تہران، ثالثوں نے ایران اور امریکہ میں 10روزہ جنگ بندی کی تجویز پیش کی ہےجس کے دوران معاہدہ بحالی کا راستہ نکالا جائے گا۔

خبر رساں ایجنسی روئٹرز کے مطابق ایرانی عہدیدار نے بتایا ثالثوں نے امریکا کیساتھ کشیدگی کم کرنے کیلئے دس دن سیزفائر کی تجویز بھیجی ہے، تجویز پر غور کیا جا رہا ہے تاکہ دونوں ممالک کے درمیان تصادم کو ختم کیا جا سکے۔

ترجمان ایرانی وزیر خارجہ اسماعیل بقائی کا کہنا ہے کہ جنگ بندی کا مقصد عبوری معاہدے کو بحال کرنے کے راستے تلاش کرنا ہے، ثالثی کرنے والے ملک کشیدگی میں کمی کیلئے کوششیں کر رہے ہیں۔

ان کا کہنا تھا کہ واشنگٹن کے پیغامات ثالث ممالک کے ذریعے تہران پہنچائے گئے کشیدگی کے باوجود سفارتی چینلز فعال رہے۔

ترجمان نے واضح کیا کہ جنگ کا دائرہ پھیلا تو ذمے دار امریکہ ہو گا خارگ جزیرے پرقبضہ کرنے کی کوشش کرنے والی امریکی فوج کا استقبال کرنے کیلئے تیارہیں۔

یو این آئی۔ ع ا۔

واشنگٹن، امریکی وزیرِ خارجہ مارکو روبیو نے کہا ہے کہ ایران آبنائے ہرمز کو بطور دباؤ استعمال کر رہا ہے۔

آسیان اجلاس کے لیے فلپائن روانگی کے موقع پر میڈیا سے گفتگو کرتے ہوئے انہوں نے کہا کہ امریکہ عالمی جہاز رانی کے تحفظ کے لیے ضروری اقدامات اٹھاتا رہے گا لیکن دیگر ممالک کو بھی آگے آ کر بوجھ بانٹنا ہو گا، وہ عسکری ساز و سامان کی فراہمی ہو یا مالی معاونت۔

مارکو روبیو نے کہا کہ ایران کے ساتھ تنازع کے حل کے لیے امریکا سفارت کاری کے لیے ہمیشہ تیار ہے لیکن سفارت کاری حقیقی ہونی چاہیے۔

ان کا کہنا ہے کہ اگر ایران کسی مفاہمت کی شرائط کی خلاف ورزی کر رہا ہے تو وہ معاہدہ مؤثر نہیں رہ سکتا۔

امریکی وزیرِ خارجہ نے یہ بھی کہا کہ امریکا نے ایران کے ساتھ کئی بار مذاکرات کی کوشش کی اور یہ کوشش جاری رکھیں گے۔

دوسری جانب امریکی فوج نے ایران پر آج مسلسل نویں رات بھی حملے کیے۔

ایران کے شہروں تبریز، چابہار، سیرک، ہرمزگان، بوشہر اور KONARAK میں حملوں کی اطلاع ہے۔

یو این آئی۔ ع ا۔

تہران، ایرانی پاسدارانِ انقلاب (آئی آر جی سی) کا کہنا ہے کہ ایرانی فوج امریکی مداخلت کا فوری اور مؤثر جواب دینے کے لیے تیار ہے۔

ایرانی خبر رساں ادارے تسنیم نیوز کے مطابق آئی آر جی سی کے جاری کردہ بیان میں کہا گیا کہ ایرانی زمینی افواج جدید ساز و سامان، مسلسل تربیت اور آپریشنل صلاحیتوں میں مسلسل بہتری کی بدولت کسی بھی ممکنہ امریکی دراندازی کا فوری اور مؤثر جواب دینے کے لیے مکمل طور پر تیار ہیں۔

ایرانی پاسدارانِ انقلاب کا کہنا ہے کہ مسلح افواج کی مسلسل چوکسی اور ہر وقت آپریشنل تیاری ملک کے پائیدار تحفظ کی ضمانت ہے اور اس مقصد کے لیے تمام آپریشنل شعبوں میں سنجیدگی کے ساتھ تیاری برقرار رکھی جا رہی ہے۔

آئی آر جی سی کی زمینی افواج کے ڈپٹی کمانڈر بریگیڈیئر جنرل روح اللّٰہ نوری نے کہا ہے کہ ایرانی فورسز کسی بھی دشمن کی دراندازی کو فوری طور پر ناکام بنانے کے لیے مکمل طور پر تیار ہیں۔

یو این آئی۔ ع ا۔