دوحہ، خلیل الحیہ حماس کے نئے سربراہ منتخب ہو گئے ہیں اکتوبر 2024ء میں سابق سربراہ یحییٰ السنوار کی شہادت کے بعد حماس کے امور 5 رکنی قیادتی کونسل کے ذریعے چلائے جا رہے تھے، جس میں خلیل الحیہ بھی شامل تھے اس ہفتے ہونے والے قیادت کے انتخاب میں ان کے مدمقابل حماس کے سابق سیاسی بیورو چیف خالد مشعل تھے خلیل الحیہ نے 69 میں سے 35 ووٹ حاصل کرکے صرف ایک ووٹ کے فرق سے کامیابی حاصل کی۔

ماہرین کے مطابق ان کے انتخاب کے بعد امریکہ کے لیے حماس کے اندر ایک واضح قیادت سے رابطہ کرنا ممکن ہو سکتا ہے۔

عملیت پسند رہنما سمجھے جانے والے خلیل الحیہ کے بارے میں اطلاعات ہیں کہ وہ گزشتہ سال اکتوبر میں غزہ سے متعلق مذاکرات میں امریکی صدر ڈونلڈ ٹرمپ کے داماد جیرڈ کشنر اور امریکہ کے خصوصی ایلچی اسٹیو وٹکوف کے ساتھ براہِ راست رابطے میں رہے تھے۔

اگرچہ انہیں ایران کے قریب تصور کیا جاتا ہے، تاہم تجزیہ کاروں کا کہنا ہے کہ اسٹیو وٹکوف کے ساتھ قائم ہونے والے روابط مستقبل میں غزہ سے متعلق امریکی سرپرستی میں مزید مذاکرات کی راہ ہموار کر سکتے ہیں۔

یورپی کونسل آن فارن ریلیشنز (ای سی ایف آر) کے وزٹنگ فیلو، غزہ سے تعلق رکھنے والے محقق اور انسانی حقوق کے کارکن محمد شہادہ کے مطابق خلیل الحیہ کو ایرانی طرز کے محورِ مزاحمت کا فطری حصہ سمجھا جاتا ہے، لیکن وہ مذاکرات اور سفارتی راستہ اختیار کرنے میں بھی اتنے ہی آسودہ ہیں۔ میری معلومات کے مطابق اسٹیو وٹکوف براہِ راست خلیل الحیہ سے مذاکرات کے خواہاں تھے۔

انہوں نے مزید کہا کہ حماس کے اندر خلیل الحیہ کو 4 شہداء کے والد کے طور پر بھی جانا جاتا ہے۔ ان سانحات نے خلیل الحیہ اور اسٹیو وٹکوف کے درمیان ایک ذاتی تعلق بھی پیدا کیا، کیونکہ وٹکوف کا اپنا بیٹا 2011ء میں 22 برس کی عمر میں انتقال کر گیا تھا۔

محمد شہادہ کے مطابق اسٹیو وٹکوف نے ایک پروگرام میں اس حوالے سے کہا تھا کہ ہم نے ان (خلیل الحیہ) کے بیٹے کی وفات پر اظہارِ تعزیت کیا۔ میں نے انہیں بتایا کہ میں بھی اپنا بیٹا کھو چکا ہوں اور ہم دونوں اس دردناک حلقے کا حصہ ہیں جنہوں نے اپنے بچوں کو دفن کیا ہے۔

غزہ میں پیدا ہونے والے خلیل الحیہ اسرائیل کے ساتھ جنگ بندی اور قیدیوں کے تبادلے کے مذاکرات میں مرکزی کردار ادا کرتے رہے ہیں۔ یحییٰ السنوار اور اسماعیل ہنیہ کی شہادت کے بعد تنظیم کے اندر ان کا اثر و رسوخ نمایاں طور پر بڑھا۔ گزشتہ سال دوحہ میں ہونے والے ایک اسرائیلی حملے میں بھی خلیل الحیہ کو نشانہ بنایا گیا تھا۔

ای سی ایف آر کے سینئر پالیسی فیلو ہیو لووٹ کے مطابق خلیل الحیہ کا انتخاب حماس کے داخلی ڈھانچے میں کسی بنیادی تبدیلی کا اشارہ نہیں دیتا۔انہوں نے کہا کہ وہ درحقیقت تسلسل کی علامت ہیں۔ وہ یحییٰ السنوار کے دور میں غزہ میں نائب سربراہ تھے اور کافی عرصے سے اعلیٰ قیادت کا حصہ رہے ہیں۔ اگرچہ انہیں سخت گیر اور ایران کے قریب قرار دیا جاتا ہے، لیکن ان دونوں باتوں کو مناسب تناظر میں دیکھنا چاہیے۔

ایران سے تعلقات کے بارے میں ان کا کہنا تھا کہ تنظیم میں ایران کے زیادہ پرجوش حامی بھی موجود ہیں، جبکہ حماس ہمیشہ عرب ممالک اور تہران کے درمیان اپنے تعلقات میں توازن برقرار رکھنے کی کوشش کرتی رہی ہے۔ اس وقت ایسا کوئی اشارہ نہیں کہ حماس مکمل طور پر ایران کے زیرِ اثر آ جائے گی۔

اسرائیلی جنگ کے باعث غزہ میں وسیع پیمانے پر تباہی اور تقریباً 72 ہزار فلسطینیوں کی اموات کے باوجود حماس نے علاقے میں اپنی انتظامی موجودگی برقرار رکھی ہے، جہاں خلیل الحیہ کو خاص اثر و رسوخ رکھنے والا رہنما سمجھا جاتا ہے۔

اگرچہ مسلسل اسرائیلی حملوں کے نتیجے میں حماس کی عسکری صلاحیت کو شدید نقصان پہنچا ہے، تاہم تنظیم اب بھی غزہ میں صحت کی بنیادی سہولتیں، ہنگامی امدادی کارروائیوں اور بعض شہری انتظامی امور کی نگرانی کر رہی ہے۔

قطر میں نارتھ ویسٹرن یونیورسٹی کے پروفیسر خالد الحروب کا کہنا ہے کہ خلیل الحیہ کی تقرری دو واضح پیغامات دیتی ہے۔

پہلا یہ کہ حماس کا داخلی ڈھانچہ اور فیصلہ سازی کا نظام شدید حالات اور اپنی سیاسی و عسکری قیادت کے بڑے حصے کی شہادت کے باوجود فعال ہے۔ دوسرا یہ کہ غزہ اب بھی تنظیم کی فیصلہ سازی میں مرکزی حیثیت رکھتا ہے۔ اس کا لازماً یہ مطلب نہیں کہ تنظیم زیادہ سخت گیر پالیسی اختیار کرے گی لیکن یہ ضرور ظاہر کرتا ہے کہ غزہ اب بھی اس کی اولین ترجیح ہے۔

یو این آئی۔ ع ا۔

اسلام آباد، حکومت پاکستان کے ذرائع نے اناطولیہ ایجنسی کو بتایا کہ پاکستان اور قطر نے کشیدگی کو کم کرنے کے لیے ایک مشترکہ تجویز پیش کی ہے۔

دونوں ممالک نے مہینوں سے جاری جنگ کو مستقل طور پر ختم کرنے کے مقصد سے شروع ہونے والے لیکن تعطل کا شکار ہونے والے مذاکرات کے دوبارہ آغاز کے “پہلے قدم کے طور پر” امریکہ اور ایران سے 9 جولائی سے پہلے کی پوزیشنوں پر واپس آنے کا مطالبہ کیا ہے۔

ذرائع نے مزید کہا کہ اسلام آباد اور دوحہ کی جانب سے “علاقائی شراکت داروں کے ساتھ مشاورت کے بعد” مشترکہ طور پر تیار کردہ اس تجویز میں دونوں فریقین سے پہلے کی پوزیشنوں پر واپس آنے کا مطالبہ کیا گیا ہے۔

ایران نے پیر کے روز تصدیق کی ہے کہ اسے کشیدگی کم کرنے کے خواہشمند ثالثوں کی طرف سے تجاویز موصول ہوئی ہیں اور وہ ان کا جائزہ لے رہا ہے، جبکہ واشنگٹن اور تہران کے درمیان جاری جوابی حملوں کے ماحول میں سفارت کاری کے عزم کا اعادہ کیا ہے۔

ایرانی وزارت خارجہ کے ترجمان اسماعیل بقائی نے ایک پریس کانفرنس کے دوران بتایا کہ ثالث کشیدگی کو روکنے کے لیے کام کر رہے ہیں اور انہوں نے تہران کو تجاویز پہنچائی ہیں لیکن ہم اس مرحلے پر ان کی تفصیلات ظاہر نہیں کریں گے۔

گزشتہ ماہ پاکستان کی ثالثی میں دستخط کیے جانے والے مفاہمت نامے کے باوجود، جس کا مقصد تنازع کو ختم کرنا اور ایک مستقل امن معاہدے تک پہنچنا تھا، ایران اور امریکہ کے درمیان فوجی جھڑپیں جاری ہیں۔تاہم، گزشتہ ہفتے آبنائے ہرمز کے معاملے پر کشیدگی ایک بار پھر بڑھ گئی۔

جاری ثالثی کوششوں سے واقف ایک پاکستانی ذریعہ نے بتایا، “9 جولائی سے پہلے کی صورتحال پر واپس جانا شدید دشمنیوں کو روکنے اور اسلام آباد یا دوحہ میں مذاکرات کے دوبارہ آغاز کی راہ ہموار کرنے کا پہلا قدم ہوگا۔”

ذرائع کے مطابق تجویز میں کہا گیا ہے کہ ایران آبنائے ہرمز کو فوری طور پر دوبارہ کھول دے گا جبکہ امریکہ ایرانی بندرگاہوں کا محاصرہ ختم کر دے گا اور ایرانی تیل کی فروخت پر عائد پابندیاں ہٹا دے گا۔ذرائع نے یہ بھی بتایا کہ اس فارمولے میں جوابی فوجی حملوں کو روکنے کے لیے دو ہفتوں کی جنگ بندی کی تجویز دی گئی ہے۔

امریکی صدر ڈونلڈ ٹرمپ نے گزشتہ ہفتے 9 جولائی کو آبنائے ہرمز میں تین تجارتی جہازوں پر ایران کے مبینہ حملوں کے بعد محاصرے اور تیل سے متعلق پابندیاں دوبارہ عائد کرنے کا اعلان کیا تھا۔

ذرائع نے مزید کہا کہ اگر واشنگٹن اور تہران اتفاق کرتے ہیں، تو معطل شدہ مذاکرات “فوری طور پر” دوبارہ شروع کر دیے جائیں گے اور جنوبی لبنان میں جنگ بندی کا نفاذ ایجنڈے میں سب سے اوپر ہوگا۔

اسرائیلی افواج کی جانب سے جنوبی لبنان اور غزہ میں جنگ بندی کی مسلسل خلاف ورزیاں، 17 جون کو دستخط کیے گئے اس مفاہمت نامے کے نفاذ میں بنیادی رکاوٹ بنیں جس کا مقصد ایران اور امریکہ کے درمیان فوجی تصادم کو ختم کر کے مستقل امن معاہدے کی راہ ہموار کرنا تھا۔

ٹرمپ نے یہ بھی اعلان کیا تھا کہ مفاہمت نامہ “ختم” ہو چکا ہے جس نے نئے فوجی تصادم کو ہوا دی۔

پاکستانی ذرائع کا کہنا ہے کہ ثالث دونوں فریقوں سے “مثبت” جواب کی توقع کر رہے ہیں اور انہیں امید ہے کہ مذاکرات “بہت جلد” دوبارہ شروع ہو جائیں گے۔

یو این آئی۔ ع ا۔

لندن، امریکہ اور ایران میں جنگ بندی کی سفارتی کوششوں کے باعث بین الاقوامی مارکیٹوں میں خام تیل کی قیمتیں کمی کے بعد 88.52 ڈالر فی بیرل پر آگئی۔

تفصیلات کے مطابق مشرقِ وسطیٰ میں جاری شدید کشیدگی کے درمیان جنگ بندی کی سفارتی کوششوں کے باعث عالمی منڈی میں خام تیل کی قیمتوں میں معمولی کمی ریکارڈ کی گئی ہے۔

غیر ملکی میڈیا کی جانب سے کہا گیا کہ ثالثی کرنے والے ممالک دونوں فریقین کو 10 روزہ جنگ بندی پر آمادہ کرنے کے لیے متحرک ہیں، جس کے اثرات آئل مارکیٹ پر بھی دیکھے جا رہے ہیں۔

عالمی مارکیٹ میں خام تیل کے دونوں بڑے بینچ مارکس میں کاروباری روز کے دوران اتار چڑھاؤ کے بعد کمی دیکھی گئی، برینٹ خام تیل کی قیمت میں 0.78 فیصد کی معمولی کمی کے بعد 88 ڈالر 52 سینٹ فی بیرل پر آگئی ہے۔

اسی طرح امریکی خام تیل کی قیمت بھی 0.39 فیصد گرنے کے بعد 82 ڈالر 15 سینٹ ($82.15) فی بیرل پر ٹریڈ کر رہی ہے۔

ماہرینِ معاشیات کا کہنا ہے کہ مشرقِ وسطیٰ میں جنگی صورتحال کے باعث سپلائی معطل ہونے کے خدشات بدستور موجود ہیں، تاہم 10 روزہ جنگ بندی کے لیے جاری حالیہ مذاکرات نے مارکیٹ کو کسی بڑے ہنگامی اچھال سے روک رکھا ہے اور قیمتوں میں معمولی کمی اور استحکام کا رجحان دیکھا جا رہا ہے۔

یو این آئی۔ ع ا۔