کو چوکس رہنے کا مشورہ دیا ہے، خاص طور پر نشیبی اور پانی بھرے علاقوں میں کیوں کہ وقفے وقفے سے بارش جاری رہنے کی توقع ہے۔

یو این آئی۔ الف الف۔ م الف

جموں، جموں و کشمیر کے ڈوڈہ ضلع میں راگی نالہ کے قریب ایک مسافر بس اور کئی دیگر گاڑیوں پر پہاڑی پتھر گرنے سے ایک شخص کی موت ہو گئی اور تین دیگر زخمی ہو گئے۔

حکام نے پیر کو بتایا کہ آج صبح راگی نالہ کے قریب پہاڑی سے پتھر گرے اور ایک مسافر گاڑی سے ٹکرا گئے، جس سے ایک شخص ہلاک اور تین دیگر زخمی ہو گئے۔

بچاؤ ٹیمیں فوری طور پر حرکت میں آئیں اور زخمیوں کو طبی امداد کے لیے قریبی اسپتال منتقل کیا۔

ان کا کہنا تھا کہ لینڈ سلائیڈنگ کی وجہ سے ہائی وے کو ٹریفک کے لیے بند کر دیا گیا ہے، جب کہ راستے کو بحال کرنے اور سڑک کو صاف کرنے کا کام جاری ہے۔

مرکزی وزیر ڈاکٹر جتیندر سنگھ نے ایکس پر ایک پوسٹ میں کہا کہ بٹوٹ-ڈوڈا-کشتواڑ قومی شاہراہ 244 پر راگی نالہ کے قریب ایک مسافر بس اور کئی دیگر گاڑیوں پر پہاڑی پتھر گرنے کی اطلاع ملنے کے بعد انہوں نے ڈوڈا ڈسٹرکٹ مجسٹریٹ کرشن لال سے بات کی۔

انہوں نے کہا، “ایک شخص کی ہلاکت کی اطلاع ملی ہے۔ سوگوار خاندان کے ساتھ میری گہری تعزیت ہے۔”

انہوں نے کہا کہ تین شدید زخمیوں کو جی ایم سی ادھم پور منتقل کیا گیا ہے، جب کہ دیگر زخمیوں کو پی ایچ سی اسار میں طبی امداد دی جا رہی ہے۔ انہوں نے کہا کہ ملبہ ہٹایا جا رہا ہے اور راحت رساں ٹیمیں موقع پر موجود ہیں۔

انہوں نے پوسٹ کیا کہ مسافروں کو مشورہ دیا گیا ہے کہ وہ اس وقت تک ہائی وے پر سفر کرنے سے گریز کریں جب تک کہ سڑک کو صاف نہیں کیا جاتا اور گاڑیوں کی نقل و حرکت کے لیے محفوظ قرار نہیں دیا جاتا۔

یو این آئی۔ الف الف۔ م الف